Tijjani Reijnders transferi: Saudiya Arabistoni yoki Yevropa futboli?
Bir yil. Shunchaki bir yil o‘tdi, xolos. Shunga qaramay, Tijjani Reijnders atrofidagi shovqin Manchester shahrida yana kuchaydi. Transfer bo‘yicha ishonchli manbalar, jumladan Fabrizio Romano, 28 yoshli yarim himoyachining “Etihad”ni tark etishi tobora realroq stsenariyga aylanayotganini xabar qilmoqda.
Sabab bitta emas. Eng kattasi – Saudi Pro League.
60 million yevrolik taklif va bitta qolgan “ha”
Saudiya Arabistonining Al Qadsiah klubi Reijnders uchun 60 million yevrolik taklifni allaqachon yuborgan, deyiladi xabarlarda. ManCity bilan kelishuvga erishilgani ham aytilmoqda. Hozircha bitta hal qiluvchi halqa yetishmayapti – futbolchining o‘zi.
Reijnders esa ikkilanmoqda. U uchun bu oddiy transfer emas, kariyerasining eng sermahsul davrida qabul qilinadigan qaror. Cho‘qqiga chiqib olgan, kuch-quvvati, tempi, ritmi joyida turgan paytda “cho‘l davlati”ga ketish – hamma ham bir zumda “ha” deb aytadigan yo‘l emas.
Shu bilan birga, raqobat ham bor. Nottingham Forest va Galatasaray ham Reijndersga qiziqish bildirgani aytilmoqda. Lekin moliyaviy tortishuvda Saudiya Arabistoni bilan bellashish qiyin. Maosh, bonuslar, shartnoma shartlari – bu jihatlarda Al Qadsiah ustunlikka ega bo‘lishi deyarli aniq.
Guardiola davrida – “asosiy” emas, lekin e’tiborsiz ham emas
Savol tug‘iladi: nega ManCity bunday shakldagi futbolchini qo‘yib yuborishga tayyor?
O‘tgan mavsumda Reijnders Pep Guardiola qo‘l ostida muntazam maydonga tushdi, lekin “teginilmas” asosiy futbolchilar qatoriga kirmadi. Shunga qaramay, raqamlar hurmatga loyiq: 50 o‘yin, 15 ta bevosita golli ishtirok – 7 ta gol va 8 ta golli uzatma.
Bu statistika uni foydasiz zaxira futbolchisiga emas, balki tizim ichida muhim bo‘g‘inga aylantiradi. Ammo ManCity bugun endi boshqa murabbiy qo‘l ostida.
Maresca davrida raqobat keskinlashdi
Enzo Maresca markaziy va hujumkor yarim himoyada variantlarga boy. Aynan Reijndersning kuchli tomonlari namoyon bo‘ladigan chiziq – eng gavjum hududga aylangan.
135 million yevroga kelgan Elliot Anderson bu yozning eng katta sarlavhasi. Ammo u yolg‘iz emas. Matheus Nunes, Nico Gonzalez, Mateo Kovacic, Rayan Cherki, Phil Foden, Claudio Echeverri – barchasi xuddi shu zonalarda o‘ynay oladi.
Bunday zich raqobatda Reijnders uchun asosiy tarkib kafolatlanmaydi. Bu esa 28 yoshli futbolchi uchun hal qiluvchi omil bo‘lishi mumkin. Ayniqsa, Saudiya Arabistonida u nafaqat moliyaviy jihatdan, balki maydondagi roli bo‘yicha ham markaziy figura bo‘lish ehtimoli yuqori.
Rodri jumboği va bozorga qaytish ehtimoli
ManCity ichidagi katta savollardan biri – Rodri kelajagi. Barcelona uni jiddiy ravishda o‘z safiga qo‘shib olishga urinayotgani haqida ko‘plab xabarlar tarqalgan. Transfer narxi borasida esa hanuz aniq kelishuv yo‘q.
Agar ispaniyalik jahon va Yevropa chempioni haqiqatan ham klubni tark etsa, ManCity yana bozorga tushishi kutilmoqda. Bu holda markaziy zona yana qayta quriladi.
Maresca uchun asosiy nomlardan biri – Enzo Fernandez. U bilan Chelsea davridan beri tanishligi, murabbiy uchun argentinalikni “tayyor yechim”ga aylantiradi. Ammo bu yerda ham vaqt bosimi bor. Chelsea, xabarlarga ko‘ra, ManCity va Real Madrid kabi klublar uchun aniq muddat qo‘ygan: TheAthletic ma’lumotiga ko‘ra, juma oqshomigacha 140 million yevro stol ustiga qo‘yilmasa, eshik yopiladi.
Bu raqamlar, bu muddatlar, bu bosim – hammasi Reijnders atrofidagi vaziyatni yanada keskinlashtiradi. Agar ManCity Rodrini ushlab qola olsa va Enzo Fernandez uchun borishga qaror qilsa, Reijnders uchun “Etihad”dagi joy yanada torayishi mumkin.
Reijnders oldidagi tanlov
Bir tomonda – Yevropa futbolining eng yuqori sahnasi, ichki raqobat, rotatsiya, lekin yuqori darajadagi o‘yinlar va unvonlar. Boshqa tomonda – Saudiya Arabistonidagi moliyaviy qulaylik, katta rol, ehtimol, yulduz maqomi.
Reijnders uchun bu yoz faqat transfer oynasi emas. Bu uning keyingi besh yilligini belgilab beradigan chorraha.
U qaysi yo‘lni tanlaydi?
