Man City ichidagi portlash va Guardiola ko‘z yoshlari

Dekabr 2024, Anfield. Tablo – 2:0, foyda Liverpool tomonida. Ammo o‘sha kechada eng katta zarba hisobda emas, Man City ichki kiyinish xonasida bo‘ldi.

Amazon Prime Video’ning “A Beautiful Obsession” hujjatli filmidan paydo bo‘lgan yangi lavhalar klub ichida keskinlik allaqachon chiziqdan o‘tganini ochib tashladi. Kiyinish xonasida, mag‘lubiyatdan keyingi og‘ir daqiqalarda, Kyle Walker o‘z murabbiyi Pep Guardiola ustiga keskin hujum boshlaydi.

“Har bir yig‘ilishda mening ismim, har bir yig‘ilishda – mening ismim”, – deya g‘azabini yashirmaydi u.

Bu oddiy asabiy portlash emas edi. Bu – uzoqdan kelayotgan charchoqning, to‘planib qolgan norozilikning ochiq sahnaga chiqishi edi.

Chempionlikdan inqirozgacha

Anfielddagi mag‘lubiyat City uchun halokatli seriyaning bir bo‘lagi bo‘lib qoldi: ketma-ket yettita o‘yin g‘alabasiz, ulardan oltitasi – mag‘lubiyat. Yaqin o‘tgan mavsumda to‘rt yil ketma-ket Premier League chempioniga aylangan jamoa uchun bu keskin qulashi bilan yanada og‘irroq ko‘rinardi.

Shu fon’da Guardiola yaqindagina klub bilan shartnomasini uzaytirgan, kelajagini Manchester bilan bog‘lagan edi. Qog‘ozda – barqarorlik. Amalda – ichki bosim, ishonch sinovi.

Walker o‘zini nishonga olingandek his qildi. U nafaqat tajribali futbolchi, balki sardorlardan biri. Aynan shuning uchun ham, uningcha, murabbiy yig‘ilishlarda ortiqcha ravishda aynan uni tilga olayotgandek tuyulardi. O‘sha kecha u bunga chek qo‘ydi.

“Siz meni sardor bo‘lishimni xohlamagansiz”

Guardiola vaziyatni yumshatishga urinadi. Uning tushuntirishicha, Walker ismining tez-tez tilga olinishi – u sardorlardan biri bo‘lgani uchundir. Javob esa darhol, keskin chiqadi.

Walker bir zumda murabbiy samimiyatini shubha ostiga qo‘yadi: “Siz meni sardor bo‘lishimni xohlamagansiz”.

O‘ng qanot himoyachisi o‘zini aybdor qilingan yagona odam sifatida ko‘rayotganini yashirmaydi. Uning fikricha, maydondagi kengroq taktik buzilishlar ham baribir yakunda uning nomi bilan bog‘lanayotgandek:

“Boshqa birovga reaksiya qilganman, to‘pni yo‘qotganman, baribir qandaydir qilib mening ismimni aralashtirasiz”, – deya davom etadi u.

Bu endi shunchaki taktika yoki pressing haqida bahs emasdi. Bu – mas’uliyat, adolat va kiyinish xonasidagi kuch muvozanati haqida ochiq to‘qnashuv edi.

Pepning ko‘z yoshlari

Shunda kutilmagan burilish yuz beradi. Odatda mayda detalgacha o‘ylangan taktik rejalar, sovuqqon qarorlar bilan tanilgan Guardiola ko‘z o‘ngida butunlay boshqacha ko‘rinadi.

U butun birinchi jamoa oldida ko‘z yoshlarini zo‘rg‘a tiyadi. So‘zlari titroq, ohangi – og‘ir.

“Agar men muammo bo‘lsam, menga aytishingiz kerak”, – deydi u.

U pul uchun yoki shunchaki lavozimni ushlab qolish uchun qolmaganini ta’kidlaydi. Yaqinda shartnomani uzaytirgani – jamoa bilan birga bo‘lish, ular bilan birgalikda kurashish istagi tufayli ekanini aytadi. Guardiola futbolchilarga qochib ketmoqchi emasligini, ularni yarim yo‘lda tashlab qo‘ymoqchi emasligini tushuntirishga urinadi.

“Men sizlardan qochib, qochib ketmoqchidek ko‘rinishingizni xohlamayman. Bo‘laklar sochilib ketayotgandek bo‘lsa, men: ‘Yo‘q, men sizlarga yordam bermoqchiman’, deb his qilaman”, – deydi u.

So‘ng esa eng og‘ir jumlaga keladi: agar, avval sardorlar, so‘ng qolganlar, uning o‘zi muammo deb hisoblasa – buni ochiq aytishlarini so‘raydi. Sevgi, hurmat o‘zgarmasligini, lekin baribir jang qilishni xohlashini urg‘ulaydi.

“Bu sizlarga bo‘lgan sevgimni bir soniyaga ham o‘zgartirmaydi. Lekin men kurashmoqchiman. Hammasi shu. Kechirasiz”, – deya nutqini yakunlaydi u.

Chempionlar uchun og‘riqli savol

Bu lavhalar City davrining eng murakkab pallalaridan birini yorqin ko‘rsatib berdi: to‘rt karra chempion bo‘lgan jamoa birdaniga o‘z ichidagi ishonchni qayta ko‘rib chiqishga majbur bo‘ldi. Kiyinish xonasida sardor va murabbiy o‘rtasidagi bunday ochiq to‘qnashuv har qanday klubni larzaga keltiradi.

Savol esa endi juda sodda, lekin og‘riqli: shuncha yillik muvaffaqiyatdan so‘ng, Man City ushbu sinovni ham birgalikda yenga oladimi yoki aynan shu lahza ularning davrini asta-sekin yakunlaydigan burilish nuqtasiga aylanadimi?