Maika Hamano: Chelsea ning yangi yulduzi
“Chelsea”ning o‘rtacha maydon chizig‘ida yangi mavsum arafasida sokin inqilob pishib yetmoqda. Uning markazida esa atigi 22 yoshli, lekin allaqachon katta sahnaga chiqa olgan Maika Hamano turibdi.
Yaponiyalik futbolchi “Barclays Women’s Super League”da eng istiqbolli iqtidorlardan biri sifatida tilga olinmoqda. Bunga sabab bor: u ko‘p pozitsiyada o‘ynay oladi, pressingdan tortib yakuniy zarbagacha bo‘lgan zanjirning istalgan bo‘g‘inida paydo bo‘lishi mumkin. Yozgi tanaffusda bir nechta tajribali yetakchilardan ayrilgan “Chelsea” uchun aynan shunday o‘yinchi zarur edi – yosh, jasur va mas’uliyatni o‘z zimmasiga olishga tayyor.
O‘tgan mavsum Hamano “Chelsea” safida liga doirasida atigi to‘rt uchrashuvda maydonga tushdi. Shunga qaramay, u ilk turdayoq o‘z nomini eslatib qo‘ydi: Manchester City ustidan 2:1 hisobidagi g‘alabada BWSL dagi yagona golini urdi. Bu gol keyinchalik chempion bo‘ladigan jamoaga qarshi kiritilgani ham uning qanchalik sovuqqon va sahnadan qo‘rqmasligini ko‘rsatdi.
Keyin esa London ichidagi manzil o‘zgardi. Yanvar oyning transfer oynasida u “Tottenham Hotspur”ga ijaraga berildi. O‘n o‘yinda maydonga tushgan Hamano u yerda aynan o‘zi kutgan narsani oldi – muntazam o‘yin amaliyoti va ingliz futbolining ritmini chuqur his qilish imkonini.
Yaponiyaga qaytsak, u yerda Hamano allaqachon katta nomga aylanib ulgurgan. Yil boshida u “Nadeshiko Japan” safida AFC Women’s Asian Cup finalida g‘alaba golini urdi. Avstraliya maydonida, raqibning o‘z uyida kiritilgan bu gol qit’a chempionligini qaytarib berdi. 22 yoshli futbolchi uchun bu shunchaki chiroyli epizod emas, balki martaba burilish nuqtasiga o‘xshaydi.
Bunga qadar u 2022 yilda FIFA U20 Women’s World Cup turnirida “Golden Ball” mukofotini qo‘lga kiritgan edi. Demak, bu portlash tasodif emas, balki izchil o‘sishning mantiqiy davomi.
Yozgi ta’til, so‘ngra qaytish. Hamano “Chelsea”ga ijaradan qaytib kelishi bilan darhol signal berdi: men tayyorman. “Auckland FC”ga qarshi o‘tkazilgan 7:0 hisobidagi nazorat uchrashuvida u yana gol urdi. Raqib darajasidan qat’i nazar, bu murabbiylar shtabiga aniq xabar – unga ishonch bersangiz, javobini olasiz.
Yangi Mavsum
Yangi, kengaytirilgan mavsum oldidan savol tabiiy: endi-chi? O‘tgan mavsum Fantasy o‘yinida 42 ochko to‘plagan futbolchi endi mutlaqo boshqa rolga da’vogarlik qilmoqda. U endi zaxiradan tushadigan tajriba to‘plovchi emas, balki tizim markaziga aylanishi mumkin bo‘lgan o‘yinchi.
Fantasy ishtirokchilari uchun esa bu alohida mavzu. £5.0m narx bilan Hamano potentsial “xazina” bo‘lib turibdi. Mavsumni kuchli boshlash odatiga ega futbolchi uchun bu juda past baho. “Chelsea” 5-sentabr, shanba kuni “Stamford Bridge”da “Aston Villa”ga qarshi kampaniyani boshlarkan, ko‘plab menejerlar tanlov oldida qoladi: xavf qilib, unga ishonch berishmi yoki kech bo‘lishi mumkin bo‘lgan “kutib ko‘ramiz” yo‘lini tanlashmi?
Bir narsa aniq: agar murabbiylar uni markaziy rolga chiqarishsa, 42 ochkolik o‘tgan mavsum faqatgina start chizig‘i bo‘lib qolishi mumkin. 2026/27 yilgi kampaniya oldidan “Chelsea” tarkibida ko‘plab savollar bor, lekin bitta savol ayniqsa qiziq: Maika Hamano bu jamoaning navbatdagi mavsumni belgilab beradigan futbolchisiga aylanadimi?
