Juventus darvozabon izlayapti: Suzuki uchun so‘nggi shans
Yangi mavsum oldidan «Juventus» nihoyat eng nozik nuqtaga – asosiy darvozabon masalasiga yopishdi. Klub rahbariyati bozor yakunlanayotgan pallada oxirgi kuchini ishga solib, Suzuki transferi atrofidagi murakkab vaziyatdan foyda olishga urinmoqda.
Gap shundaki, «PSG» allaqachon «Parma» bilan kelishuvga erishgan. Fransuz klubi 2002-yilda tug‘ilgan posbon uchun 35 million yevro to‘lashga rozi bo‘lgan, rasmiy e’lon esa yaqin soatlarda kutilmoqda. Hamma narsa aniqdek ko‘rinadi. Lekin Turinda boshqacha reja bor.
Turinning rejasi: darhol Italiyaga qaytarish
«Juventus» bu transferni yakunlangan deb qabul qilmayapti. Aksincha, aynan shu holatni o‘z foydasiga burib olishga urinmoqda. G‘oya sodda, lekin jasur: Suzuki «PSG» futbolchisiga aylanadi, lekin darhol ijaraga asosida Turinga yo‘l oladi.
Taklif aniq – iyungacha mo‘ljallangan vaqtinchalik kelishuv. Ya’ni butun mavsum davomida Suzuki «Juventus» darvozasini qo‘riqlaydi, muntazam o‘yin amaliyotini esa o‘sha tanish Serie Ada davom ettiradi.
Bu rejani amalga oshirishda eng katta yengillik – futbolchining o‘zi. Suzuki bu variantga to‘liq rozilik bildirgan, «Juventus»ga qolgan mavsumni o‘tkazishdan hech qanday e’tirozi yo‘q. U uchun bu – yirik Yevropa klubi libosini kiyish, lekin baribir Italiyada asosiy darvozabon sifatida o‘ynash imkoniyati.
So‘z Luis Enrique va «PSG» rahbariyatida
Endi to‘p «PSG» tomonida. Yakuniy qaror to‘liq Luis Enrique va klub rahbariyatiga bog‘liq. Ular Suzuki kelasi oylarni qayerda o‘tkazishini belgilab berishi kerak – Parijdami yoki Turindami.
Shu qaror chiqmaguncha, maosh taqsimoti, bonuslar yoki boshqa moliyaviy shartlar bo‘yicha chuqur muzokaralarga o‘tib bo‘lmaydi. Avval yo‘l tanlanadi, keyin raqamlar ustida bosh qotiriladi.
Parijliklar rozilik bersa, keyingi bosqich tez kechishi kutilmoqda: klublar Suzuki maoshining qaysi qismini kim to‘lashi va boshqa moliyaviy detallarni qisqa muddatda kelishib olishi kerak bo‘ladi.
Turinda vaqt siqmoqda
«Juventus» uchun bu shunchaki bozor imkoniyati emas, balki aniq reja. Klub rahbariyati yaqin kunlar uchun bir maqsadni belgilagan: hafta oxirigacha bosh murabbiy Luciano Spalletti ixtiyoriga yangi birinchi raqamli darvozabonni yetkazib berish.
Vaqt esa siqib boryapti. Mavsum starti yaqin, mashg‘ulotlar ritmi allaqachon shakllanmoqda. Suzuki qanchalik erta kelsa, Spalletti tizimiga shunchalik tez moslashadi – taktik talablar, chiziqlar o‘rtasidagi o‘zaro tushunish, orqa chiziq bilan aloqa, bularning hammasi vaqt talab qiladi.
«Juventus»ning ilk rasmiy sinovi – safarda «Frosinone»ga qarshi o‘yin. Klub rahbariyati o‘sha uchrashuvga kelib, darvoza ustida savol emas, aniq javob bo‘lishini istayapti. Endi savol bitta: Luis Enrique Suzuki uchun Turindagi eshikni ochadimi yoki «Juventus» yana bozor ichida yangi nom izlashga majbur bo‘ladimi?
