Jake Paul va UFC o‘rtasidagi jang: uch yulduzning taqdiri
Jake Paul bir necha oy avval o‘zining MVP (Most Valuable Promotions) kompaniyasi bilan MMA olamiga shov-shuv bilan kirib kelgandi. Netflix bilan hamkorlikda o‘tkazilgan karta “UFC’ni bosim ostiga qo‘yadi”, degan va’dalar bilan sotildi. Sport darajasi bo‘yicha Dana White va uning jamoasi yig‘adigan kartalar bilan tenglashtirish qiyin, lekin bir haqiqat bor: UFC javob zarbasini berdi va Jake Paul sahnasidan uchta ismni tortib oldi. Bu raqobat endi shunchaki so‘z emas.
Jake Paul bilan Dana White o‘rtasida eski adovat borligi hammaga ma’lum. Paul tomoni ko‘proq shou, ko‘proq spektaklga o‘ynaydi, UFC esa hanuz dunyodagi eng kuchli MMA tashkiloti bo‘lib qolmoqda. Shunga qaramay, MVP’ning so‘nggi kartasida Dana White ko‘ziga tashlanmay iloji bo‘lmagan darajada kuchli ismlar bor edi. Natijada, har ikki taraf uchun ham foydali bo‘lgan uchta transfer yuz berdi.
Bir tomonda UFC – Netflix’da millionlab tomoshabinlar ko‘rgan mega-shoudan keyin allaqachon ma’lum darajadagi mashhurlikka ega bo‘lgan jangchilarni qo‘lga kiritmoqda. Ikkinchi tomonda esa Jake Paul va uning jamoasi: ular endi bemalol “bizning promoushondan UFC jangchi olmoqda, demak biz ham haqiqiy kuchmiz”, deb maqtanadi.
Parnasse – Parijga bosh qahramon sifatida qaytish
Uchlik ichida eng katta ism – Salahdine Parnasse (23–2). Fransiyalik bu yengil vazn yulduzi MVP kartasiga allaqachon superyulduz maqomida kelgandi: KSW’da ikki vazn – featherweight va lightweight – chempioni bo‘lgan, UFC’ning “sirena chaqiruvi” esa ancha vaqtdan beri uning atrofida yangrab kelardi.
MVP kechasida u Kenny Cross’ga qarshi oktagonga qadam qo‘ydi va favorit nega aynan u ekani ko‘p cho‘zmay isbotladi: birinchi raunddayoq nokaut. Shundan keyin voqealar tezlashdi.
Parnasse Ariel Helwani bilan suhbatda shunday deya hikoya qiladi: MVP’dagi jangdan so‘ng UFC uni darhol aloqaga chiqqan, Parijdagi turnirda bosh jangga qo‘yishni taklif qilgan. Bitim bu safar yaxshiroq bo‘lgan, ustiga ustak, Dan Hooker bilan jang orqali reytingga kirish imkoniyati ham stol ustiga qo‘yilgan.
Natija: 5-sentabr kuni bo‘lib o‘tadigan UFC Paris kechasida Parnasse o‘z uyida, Parijda, darhol bosh voqea markaziga chiqadi. Raqib – kompaniya ichida juda katta ism sanaladigan Dan Hooker. Bu yerda xatoga joy yo‘q: g‘alaba qozonsa, u yengil vazn reytingining ilk o‘nligiga otilib kirishi kutiladi. Fransiya uchun ham, UFC uchun ham, Jake Paul uchun ham bu jang alohida sinovga aylanadi.
Despaigne – taekvondodan og‘ir vaznga qaytish
Keyingi ism – Robelis Despaigne (6–2). U UFC’ga qaytmoqda. Orada u Karate Combat’da yetti marta jang qilib, oltita yakuniy g‘alabaga erishdi, so‘ng esa MVP kartasida haqiqiy afsona – sobiq UFC chempioni Junior Dos Santos’ni birinchi raunddayoq nokautga uchratdi.
Kubalik og‘ir vazn yulduzi – taekvondo bo‘yicha Olimpiada bronza medali sohibi. Birinchi UFC davrida esa ishlar uncha ham ketmagandi: bir g‘alaba, ikki mag‘lubiyat va ro‘yxatdan chiqarilish. Shunga qaramay, uning striking darajasi og‘ir vazn tarixidagi eng yorqinlardan biri sifatida tilga olinadi.
Muammo bitta: wrestling. Uni yerga yiqitishgan zahoti, Despaigne jiddiy qiynalgan. Oradan ikki yil o‘tdi. Endi savol bitta: u shu vaqt ichida bu bo‘shliqni to‘ldira oldimi? Axborot maydonida u allaqachon superyulduz. MVP hatto uni Francis Ngannou bilan superfight’da to‘qnash keltirmoqchi bo‘lgan, bu esa UFC uchun xavfli signal edi. Shuning uchun ham promoushon Ngannou bilan bunday to‘qnashuvni istagan emas, ammo Despaigne’ni o‘z tomoniga qaytarib olishga qaror qildi.
UFC og‘ir vaznda yangi portlovchi nom izlayapti. Despaigne – aynan shunday loyiha. U o‘zini qayta yozadimi yoki eski kamchiliklar yana bosh ko‘taradimi – oktagonning o‘zi aytib beradi.
Namo Fazil – Jake Paul sahnasidan Dana White sinoviga
UFC Jake Paul hududidan “o‘g‘irlagan” so‘nggi ism – Namo Fazil (10–1). Kurd aslidan bo‘lgan, ammo AQSh fuqaroligini olgan bu jangchi UFC’dan tashqaridagi eng yorqin welterweight iqtidorlaridan biri sifatida tilga olinadi. U buni MVP kartasida ham ko‘rsatdi: ikkinchi raundda bo‘g‘ish orqali g‘alaba.
Mana shu performans unga katta eshikni ochdi. Endi u Dana White’s Contender Series’da ishtirok etadi. Sana – 18-avgust, raqib – Kaik Brito. Shart oddiy: ishontiruvchi g‘alaba qozonsa, UFC bilan shartnoma qo‘lida. Jake Paul kartasida boshlangan yo‘l bir kechada butunlay yangi bosqichga ko‘tarilishi mumkin.
Jake Paul va UFC o‘rtasidagi jang hozircha oktagonda emas, promoushonlar ortida kechmoqda. Ammo bu uch ism – Salahdine Parnasse, Robelis Despaigne va Namo Fazil – kimning strategiyasi to‘g‘ri ekanini aniqroq ko‘rsatib beradi. Savol shunda: bu “o‘g‘irlangan” yulduzlar ertaga UFC sahnasida haqiqiy hukmronlikni boshlab beradimi yoki Jake Paul ularni yana o‘z shousiga qaytaradigan darajada kuchli raqib bo‘lib qoladimi?
