Xabi Alonso Chelsea'da yangi davrni boshlaydi
Chelsea nihoyat o‘zining yangi davrini ko‘rdi. Haftalab sukutdan so‘ng Xabi Alonso ilk bor so‘zga chiqdi va darhol o‘zining ustuvor yo‘nalishlari hamda “murosasiz” tamoyillarini ochiqchasiga belgilab berdi.
Ikki oycha avval Liam Rosenior o‘rnini egallagan, sobiq Real Madrid yulduzi va murabbiyi bu hafta Cobham bazasiga yetib keldi. Presezonga erta qaytgan futbolchilar bilan ilk mashg‘ulotlar, ilk qo‘l siqishlar, ilk talablar. Va, albatta, klub telekanaliga berilgan birinchi intervyu.
Inqiroz fonida kelgan murabbiy
Atigi o‘tgan yil Chelsea Club World Cup finalida Paris Saint-Germain ustidan g‘alaba qozonib, Premyer-ligada chempionlik poygasiga qo‘shilish haqida balandparvoz gaplar yangragan edi. Bugun esa manzara butunlay boshqa.
Yil boshidan buyon klub chuqur inqirozga sho‘ng‘idi, Champions League yo‘qligi, natijalar, tribunadagi norozilik – hammasi birlashib, og‘ir fon yaratdi. Aynan shunday sharoitda Alonso ishni boshlayapti.
“Bu katta sharaf,” deydi u yangi lavozimi haqida. “So‘nggi o‘n yilliklarda katta muvaffaqiyatlarga erishgan, dunyoning eng zo‘r klublaridan birining bir qismi bo‘lish – bu katta imtiyoz. Endi esa men bu chaqiriqni kutyapman.”
U klubni kutayotgan sinovlarni “yoqimli qiyinchiliklar” deb atadi. Bu ibora ortida esa bir haqiqat yotibdi: xatoga joy yo‘q.
Darhol natija talab qilinadi
21-asrda sovrinlar yutishga odatlangan Chelsea uchun hozirgi holat – o‘ta noqulay kontrast. Klub so‘nggi yillarda yosh, salohiyatli futbolchilarni to‘plashga urinib, uzoq muddatli loyiha qurayotganini ta’kidlab keladi. Lekin bu falsafa Stamford Bridge tribunalariga begona.
Bu yerda g‘alaba bugun kerak. Ertaga emas.
Alonso buni juda yaxshi tushunadi: “Bu meni hayajonga soladi, – deydi u. – Biz buyuk ishlarni qila olishimizni isbotlash imkoniyati. Ilk kundan boshlab raqobatbardosh bo‘lish uchun mustahkam baza yaratish. Biz birinchi yillardanoq, hatto birinchi o‘yinlardanoq yaxshi start olishni xohlaymiz.”
U jamoaning yaqindagi yuqori darajadagi o‘yinlarini eslatib, potensialga ishora qildi: “Ular yaqinda eng yuqori darajada raqobatlashgan. Bu menga jamoa salohiyati borligiga ishonch berdi – futbolchilar sifati, o‘yin sifati tufayli. Endi vazifa – shu ko‘p narsani davom ettirish va bilishki, Premyer-liga – bu juda raqobatbardosh daraja. Mana shu – chaqiriq.”
Alonso talabi aniq: “Hamma qat’iy sadoqat bilan ishlasa, albatta, og‘ir mehnat – bu shart, va qarorlardagi sifat bilan biz yaxshi mavsumdan zavq olish darajasiga chiqamiz.”
“Murosasiz” tamoyillar
So‘nggi yillarda Chelsea ichki madaniyati, kiyinish xonasidagi intizom, uzilmaydigan “qayta qurish” haqida savollar ko‘paydi. Klubda intizom muammosi borligi haqida gap-so‘zlar ko‘p, muxlislar esa tubdan o‘zgarish talab qilishmoqda.
Alonso esa o‘yinchi paytidayoq mukammallikni talab qilgan, maydonda ham, tashqarida ham detalga e’tibor bergan futbolchi edi. Endi u shu talabchanlikni murabbiy sifatida yanada oshirmoqchi.
“Futbolda ayrim prinsiplar bor, ular bo‘yicha kelishib bo‘lmaydi,” deydi u. “Eng yuqori darajada raqobatlashish uchun siz to‘liq narxini to‘lashga tayyor bo‘lishingiz kerak. Hech narsani ichingizda ushlab qololmaysiz. Jamoa manfaati uchun bor narsangizni berishingiz shart. Va jamoa – har doim eng muhim narsa.”
Unga ko‘ra, bu madaniyat kundalik ishda shakllanadi: “Bu madaniyatni yaratishimiz kerak. Bu – jarayon. Jarayon esa Cobhamda har kuni mashg‘ulotda boshlanadi. Biz har kuni eng yaxshi bo‘lishimiz kerak, shunda muxlislar oldida maydonga chiqqanimizda tayyor bo‘lamiz. Har kuni o‘zimizga eslatishimiz kerak: jamoa – birinchi o‘rinda.”
Alonso o‘zini ham, o‘z falsafasini ham yashirmaydi: “Men futbolni sevdim va futbol uchun yashadim. Futbol muhitida tug‘ilib, shu yerda ulg‘ayganman – bu mening tomirimda. Buni o‘yinchi sifatida qildim, endi murabbiy sifatida qilayapman. Jamoaga, futbolchilarga o‘sha o‘yinga bo‘lgan ishtiyoqni, raqobatga bo‘lgan ochlikni yuqtirmoqchiman. Qayerga bormaylik, yutishimiz mumkinligini his qilishni istayman. Buni o‘yinchi bo‘lib his qilganman, endi chekkada turib ham bundan zavq olyapman.”
So‘ng u bir fikrni alohida ajratdi: “Struktura zo‘r, lekin unga jon kerak. Maqsad kerak. Sifatli ish, yaxshi energiya, ijobiy kayfiyat kerak.”
“Futbol g‘oyasi” atrofida quriladigan jamoa
2026 yildagi qulashi ortidan Chelsea rahbariyati o‘z strategiyasini o‘zgartirishga va’da bergan edi. Bu jarayon Xabi Alonso tayinlanishi bilan yangi bosqichga o‘tgandek.
Eng diqqatga sazovor nuqta – uning “manager” sifatida e’lon qilinishi. So‘nggi yillarda ko‘plab klublar “head coach” modeliga o‘tib, transfer va strukturaviy qarorlarni direktorlar qo‘liga topshirgan edi. Chelsea ham aynan shunday tizim bilan tanilgan.
Endi esa Alonso klub vizyonini belgilashda sezilarli ta’sir kuchiga ega bo‘lishi kutilmoqda. U buni o‘zi “futbol g‘oyasi” deb atadi.
“Jamoa va tarkib potensiali meni juda hayajonga soldi,” deydi u. “Men ishlash uchun tayyor bo‘lgan, futbol g‘oyasini yaratish mumkin bo‘lgan tarkibni topdim. Stadionga hayajon olib keladigan, muxlislar biz qilayotgan ishni chin dildan yoqtiradigan jamoa qurmoqchimiz.”
Endi savol bitta: Cobhamdagi bu talabchan, prinsipial va qat’iy ovoz Stamford Bridge tribunalarini yana sovrinlarga ishonadigan darajaga qaytara oladimi?
