Watford sardori Pollock: Birlikda muvaffaqiyatga erishish zarur
Watford uchun yoz umid bilan boshlangan edi. Southampton ustidan ilk turdagi ishonchli g‘alaba, yangi bosh murabbiy Alessio Dionisi, yangicha energiya. Ammo avgust oxiriga kelib, bu kayfiyat o‘rnini xavotir egalladi: jamoa barcha musobaqalarda besh o‘yindir g‘alaba nimaligini unutdi, Championship jadvalida esa 18-o‘rakka tushib ketdi.
West Brom bilan safardagi so‘nggi mag‘lubiyat – navbatdagi og‘riqli zarba. O‘yin tig‘iz kechdi, hisob minimal farq bilan hal bo‘ldi, lekin natija baribir bir xil: ochkosiz qaytish. Vicarage Road atrofida kayfiyat og‘irlashgan, savollar ko‘paygan.
Shu fon’da sardor Mattie Pollock ochiqchasiga gapirdi. U BBC Three Counties Radio’ga bergan intervyusida jamoaning ichki holati va oldinda turgan sinovlar haqida to‘xtaldi.
“Biz jamoa sifatida birga bo‘lishimiz kerak,” – dedi u. – “Oxirgi ikki safar o‘yinida yetarlicha darajada o‘ynay olmadik. Endi uyda hammasini to‘g‘rilashimiz, o‘z muxlislarimiz oldida ishni joyiga qo‘yishimiz kerak.”
Ikki uy o‘yini – erta ogohlantiruvchi sinov
Endi Watford’ni qisqa muddat ichida mavsum taqdiriga jiddiy ta’sir ko‘rsatishi mumkin bo‘lgan ikki uchrashuv kutib turibdi. Seshanba kuni Vicarage Road’da Preston, shanba kuni esa Stoke City keladi. Pollock bu bellashuvlarni qisqa va aniq tarifladi: “Bu ikkita ulkan o‘yin.”
Klubning hozirgi holatida bu so‘zlar bo‘rttirish emas. To‘rt liga uchrashuvida ikki durang va ikki mag‘lubiyat – Southampton ustidan ilk turdagi g‘alabadan keyingi tushkun statistik manzara. Yana bir og‘riqli eslatma – o‘tgan oy EFL Cup doirasida Peterborough’dan 5:1 hisobidagi yirik mag‘lubiyat. U o‘yinda tarkib ancha o‘zgargan bo‘lsa-da, natija baribir ko‘p narsani aytib turibdi: ishonch zaiflashgan, ritm yo‘qolgan.
Sardorning mas’uliyati
Pollock iyul oyida jamoa sardori etib tayinlanganida, bu qaror ko‘proq kelajak uchun sarmoya sifatida ko‘rilgandi. Endi esa u zudlik bilan hozirgi inqirozni boshqarishi kerak bo‘lgan futbolchiga aylangan.
“Yigitlar birga bo‘lib qolishi uchun qo‘limdan kelgan hamma ishni qilaman,” – deydi u.
Qisqa, lekin og‘ir jumla. Bu faqat maydondagi pressing yoki havodagi yutqazilmagan duel emas. Bu kiyinish xonasidagi suhbatlar, tushkun kayfiyatni sindirish, xatolarni bir-biriga yuklamaslik haqida.
Watford oxirgi o‘yinlarda yomon ko‘rinmayapti, lekin eng muhim bo‘g‘in – yakuniy zarba va sovuqqonlik yetishmayapti. Pollock ham aynan shunga urg‘u beradi: “Hafta oxirida yetarli darajada o‘ynay olmadik, lekin agar biz gol ura boshlasak va o‘yinlarni yuta boshlasak, mavsum baribir hayajonli bo‘lishi mumkin.”
Gol va g‘alaba – yo‘nalishni o‘zgartiruvchi kalit
Hozircha Watford uchun gap murakkab tizimlar yoki uzoq muddatli rejalar haqida emas. Gap oddiy: darvozani ishg‘ol qilish va uch ochko olish haqida. Bitta ishongan g‘alaba – ayniqsa to‘la tribunalar qarshisida – jamoaning ruhiyatini keskin o‘zgartirishi, bosimni yumshatishi, Dionisi qo‘l ostidagi loyihaga bo‘lgan ishonchni qayta yoqishi mumkin.
Preston va Stoke City bilan ketma-ket uy uchrashuvlari shunchaki “navbatdagi ikki tur” emas. Bu Vicarage Road tribunalari va kiyinish xonasi uchun erta sinov. Watford bu bosim ostida bukiladimi yoki aynan mana shu bosim uni uyg‘otadimi?
