Warren Zaire-Emery: Terma Jamodagi Muammolar va Marokashga Qarshi O'yin
Fransiya lagerida jimlik yo‘q. Jamoa Filadelfiyada Paragvay ustidan olingan mashaqqatli 1:0 hisobidagi g‘alabadan so‘ng Marokashga qarshi chorak final oldidan tayyorgarlik ko‘rayotgan bir paytda, eng keskin savollar maydondagi o‘yindan ko‘ra zaxira o‘rindig‘ida qolmoqda.
Gap Warren Zaire-Emery haqida ketmoqda.
Parijdan yulduz, terma jamoda soyada
20 yoshli yarim himoyachi bu turnirga katta umidlar bilan kelgan edi. Ikki yil ketma-ket Champions League yutgan, yulduzlarga to‘la PSG safida u o‘tgan mavsumda 54 ta o‘yin o‘tkazdi, Luis Enrique uchun deyarli almashtirib bo‘lmas futbolchiga aylandi. Markazda ham, o‘ng qanot himoyasida ham o‘ynadi, murabbiy uni ishonch bilan har yerga qo‘ydi.
Parijdagi bu maqom, Parc des Princes dagi bu ishonch fonida, terma jamoadagi roli esa keskin qarama-qarshi manzarani eslatadi. Fransiya beshta o‘yin o‘tkazdi. Zaire-Emery esa hanuz bir daqiqa ham maydonga tushgani yo‘q.
Get French Football News xabariga ko‘ra, u turnirdagi bu chetlanishdan tobora ko‘proq norozi bo‘lib bormoqda. U o‘zini “hayratda” va “qiynalayotganini” his qilayotgani aytiladi. Bunday mavsumdan so‘ng, bunday darajadagi klubdagi rolidan keyin, tanlovdan butunlay tashqarida qolish unga og‘ir botayotgani aniq.
Luis Enrique ishonchi va Deschamps tanlovi
Klubida unga bo‘lgan munosabat boshqacha. Luis Enrique fevral oyida uni ochiqchasiga maqtagan, uni “ajoyib futbolchi” deb atagan, uning har qanday pozitsiyada o‘ynash qobiliyatini alohida ta’kidlagan. Ispan murabbiy uchun u murakkab taktik rejalarni amalga oshirishda tayanch figuraga aylangan.
Terma jamoada esa boshqa manzara. Didier Deschamps markazni Manu Kone va Adrien Rabiot juftligiga topshirgan, ayniqsa Aurelien Tchouameni jarohat sabab yo‘qligida ham shu chiziqni buzmagan. Hujum chizig‘ida esa boshqa PSG futbolchilari – Bradley Barcola, Desire Doue va Ousmane Dembele muntazam maydonga tushib, o‘zlarini ko‘rsatib kelmoqda.
Zaire-Emery esa shu tarkib ichida “ortiqcha odam” bo‘lib qolayotgandek. Ayniqsa, Paragvayga qarshi jismonan og‘ir kechgan uchrashuvda ham uni zaxiradan ham tushirmaslik, ichidagi yakkalanish tuyg‘usini yanada kuchaytirgani aytilmoqda.
Chorak final oldidan ochiq savol
Vaziyatni yanada achchiqroq qilayotgan jihat – Tchouameni atrofidagi xavotirlar. Real Madrid yarim himoyachisi son mushagi bilan bog‘liq muammo sabab Paragvayga qarshi o‘yinni o‘tkazib yubordi, chorak finalda ham ishtiroki so‘roq ostida turibdi.
Shunday pallada ko‘pchilikning miyasiga keladigan birinchi nom – Zaire-Emery. Ammo Deschamps yana Kone–Rabiot juftligiga tayanishni tanladi. Bu qaror, xabarlarga ko‘ra, yosh futbolchini o‘z o‘rnini, terma jamoadagi ierarxiyadagi haqiqiy maqomini jiddiy o‘ylab ko‘rishga majbur qilgan.
Shunga qaramay, lagerda ochiq isyon kayfiyati yo‘q. Zaire-Emery o‘z noroziligini murabbiylar shtabiga bevosita yetkazish imkoniga ega bo‘lgani aytiladi, lekin gap jamoa ichki muvozanatini buzadigan darajadagi keskinlik haqida emas. U o‘z fikrini bildirgan, Deschamps va uning shtabi esa chorak final arafasida barcha variantlarni ko‘zdan kechirayotgan bir paytda bu signallarni qabul qilib turibdi.
Marokashga qarshi o‘yin – burilish nuqtasi bo‘ladimi?
Endi hammasi tashqi omillarga bog‘lanib qolayotgandek. Tchouameni sog‘ligi borasidagi savollar kuchayib borar ekan, Zaire-Emery tayyor turibdi. U uchun bu turnir nihoyat boshlanishi mumkin bo‘lgan lahza yaqinlashmoqda.
Fransiya Marokashga qarshi maydonga tushganida, ko‘zlar faqat asosiy o‘n birlikdagilarga emas, zaxira o‘rindig‘idagi bir yigitga ham qadaladi. Parijda butun mavsum davomida javob bergan savol endi terma jamoda ham paydo bo‘lmoqda:
bunday formadagi, bunday yetuklikdagi futbolchini yana qancha vaqt ushlab turish mumkin?
