Sydney Sweeney reklamasiga Sophie Cunninghamning munosabati
Sophie Cunningham hayron emas. Faqat xafa.
WNBA vakili o‘zining “No Hesitation” podkastining 17-sentabr, payshanba kungi sonida Sydney Sweeney atrofidagi navbatdagi reklama mojarosiga o‘z munosabatini bildirdi. So‘nggi kunlarda telefoniga yomg‘irdek yog‘ilgan xabarlar, “DM”lar va izohlar unga bitta savolni tiqib qo‘ydi: Novig sport tikish ilovasi uchun tushirilgan yangi rolik haqida nima deb o‘ylaydi?
Sweeney reklamasiga yana bo‘ron
American Eagle jinsi reklamasi tufayli allaqachon tanqid ostida qolgan Sydney Sweeney bu safar Novig kampaniyasi bilan yana markazda. Rolikda “Euphoria” yulduzi deyarli yalang‘och, tanasini faqat sport anjomlari — ikki futbol to‘pi va basketbol savati — yopib turadi.
Bu tasvir sportchilar orasida keskin reaksiya tug‘dirdi. Badiiy gimnastikachi Gracie Kramer, yuguruvchi Mary McCarthy va boshqa ko‘plab sportchilar reklama g‘oyasini ochiq qoraladi.
Cunningham esa bunday reklama kelishini kutganini yashirmadi.
“Shuncha fikrim bor, lekin avvaliga bitta savol: u umuman sportga tikish o‘ynaydimi o‘zi? Bu juda nohaqiqiy, sun’iy ko‘rinadi, tushunyapsizmi?” — dedi u. “Brendni qanday ko‘rsatganidan hayron bo‘ldimmi? Yo‘q. U butun karerasini shunga qurib kelgan.”
So‘zlari keskin, ohangi esa mutlaqo dushmanona emas.
“Va meni noto‘g‘ri tushunmang, u menga yoqadi. Hamma biladi, u chiroyli, u jozibali. U aniq mening ko‘kragimga ega… Shuning uchun men uni yoqtiraman. U o‘z yo‘lidan qaytmaydi, o‘z ishini qiladi, o‘zi bo‘lib qoladi, bunga hurmatim bor,” — deya qo‘shimcha qildi Cunningham.
“Bu uning ishi, lekin reklama menga yoqmadi”
Indiana Fever himoyachisi baribir aynan shu rolikni ma’qullamasligini ochiq aytdi. Suhbatdosh hamkor Drew Hanlen bilan gaplashar ekan, u “uncha yoqmaydi” deb ta’kidladi va yana bir bor “hayron emasligini” eslatdi — chunki Sweeney aynan shunday obraz bilan tanilgan.
“Lekin nega qizlar jahli chiqyapti? Bu axir u qiladigan narsa-ku. Nega umuman kimdir xafa? Bu qimor reklama. Erkaklar, sport, deyarli yalang‘och ayollar — albatta, bu e’tibor tortadi,” — dedi Cunningham. “Rozimanmi? Axloqan biroz g‘alati deb o‘ylayman, lekin har kim o‘z yo‘lida. O‘zingni qilaver, opa.”
U shu bir-ikki jumla bilan reklama, axloq va bozor qonunlarini bir chiziqqa jamladi: unga yoqmaydi, lekin taqiqlashni ham istamaydi.
“Reklama sportchi ayollarga qarshi emas”
Shunga qaramay, Cunningham bu bahs ichidan ijobiy tomonni ham ko‘ra oldi. Uning fikricha, aynan shu mojaro kuchli, haqiqiy sportchi ayollarning ko‘rinishini yana ham balandroq ko‘rsatdi.
“Men hozir kuchli, qudratli, yosh qizlarga haqiqiy sportchi qanday ko‘rinishini ko‘rsatayotgan qizlarni ko‘rib, rosa xursandman,” — dedi u.
Cunningham reklama ayol sportchilarga qarshi qaratilgan degan fikrga qo‘shilmaydi.
“Menimcha, bu rolik sportdagi ayollarga qarshi chiqqan emas. Lekin shunaqa qizlarni ko‘rish juda zo‘r: ular muskulli, sonlari bir-biriga tegadi, yelkalar keng, o‘rtacha qizdan, balki o‘rtacha o‘g‘ildan ham balandroq bo‘lishi mumkin. Lekin bilasizmi, shu narsa o‘zi haqiqat. Kuchingni qabul qilishing kerak,” — deya ta’kidladi u.
Cunningham Sweeney obrazini sportchi ayollar obrazi bilan aralashtirmaslik kerakligini aytadi. Uningcha, reklama birinchi ko‘rishda haqoratli tuyulishi mumkin, lekin ularning mehnatini bevosita mensimaydi.
“Bu (Sweeney reklama roligi) ayollarni biroz tushirib qo‘ygandek tuyilishi mumkin, chunki biz bu yerda ozgina hurmat topish uchun juda ko‘p ishladik. Lekin keyin yaxshilab o‘ylab qarasang, ‘Bo‘ldi, qo‘y, u qiz o‘z ishini qilsin’ deysan. Biz hamon o‘z ishimizni qilaveramiz, buning bizga aloqasi yo‘q,” — deya yakunladi Cunningham.
Sport maydonida esa savol ochiq qoladi: reklama bozori hamon yalang‘och tanani sotadimi yoki nihoyat kuchli, terga botgan, g‘alaba uchun kurashayotgan tanani ham xuddi shunday qadrlaydigan payt keladimi?
