Southampton darvozabonlari: Ramsdale uchun yangi haqiqat
Southampton bosh murabbiyi Tonda Eckert Aaron Ramsdale klubdagi o‘rni keskin o‘zgarganiga qaramay, u hali ham jamoa uchun “muhim figura” bo‘lib qolayotganini ta’kidladi. Bir paytlar Angliya terma jamoasi va Chempionlar ligasi darvozasini himoya qilgan posbon endi Saints safida to‘rtinchi raqamli darvozabon.
28 yoshli Ramsdale 2024-yil yozida Arsenal safidan Southampton’ga kelgandi. O‘shanda u London klubida ispan darvozabon David Raya ortida ikkinchi tanlov edi. Saints bilan o‘tgan 2024-25 yilgi mavsumda u Premer-ligada 30 o‘yin o‘tkazdi, ammo bu ham klubni quyi ligaga tushib ketishdan qutqara olmadi.
Keyingi bosqich – Newcastle’dagi ijaraviy davr. Eddie Howe qo‘l ostida u 23 uchrashuvda maydonga tushdi va o‘zini yana yuqori saviyada ko‘rsatdi. Ammo yozda u yana Southampton’ga qaytdi. Klub esa hanuz ikkinchi pog‘onada, o‘tgan mavsumdagi “Spygate” mojarosi tufayli pley-off finalidan chetlatilgan holatda.
To‘rtinchi raqam, lekin hali ham “ichkarida”
Bu mavsum Ramsdale asosiy jamoa bilan emas, Southampton U-21 tarkibi bilan o‘ynamoqda. Eng qiziq tomoni – bu uning o‘zi so‘ragan qaror. Transfer oynasi yopilgunga qadar boshqa klub topa olmagach, endi u kamida yanvargacha St Mary’sda qolishi kutilmoqda.
Eckertning so‘zlariga ko‘ra, vaziyat boshidan ochiq-oydin bo‘lgan.
“Rambo’ning klubdagi hikoyasi men kelishimdan oldin boshlangan, – dedi u BBC Radio Solent’ga. – Biz pre-sezonning ilk kunidan transfer oynasining so‘nggi kunigacha halol suhbatlashdik va u hanuz guruhning bir qismi.”
Murabbiy Ramsdale uchun ro‘l aniq belgilanganini aytadi: jamoani qo‘llab-quvvatlash, mashg‘ulotlar ritmini ushlab turish, ichkarida raqobatni sog‘lom saqlash.
“U bunga juda professional yondashmoqda. Keling, keyin nima bo‘lishini ko‘ramiz. Aaron bir necha kun oldin ikkinchi marta ota bo‘ldi, mening kutganim – u Southampton futbolchisi bo‘lib qoladi”, – deya qo‘shimcha qildi Eckert.
Peretz – birinchi raqam, Long – zaxirada, Jones qaytdi
Darvoza chizig‘ida esa tartib qat’iy. Birinchi tanlov – Daniel Peretz. Klub uni o‘tgan mavsumdagi muvaffaqiyatli ijaradan so‘ng yozda butunlay sotib oldi. Taxminan 6 million funt atrofida to‘langan summa va ikkinchi davradagi ishonchli o‘yinlar murabbiy qarorini mustahkamladi.
“Men va klub Danielni birinchi raqam sifatida tanlaganmiz va bu qaror o‘zgar maydi, – dedi Eckert. – O‘tgan mavsumdagi ajoyib o‘yinlari uchun u bunga loyiq.”
Ikkinchi raqam – George Long. U ham murabbiy ishonchini saqlab qolgan.
“Mening Longy’ga bo‘lgan ishonchim ham kuchida. O‘tgan mavsum bu guruh juda yaxshi ishladi”, – deydi Eckert.
Transfer oynasining so‘nggi kunida 37 yoshli Jamie Jones ham klubga qaytdi. U asosan mashg‘ulot darvozaboni sifatida ko‘rilmoqda, lekin tajribasi butun darvozabonlar chizig‘i uchun tayanch bo‘lib xizmat qiladi.
Ramsdale kelajagi: sabr, raqobat va yangi burilish kutuvi
Shu tariqa, Ramsdale hozircha navbat kutayotgan, lekin eshikni yopmagan darvozabon. U-21 uchrashuvlarida o‘ynash – bu ortga chekinish emas, o‘z formasini saqlash, yanvarda yoki undan keyin paydo bo‘lishi mumkin bo‘lgan imkoniyatga tayyor turish yo‘li.
Southampton esa yo‘lini aniq belgilagan: Peretzga to‘liq ishonch, Longga mustahkam zaxira roli, Jones bilan tajriba va mashg‘ulot sifati. Bu tizimda Ramsdale hozircha chetda, ammo butunlay tashqarida emas.
Savol bitta: kelasi oyning, kelasi transfer oynasining yoki keyingi mavsumning burilish nuqtasida u yana asosiy sahnaga qayta oladimi?
