Real Madriddagi eng katta muammo: Ego
“Real Madrid”ning sobiq himoyachisi Rafa Alkorta nazarida Madridda bugun eng murakkab masala taktika ham, texnika ham emas. Eng og‘ir raqib — ego.
U buni yashirmadi: Mbappe kelganidan beri asosiy to‘siq shaxsiyatlar to‘qnashuvi bo‘lib qolganini aytdi. Uning so‘zlariga ko‘ra, “Real Madrid” kiyinish xonasida kimdir kimdan ustun bo‘lishga urinayotgan paytda, maydondagi tabiiy uyg‘unlik shakllanmayapti.
Mbappe bir mavsumda 50 ta gol uradi. Bu raqamlar bahsni yopib qo‘yadi. Lekin Alkorta uchun masala boshqa joyda: bu gollar Vinicius bilan birga ishlayotgan jamoaviy mexanizmga aylanyaptimi yoki yo‘q?
Mourinho, Mbappe va Vinicius: uchburchakning eng nozik tomoni
Alkorta aynan shu nuqtada Jose Mourinho nomini tilga oldi. Uning fikricha, agar kimdir Mbappe va Viniciusdan maksimal foyda chiqarishga qodir bo‘lsa, bu aynan Mourinho.
“Mbappe mavsumiga 50 ta gol qiladi, umid qilamanki, Mourinho ikkalasini ham birga yaxshi o‘ynatib yubora oladi. Agar Vinicius qolsa, Mourinho undan avvalgi murabbiylar ololmagan narsalarni talab qiladi. U allaqachon o‘z talablarini aniq qilib qo‘ygan bo‘lsa ajab emas”, — deydi Alkorta.
Bu gaplar bejiz emas. Yaqinda Vinicius vakillari klub rahbariyati bilan uchrashib, 26 yoshli futbolchining 2027-yilda tugaydigan shartnomasini uzaytirish bo‘yicha muzokaralarni davom ettirdi. Tomonlar hozircha ehtiyotkor ijobiy kayfiyatda — pozitsiyalar biroz yaqinlashgan, lekin yakuniy nuqta qo‘yilgani yo‘q.
Alkorta bu jarayonni iliq kutib oldi. Uningcha, tribunadagi muxlislar ham aynan shuni istaydi: “U shartnomasini uzaytirishga yaqin turgani fanlarni xursand qiladi. Mourinho Mbappe–Vinicius juftligidan Xabi Alonso ham, [Alvaro] Arbeloa ham qila olmagan ishni qilishga urinmoqda. Ular to‘p bilan juda kam kimyo ko‘rsatishdi, to‘psiz esa umuman yo‘q. Menimcha, Viniciusning so‘nggi ikki yili yaxshi o‘tmadi”.
Keskin baho. Lekin so‘nggi mavsumlarda Viniciusning o‘yini atrofida paydo bo‘lgan savollarni inobatga olsak, asossiz emas. Bir paytlar jamoaning asosiy energiya manbai bo‘lgan braziliyalik endi Mbappe soyasida o‘z rolini qaytadan topishi kerak.
Kimyo qayerda? Mbappe–Vinicius juftligi hali ham savol ostida
Alkorta tilga olgan asosiy og‘riqli nuqta — kimyo. Kaftdagidek ravshan: Mbappe va Vinicius individual darajada o‘yin taqdirini bir lahzada hal qila oladi. Ammo juftlik sifatida ular hali “Real Madrid” muxlislari kutgan darajadagi sheriklikni ko‘rsatmadi.
“To‘p bilan juda oz, to‘psiz umuman kimyo yo‘q”, — deya ta’kidlaydi Alkorta.
Bu futbol tilida shuni anglatadi: pressingda hamkorlik yo‘q, qarshi hujumlarda yugurish yo‘nalishlari mos emas, qaror qabul qilishda bir-birini o‘qish darajasi past. Yulduzlar yonma-yon, lekin birga emas.
Mourinho uchun bu — asosiy sinov. U tarixan yirik ego bilan ishlashni biladigan murabbiy sifatida tanilgan. Lekin bu safar u oldida nafaqat ikkita superyulduz, balki jahon futbolining hozirgi avlodi ramziga aylangan ikkita figura turibdi. Ulardan birini yo‘qotish — sport jihatdan ham, imidj nuqtai nazaridan ham zarba bo‘lishi mumkin. Ikkalasini birga yurgizish esa chempionliklar olib kelishi mumkin.
Yozgi tayyorgarlik: kimyo sinov maydoni
“Real Madrid” endi yangi mavsumga tayyorgarlikni davom ettiradi. Ya’ni nazariya tugadi, amaliyot boshlanadi.
Shanba kuni “Ferencvaros”ga qarshi o‘rtoqlik uchrashuvi kutib turibdi. Oradan to‘rt kun o‘tib esa raqib — “Deportivo La Coruna”. Bu uchrashuvlar qog‘ozda oddiy tayyorgarlik o‘yinlari bo‘lib ko‘rinishi mumkin, lekin Mourinho uchun ular laboratoriya vazifasini bajaradi.
Aynan shu maydonlarda Mbappe va Vinicius o‘rtasidagi masofa qisqaradimi yoki yo‘q — shuni ko‘ramiz. Qaysi biri markazga ko‘proq kiradi, kim chiziqda qoladi, kim pressingni boshlab beradi, kim orqaga qaytadi — bularning barchasi yozgi o‘yinlarda sinovdan o‘tadi.
Keyin esa haqiqiy sahna ochiladi.
Liga starti: bahona tugaydigan sana
2026/27-yilgi mavsum “Real Madrid” uchun safarda boshlanadi. 22-avgust kuni jamoa “Espanyol”ga qarshi RCDE Stadium maydoniga tushadi. O‘sha kungacha “bu faqat o‘rtoqlik o‘yini edi” degan gaplar o‘z kuchini yo‘qotadi.
O‘sha kuni natija ham, o‘yin ham hisobga olinadi. Mbappe va Vinicius juftligi ham xuddi shunday baholanadi: ular nihoyat bir-birini topdimi yoki yo‘q?
Alkorta tanqidiga qaramay, klub ichida Vinicius bilan shartnomani uzaytirish bo‘yicha ehtiyotkor ijobiylik bor. Mourinho esa allaqachon talablar ro‘yxatini stolga qo‘ygan.
Endi savol bitta: “Real Madrid” kiyinish xonasidagi ego devori qulaydimi yoki yangi davr yana shu yerda, shu nuqtada to‘xtab qoladimi?
