Pol Espargaro Misano uchun Tech3 KTM tarkibida
Pol Espargaro yana safda: Misano uchun Tech3 KTM tarkibida
Britaniya va Aragon Gran-prilarida ishtirok etgan Pol Espargaro kelasi haftadagi San-Marino Gran-prisida ham Tech3 KTM tarkibidan start oladi. U bu safar Maverick Vinales o‘rnini egallaydi.
Vinales uchun esa og‘ir davr davom etmoqda. O‘tgan yili Sachsenringdagi saralash bosqichida chap yelkasidan olgan jarohati hanuz tinch qo‘ymadi. Qaytish jarayoni bir ko‘tarilib, bir pasayib, butun mavsumni ostin-ustin qilib yubordi.
2026-yil boshida u bir nechta poygani o‘tkazib yuborishga majbur bo‘ldi. 1-aprelda shifokorlar jarohatlangan joydan vintni olib tashlash bo‘yicha operatsiya o‘tkazishdi – aynan shu detal muammoning manbai, degan taxmin bor edi. Ammo pichoq ostiga yotish ham kutilgan sakrashni bermadi.
Barselonadagi may o‘rtalaridagi qaytish – natijalar tom ma’noda umidlarni oqlamadi. Tezlik yetishmadi, barqarorlik yo‘qoldi, Vinalesdan kutilgan daraja hatto yaqiniga ham kelmadi.
Yozgi tanaffusdan so‘ng u “eski” formasiga qaytishi mumkin degan umid bor edi. Ammo Vinalesni trekdan chetda ushlab turgan narsa endi faqat yelka emas. Uning shaxsiy holati, sog‘lig‘i va KTM/Tech3 bilan shartnoma borasidagi keskin mojaro uni butunlay chalg‘itib qo‘ydi. O‘tgan oy Motorsport.com xabariga ko‘ra, KTM mavsumning qolgan qismi uchun Vinales bilan umuman yo‘l ajratish rejasini ishga tushirgani ma’lum bo‘lgandi.
Shu fon ortida Pol Espargaroning qaytishi Tech3 uchun ham, KTM uchun ham mantiqiy vaqtda keldi. Jamoa direktori Nicolas Goyon buni ochiq aytdi:
“Bizning asosiy vazifamiz hanuz Maverickning sog‘ayishini qo‘llab-quvvatlash bo‘lib qolmoqda, lekin Misano uchun Polning qaytganidan xursandmiz, – deydi Goyon. – Pol jamoani juda yaxshi biladi va bu mavsumdagi ikki so‘nggi ishtirokida o‘zining professionalligi va fidoyiligini allaqachon ko‘rsatdi. MotoGP ga qaytish hech qachon oson emas, lekin u katta tajriba olib keladi va San-Marinoda yana birga ishlashni intiqlik bilan kutyapmiz. Maverickga esa yanada muvaffaqiyatli tiklanish tilaymiz va tayyor bo‘lganida uni yana ko‘rishni istaymiz”.
Espargaro bu ishonchni bekorga qozongan emas. Silverstone’da u 13-o‘rinni egallab, uch ochko olib ketdi. Aragon’da esa 16-bo‘lib marraga yetib keldi – protokolda uncha balqimagan bo‘lishi mumkin, lekin uning vazifasi faqat natija emas.
U hozir KTM’ning yangi 850cc prototipini rivojlantirish markazida turibdi. Har bir aylana, har bir tormozlanish, har bir chiqish – kelajakdagi raqobatbardosh paket uchun ma’lumot. Misano ana shu loyihaning navbatdagi sinov maydoniga aylanadi.
Vinales qayerdadir tiklanish yo‘lida kurashayotgan bir paytda, Tech3 uchun hozirgi savol oddiy: Pol Espargaro tajribasi va texnik sezgirligi KTM’ning yangi davrini tezlashtira oladimi yoki bu mavsum ular uchun faqat og‘ir o‘tish davri sifatida esda qoladimi?
