Perry Ng Singapore terma jamoasiga yaqinlashmoqda
Cardiff City himoyachisi Perry Ng o‘z orzusiga – Singapore terma jamoasi libosini kiyishga – tobora yaqinlashmoqda.
Singapure sari uzoq yo‘l
Liverpoolda tug‘ilgan, ammo otasining otasi orqali Singapore fuqaroligiga da’vo qila oladigan 30 yoshli futbolchi bu niyatini yillar davomida yashirmagan. U uchun bu shunchaki yangi sahifa emas, balki xalqaro futbol sahnasida o‘z izini qoldirish imkoniyati.
Mart oyida Ng Singapore doimiy rezidenti maqomini qo‘lga kiritdi. Shundan so‘ng u Foreign Sports Talent Scheme orqali fuqarolik uchun rasmiy ariza topshirdi. Hujjatlar, talablar, mezonlar – hammasi bir-biriga chirmashib ketgan murakkab jarayon. Ng avvalroq bu borada ochiq gapirgan, fuqarolik yo‘lida duch kelgan chalkashliklar uni charchatganini tan olgan.
Endi esa ohang boshqacha.
“Menimcha, biz yaqinlashyapmiz”, – deydi Ng. – “Sentabrda borishim, pasport mezonlari uchun yana bir nechta turli ishlarni bajarishim kerak bo‘ladi, lekin umid qilamanki, hammasi endi unchalik uzoq emas”.
Yozgi tanaffusda u butun bir oyini Singapore’da o‘tkazdi. Bo‘lajak vatani, ehtimol kelajakda himoya qiladigan bayrog‘i ostidagi shahar-ko‘chalarini ichdan his qilish uchun yetarlicha vaqt.
“Bu yozda bir oy Singapore’da bo‘ldim”, – deya qo‘shimcha qiladi Ng. – “Juda ko‘p tadbirlarda qatnashdim, oilam bilan vaqt o‘tkazdim, turli jamoat tadbirlarida bo‘ldim. Ajoyib edi”.
U uchun bu sayohat nafaqat dam olish, balki kelajakdagi terma jamoa hayotiga birinchi qadam, ruhiy tayyorgarlik bo‘ldi.
Cardiffdagi barqarorlik va Brian Barry-Murphy omili
Klub darajasida esa Ng’ning yo‘li ancha ravonlashdi. O‘tgan mavsumda u PFA League One yil ramziy jamoasiga kiritildi. Bu – Cardiff City qaytgan Championship yo‘lida hal qiluvchi bo‘g‘inlardan biri bo‘lganining e’tirofi.
Cardiffdagi yillar esa tinch bo‘lmadi. Ng boshidan qancha murabbiy o‘tkazganini o‘zi ham aniq sanay olmaydi.
“Endi sanog‘ini yo‘qotganman. O‘ylaymanki, 11 yoki 12 nafar murabbiy bo‘lgan”, – deydi u.
Shu fon’da Brian Barry-Murphy kelishi Ng uchun burilish nuqtasiga aylandi. U bu murabbiyni ancha vaqtdan beri kutgandek gapiradi.
“Brian kabi murabbiyni kutib kelayotgan edim. Endi o‘ylayman: nega ketishim kerak? Men asosan Brian bilan ishlashni davom ettirmoqchiman. U ligadagi eng yaxshi murabbiylardan biri deb o‘ylayman va u albatta yorqin kelajakka ega bo‘ladi”.
Ng’ni eng ko‘p o‘ziga rom qilgani – murabbiyning o‘yinga qarashi.
“U futbolni ko‘rish tarzi, bizdan qanday o‘yin talab qilishi, maydonda ham, undan tashqarida ham detallarni qay darajada ko‘rib bera olishi – bularning barchasi Cardiffdagi vaqtimda ba’zan yetishmay kelgan narsalar edi. Har kuni u bilan ishlash – rohat”.
Ng Cardiff bilan 2028 yilgacha shartnoma ostida. Klub uni nafaqat asosiy o‘yinchi, balki kiyinish xonasidagi ovoz, maydondagi tayanch sifatida ko‘radi. Brian Barry-Murphy ham bunga urg‘u beradi.
U Ng’ni “juda muhim” futbolchi sifatida ta’riflagan va endi undan yanada katta mas’uliyat kutayotganini yashirmagan.
“Biz endi undan yetakchilik rolini yanada to‘liqroq o‘z zimmasiga olishini kutyapmiz. U bu ishni juda yaxshi qilib kelmoqda va o‘zini yanada rivojlantirishi kerak, chunki u biz uchun juda muhim o‘yinchi”, – deydi murabbiy.
Barry-Murphy yana bir jihatni alohida ta’kidlaydi: Ng – “ritm futbolchisi”.
“Perry ritm futbolchisi. U o‘z ritmini topib, ko‘proq o‘yin o‘ynay boshlasa, juda tez rivojlanadi. Biz undan shuni xohlaymiz”.
Ikki front, bitta ambitsiya
Bir tomonda – Cardiff bilan Championshipda o‘z so‘zini aytish, murabbiy ishonchini yanada oqlash va yetakchilik rolini to‘liq qabul qilish. Ikkinchi tomonda – Singapore pasporti, Lions safida ilk xalqaro daqiqalar, yangi madhiyani ilk bor maydon chetida tinglash ehtimoli.
Ng hozircha ikkala yo‘lda ham sabr bilan harakat qilmoqda. Cardiffda u allaqachon o‘z o‘rnini topdi. Endi savol boshqa: Singapore terma jamoasi formasini kiyishi uchun qancha vaqt kerak bo‘ladi – oylar, yoki bir necha o‘yinlik masofa xolosmi?
