Orlando Gill: Michael Carrick uchun yangi imkoniyat

Michael Carrick uchun bozor sovg‘asi? Orlando Gill atrofidagi shov-shuv kuchaymoqda

2026-yilgi Jahon chempionati ko‘plab yulduzlarni sahnaga olib chiqdi, lekin darvozabonlar ichida bir ism alohida ajralib turdi. Paraguay posboni Orlando Gill. Endi esa u Yevropa grandlari radarida, xususan, darvozabon qidirayotgan Michael Carrick jamoasi uchun kutilmagan imkoniyatga aylanib bormoqda.

Jahon chempionatida tug‘ilgan yulduz

26 yoshli Gill Qatar va AQShdagi ko‘rgazmali turnirda emas, balki 2026-yilgi mundialda haqiqiy sensatsiyaga aylandi. U Paraguay safida Germaniya va Fransiyaga qarshi ketma-ket pley-off o‘yinlarida "Matchning eng yaxshi futbolchisi" sifatida e’tirof etildi.

Germaniyaga qarshi bahsda u nafaqat darvozasini qutqardi, balki tarix yozdi. Penaltilar seriyasida Kai Havertz va Nick Woltemade zarbalarini qaytarib, "Die Mannschaft"ni musobaqadan chiqarib yubordi va o‘z mamlakatini 1/8 finalga olib chiqdi. Bu haqiqiy "Dovud va Jalut" hikoyasi bo‘ldi. Paraguay muxlislari uchun esa – yangi qahramonning tug‘ilishi.

Fransiyaga qarshi o‘yinda ham u charchamadi, yana bir bor sahnaga chiqdi, yana bir bor o‘z nomini mundial yulduzlari qatoriga yozdirdi. Shundan keyin Gillni faqat vatandoshlarigina emas, skautlar ham diqqat bilan kuzata boshladi.

Yevropaning qiziqishi va San Lorenzo inqirozi

Gill hozirda Argentina klubi San Lorenzo darvozasini qo‘riqlamoqda. Klub esa moliyaviy bo‘hron ichida. Mahalliy nashrlar, xususan Clarin, qarz miqdori qariyb 100 milliard Argentina pesosi atrofida ekanini, bu esa taxminan 50 million funtga tengligini yozmoqda.

Shunday vaziyatda Jahon chempionatidagi bunday yorqin chiqish klub uchun ham nafas olish imkoniyatiga o‘xshaydi. Gill transferi San Lorenzo uchun moliyaviy qutqaruv chizig‘iga aylanishi mumkin.

Statistika ham uning foydasiga ishlamoqda: 59 o‘yinda 29 ta "quruq" o‘yin. Bu raqamlar darvozabonning barqarorligini, nafaqat qisqa muddatli turnirda, balki butun mavsum davomida ishonchli o‘yin ko‘rsata olishini ko‘rsatib turibdi. Murabbiy Nestor Gorosito esa allaqachon darvozadagi ehtimoliy o‘rinbosarlar haqida o‘ylay boshlagani aytilmoqda. Bu klub ichida ham Gillning ketishi real ssenariy sifatida qabul qilinayotganini ko‘rsatadi.

Manchester United va "arzon" imkoniyat

Angliyada esa boshqa hisob-kitoblar qilinmoqda. Uch nafar darvozabon yozda klubni tark etishi kutilayotgan Manchester United yangi raqobatchi izlamoqda. Ular Senne Lammens uchun bosim yaratadigan, darhol asosiy tarkibga da’vogarlik qila oladigan posbon qidiryapti.

Shu fon’da Orlando Gill nomi alohida ko‘rinib turibdi. Manchester United, Aston Villa va Ipswich Town uning holatini yaqindan kuzatayotgani haqida xabarlar ko‘paydi. Bozor sharoitida esa bitta detal alohida qiziqish uyg‘otmoqda: Clarin ma’lumotiga ko‘ra, Gill shartnomasidagi tovon puli atigi 5,2 million funt atrofida.

Agar Jahon chempionatidagi hukmron o‘yinlari Angliya Premer-ligasida ham takrorlansa, bunday narx orqaga qaralganda haqiqiy o‘lja sifatida eslanishi mumkin. Darvozabon bozorida bu miqdor bugun deyarli xavf-xatarsiz sarmoya sifatida ko‘riladi.

Gillning o‘zi nima deydi?

Bunday shov-shuv fonida Gill o‘zi esa yerda mustahkam turishga urinmoqda. Paraguayga Jahon chempionatidan qaytgach, u kelajagi haqida ochiq gapirdi, lekin keskin qarorlar yoki baland va’dalardan qochdi.

"Ha yoki yo‘q deb ayta olmayman. Menga qiziqish borligini aytishdi, lekin rasmiy taklif yo‘q", — dedi u. "O‘zimni his-tuyg‘ularga berishni xohlamayman. Klub bilan o‘tirib gaplashamiz, qaysi variant eng yaxshi ekanini ko‘ramiz."

Gill shartnomasidagi bandni ham eslatib o‘tdi: "Shartnomamda band bor va u hurmat qilinishi kerak deb o‘ylayman, keyin hammasi klubga bog‘liq. Agar ikki tomon uchun ham yaxshi bo‘lsa, kelishuvga erishamiz."

Bu so‘zlar ortida ikkita aniq haqiqat yashirin. Birinchisi – futbolchi o‘z kelajagini Yevropada tasavvur qilishi tabiiy, ayniqsa, mundialdan keyin. Ikkinchisi – San Lorenzo bu imkoniyatni moliyaviy jihatdan qo‘ldan boy berishni istamaydi.

Savol ochiq: kim birinchi zarba beradi?

Bozor endi qiziyapti. Darvozabonlar bozorida sifatli, nisbatan arzon, mundialda chiniqqan 26 yoshli posbon – kamyob tovar. Manchester United uchun bu raqobatni boy berish xavfli bo‘lishi mumkin, ayniqsa, darvozabon chizig‘ida qayta qurish zarurati tug‘ilgan pallada.

Gill esa hozircha kutyapti. San Lorenzo qaror pishiryapti. Yevropa klublari esa hisob-kitob qilmoqda.

Savol bitta: birinchi bo‘lib kim stolga rasmiy taklif qo‘yadi?