Neymar statistiklarni yengdi: Klementning Jahon chempionati prognozlari
Neymar maydondan ketgach ham raqiblarini tinch qo‘yadiganlardan emas. Bu safar u himoyachilarni emas, raqamlar va ehtimollarga ishongan nemis iqtisodchisi Joachim Klementni “dribling” qildi.
Braziliyaning javobi: maydonda – g‘alaba, tarmoqda – hazil
2026-yilgi Jahon chempionatida Braziliyaning Yaponiya ustidan 2:1 hisobidagi g‘alabasi oddiygina 1/16 final bosqichiga chiqish emasdi. Bu Klementning navbatdagi xato prognoziga aylangan lahza bo‘ldi.
Klement avvalroq o‘zining mashhur statistik modeli asosida Yaponiyaning aynan shu bosqichda Braziliyani turnirdan chiqarib yuborishini bashorat qilgandi. Tarixiy sensatsiya kutilgan, ammo sodir bo‘lmadi. “Seleção” bosimni ko‘tardi, o‘yinni o‘z qo‘liga oldi va keyingi bosqichga chiqdi.
Shundan ko‘p o‘tmay Neymar X ijtimoiy tarmog‘ida o‘ziga xos zarbani yo‘lladi. U iqtisodchiga bevosita murojaat qilib yozdi:
“Mr. Joachim Klement… please try again at the next World Cup 😉”
Qisqa, kinoyali va juda aniq. Maydondagi hisob – 2:1, tarmoqdagi hisob – yana Neymarning foydasiga.
Marokash zarbasi: model yana yiqildi
Klement uchun bu bitta xato emas edi. U o‘z hisob-kitoblarida turnir g‘olibi sifatida Niderlandiyani ko‘rsatgan, ularning chempionlikka borishiga ishonch bildirgandi. Ammo pley-offda Marokash niderlandlar ustidan sensatsion g‘alaba qozonib, yana bir prognozni chil-parchin qildi.
Shu payt Neymar yana sahnaga chiqdi. Yana X, yana qisqa xabar, bu safar yanada keskinroq ohangda:
“Wrong again 😂😂😂😂”
Braziliyalik yulduz bu ikki post bilan nafaqat raqib himoyachilarni, balki sovuqqon statistik modellarni ham “aylantirib o‘tdi”.
Klement modeli: uchta to‘g‘ri, keyin – qulashi
Joachim Klement so‘nggi yillarda futbol olamida o‘ziga xos fenomenga aylangandi. U ishlab chiqqan statistik prognozlash modeli 2014-yilda Germaniya, 2018-yilda Fransiya va 2022-yilda Argentina chempion bo‘lishini oldindan to‘g‘ri aytib, katta e’tibor qozongan.
Uchta Jahon chempionati ketma-ket to‘g‘ri topilgach, uning navbatdagi hisob-kitoblari atrofida shov-shuv bo‘lishi tabiiy edi. Ammo pley-off bosqichida ketma-ket kutilmagan natijalar modelni titratib yubordi. Yaponiyaning Braziliyani chiqarib yuborishi haqidagi ssenariy amalga oshmadi, Niderlandiyaning chempionlik yo‘li esa Marokash devoriga urilib to‘xtadi.
Shu fon’da Neymar hazili yanada achchiqroq eshitildi. Statistikalar, ehtimollar, murakkab formulalar – hammasi bir chekkada, maydonda esa hanuz futbolchilar qaror qiladi.
Savol esa endi bitta: bu Jahon chempionatida yana nechta “aniq” prognozlar Neymar va uning jamoadoshlari tomonidan bekor qilinadi?
