Mykhailo Mudryk qaytadi: diskvalifikatsiya bekor qilindi

Stamford Bridge bu yozda allaqachon yangidan-yangi yuzlar, katta shartnomalar va tubdan o‘zgarishlarga ko‘nikib bo‘ldi. Lekin klub atrofidagi eng so‘nggi xabar na yangi transfer, na kutilmagan kelishuv haqida. Bu safar gap eski tanish ism haqida ketmoqda. Ikki yilga yaqin maydondan chetlatilgan Mykhailo Mudryk nihoyat qaytishga ruxsat oldi.

Ukrainalik vinger uchun kutish nihoyasiga yetdi. Endi u yana o‘ng qanot bo‘ylab uchib o‘tishi, Stamford Bridge tribunalarini oyoqqa turg‘azishi mumkin.

Diskvalifikatsiya bekor qilindi: WADA qoidalari Mudryk taqdirini o‘zgartirdi

Juma kuni Angliya Futbol Assotsiatsiyasi Mudrykka 2024-yil dekabrida qo‘yilgan diskvalifikatsiyani bekor qilganini e’lon qildi. Bunga Jahon antidoping agentligi – WADA ko‘rsatmalaridagi o‘zgarishlar sabab bo‘ldi. Qoidalar yangilandi, natijada ukrainalik futbolchi qaytishga to‘liq yo‘l ochib oldi.

FA 30-iyul, payshanba kuni kelishuvdan so‘ng rasmiy bayonot chiqardi. Unda Mykhailo Mudrykning antidoping qoidabuzarligini tan olgani, diskvalifikatsiya davrini qabul qilgani qayd etilgan. Shartlar bajarildi, ish yopildi, futbolchi esa o‘ynash huquqini qayta qo‘lga kiritdi.

Mudryk 25 yoshda. U so‘nggi marta rasmiy uchrashuvga 2024-yil noyabrining oxirida tushgan. 2023-yilda Shakhtar Donetsk safidan kelganida Chelsea uni katta umidlar bilan, ma’lum ma’noda tavakkal qilib sotib olgandi. O‘sha tavakkal dastlab o‘zini oqlayotgandek ko‘ringan: 2023/24-yilgi mavsumda u 5 ta gol urdi, 2 ta golli uzatma berdi va asta-sekin jamoaning hujumdagi asosiy qurollaridan biriga aylanayotgan edi.

Keyin esa hammasi to‘satdan to‘xtadi. 2024/25-yilgi mavsumdan atigi yettita o‘yin o‘tkazganidan so‘ng doping testi sabab diskvalifikatsiya e’lon qilindi. Ikki yilga yaqin vaqt davomida u faqat mashg‘ulotlar, apellyatsiyalar va noaniq kelajak haqida o‘ylab yashadi.

Endi esa eshiklar yana ochildi.

Chelsea bayonoti: og‘ir davr, achchiq haqiqat va kechikkan adolat

Chelsea ham rasmiy bayonot bilan chiqdi. Klub so‘zini birinchi navbatda insoniy tomondan boshladi: bu davr Mudryk uchun ham professional, ham shaxsiy jihatdan nihoyatda og‘ir kechgani ta’kidlandi. London klubi futbolchini butun jarayon davomida qo‘llab-quvvatlaganini, shu bilan birga antidoping tizimi va huquqiy jarayonning daxlsizligini hurmat qilganini yozdi.

Eng alamli nuqta esa boshqa yerda. Klub ochiq aytmoqda: agar Mudryk ikki yil avval topshirgan namunasi bugungi texnik me’yorlar bo‘yicha tahlil qilinganda, u umuman ijobiy natija sifatida qayd etilmasdi. Demak, na qoidabuzarlik, na diskvalifikatsiya bo‘lardi.

Bu faqat rasmiy jumla emas, futbolchi va klub uchun achchiq haqiqat. Ikki yil yo‘qotilgan vaqt. Eng yaxshi yosh davri, ritm, ishonch, taraqqiyot – hammasi to‘xtab qolgandek bo‘ldi. Endi esa qoidalar o‘zgardi, qaror qayta ko‘rib chiqildi, biroq yo‘qolgan mavsumlar qaytmaydi.

Shu bois bu qaytish oddiy “diskvalifikatsiya tugadi” degan xabar emas. Bu, ma’lum ma’noda, kechikkan adolat. Va ayni paytda yangi bosqich boshlanishi.

Yangi Chelsea, eski tanish: Xabi Alonso qo‘l ostida yangi rol?

Mudryk qaytadigan Chelsea, u tark etgan Chelsea emas. Klub o‘tgan mavsumni charchagan, beqaror va ichki bosim ostida yakunladi. Enzo Maresca yanvar oyidayoq klubni tark etdi, keyin esa “o‘z odamimiz” deb ishonilgan Liam Rosenior loyihasi ham muvaffaqiyatsizlikka uchradi.

Endi chiziq yonida boshqa figura turibdi – Xabi Alonso. Taktik jihatdan jasur, zamonaviy pressingni yoqtiradigan, to‘pni tez aylantirishni talab qiladigan murabbiy. Unga mos keladigan vingerlar – tez, keskin, birga-birda raqibni yenga oladigan futbolchilar.

Bu aynan Mudryk portreti emasmi?

Albatta, ikki yillik tanaffusdan keyin darhol eski portlashni kutish mantiqsiz. Futbol ritmi, ishonch, o‘yin amaliyoti vaqt bilan qaytadi. Lekin Alonso qo‘lida ukrainalik vinger uchun imkoniyatlar yetarlicha: yuqori chiziqda erkin harakat, bo‘sh zonalar, qarshi hujumlar, tezkor o‘tishlar. Ayniqsa, yangi tarkib va yangilanayotgan tizim fonida o‘zini qaytadan isbotlash uchun bu juda qulay lahza.

Savol endi shunday: Mudryk bu imkoniyatni qanday qarshi oladi? Ikki yillik tanaffusdan keyin u mental jihatdan qay darajada tayyor? Stamford Bridge uni yana qahramon sifatida qabul qiladimi yoki avvaliga shubha bilan qaraydimi?

Javoblar tez orada maydonda beriladi. Diskvalifikatsiya tugadi. Endi so‘z – to‘pda.