Mourinhoning Valdebebasdagi birinchi sinovlari: kim omon qoladi?
Real Madridda mavsumoldi mashg‘ulotlar allaqachon qizib ketgan, Valdebebasda esa yangi davr boshlandi. José Mourinho bu hafta ilk bor maydonga tushdi – qo‘l ostida esa to‘liq emas, bo‘lak-bo‘lak tarkib.
Jahon chempionatida to‘p surgan yulduzlar hanuz ta’tilda, charchoqni chiqarib, jarohatlarni davolab yuribdi. Turnirda qatnashmaganlar esa 13-iyul, dushanba kuni allaqachon bazaga qaytib, og‘ir yuklama ostidagi mashg‘ulotlarni boshladi. Qolganlar esa bosqichma-bosqich jamoga qo‘shiladi.
Klub futboli yana sahnaga qaytar ekan, Madrid yulduzlari uchun bitta haqiqat bor: o‘zini ko‘rsatish vaqti keldi. Mourinhoga sobiq futbolchi Sami Khedira ham kirgan, yangilangan murabbiylar shtabi yordam beradi. Talab esa bitta – maksimal daraja. Oxirgi ikki yil yirik sovg‘alarsiz o‘tganidan so‘ng, portugaliyalik mutaxassis klubda g‘olibona mentalitetni qayta tiklash vazifasini zimmasiga oldi.
Bu yoz ayniqsa bir nechta futbolchi uchun hal qiluvchi bo‘ladi. Ular yozgi mashg‘ulotlarda o‘z kelajagini himoya qiladi.
Trent Alexander-Arnold: himoyadagi savollar, Mourinhoning ko‘zi ostida
Thomas Tuchel boshchiligidagi Angliya terma jamoasiga Jahon chempionatiga chaqirilmagani katta bahs-munozaralarga sabab bo‘lgan Trent Alexander-Arnold Valdebebasga birinchilardan bo‘lib qaytdi. U allaqachon og‘ir jismoniy tayyorgarlik bosqichini boshlab yubordi.
Madriddagi ilk mavsumi yomon ham emasdi, zo‘r ham emasdi. O‘rtacha. Uning ajoyib paslari, hujumni boshlashdagi mahorati ko‘rinib turdi, lekin himoyadagi kamchiliklar haqidagi savollar hanuz yo‘qolmayapti. Endi esa o‘sha savollarga javob beradigan murabbiy kelgan.
Denzel Dumfriesning kelishi bilan o‘ng qanot himoyasi uchun raqobat keskinlashdi. Mourinhoni esa bir narsaga ishontirish kerak: intizom va himoyaviy tartibga sodiqlik. Portugaliyalik murabbiy bunday masalada murosa qilmaydi. Alexander-Arnold uchun bu mavsumoldi – nafaqat o‘z o‘yinini, balki xarakterini ham isbotlash maydoni.
Dean Huijsen: imkoniyat – jarohatlar va mundial tufayli
Luis de la Fuente boshqa qaror qilmaganida, Dean Huijsen bugun Ispaniya bilan Jahon chempionati finaliga tayyorlanayotgan bo‘lardi. U saralash bosqichida muhim rol o‘ynadi, lekin yakuniy ro‘yxatda o‘rnini Atlético Madrid himoyachisi Marc Pubillga bo‘shatib berdi.
Madridda o‘tgan mavsumda ham Huijsenning o‘yini bir xil emasdi. Ba’zi pallalarda xatolar, bo‘shashishlar ko‘rindi, jamoa hal qiluvchi uchrashuvlarda qiynaldi. Shunga qaramay, unda yuqori darajadagi markaziy himoyachiga xos barcha asosiy sifatlar borligi ayon.
Muammo shundaki, Mourinho orqa chiziqni qayta qurmoqchi. Ibrahima Konaté, Marc Cucurella va Dumfries allaqachon kelgan, yana bitta himoyachi transferi kutilmoqda. Tarixan u tajribaga suyanadigan murabbiy, ayniqsa himoyada.
Lekin hozir Huijsenning qo‘lida bitta katta ustunlik bor: Konaté Jahon chempionatida, Éder Militão esa hali jarohatdan to‘liq tiklanmagan. Demak, dastlabki mavsumoldi o‘yinlarida markazda o‘yin amaliyoti, xatoga ham, qahramon bo‘lishga ham imkon beradigan daqiqalar aynan unga tegadi. U bu oynani yopib yuboradimi yoki undan o‘tadimi – shu yoz hal qiladi.
Eduardo Camavinga: yo‘l ajralish nuqtasi
Yana bir kutilmaganda terma jamoadan chetda qolgan futbolchi – Eduardo Camavinga. U allaqachon Valdebebasda, ammo kelajagi atrofida tuman qalin.
Fransiyalik yarim himoyachi so‘nggi mavsumlarda orqaga ketdi, klubdagi roli ham kamaydi. Yozda ketishi mumkinligi haqida gaplar chiqqan, bir nechta ingliz klublari bilan bog‘langan, lekin hozircha aniq taklif yo‘q.
O‘zi Madridda qolishni istayotgani aytilmoqda. Lekin Mourinho tizimida uning aniq o‘rni qayerda? Qaysi pozitsiyada? Bunga javob hali yo‘q. Terma jamoa bilan band bo‘lmaganlar fonida u birinchi bo‘lib yangi murabbiy ko‘z o‘ngida ishlayapti. Bu – imkoniyat. Camavinga yana dinamika, agressiya, pressingdagi shiddatini ko‘rsata olsa, Mourinhoning rejalarida qayta paydo bo‘lishi mumkin. Aks holda, bu yoz uning Madrid hikoyasining so‘nggi bobiga aylanishi ehtimoli katta.
Brahim Díaz: Marokash qahramoni, Madridda esa hali yo‘q
Jahon chempionatida Marokash bilan chorak finalgacha yetib borgan Brahim Díaz mamlakati uchun yetakchi bo‘lib ko‘rindi. Undan maydonda ham, kiyinish xonasida ham ko‘p narsa o‘tdi. Klubda esa manzara boshqacha.
26 yoshli futbolchi Real Madridda tez-tez porlab turadi, lekin barqaror asosiy tarkib o‘yinchisiga aylanmadi. Unga hanuz “epizodik futbolchi” tamg‘asi yopishib turibdi.
Rodrygo Goes ACL jarohatidan tiklanish jarayonida bo‘lgan bir paytda, Díaz uchun eshik ochiq. Mourinhoning sevimli 4-2-3-1 sxemasida o‘ng qanot – bo‘shab turgan, lekin kafolatlanmagan pozitsiya. Bu joyga da’vogarlar ko‘p bo‘ladi, lekin hozircha navbat Díazda.
U Jahon chempionatidan 9-iyul kuni xayrlashdi, shuning uchun avval biroz dam oladi, kuch yig‘adi. Keyin esa – to‘g‘ri Valdebebasga. Mourinhoga o‘zini ko‘rsatish uchun u katta sahnani kutmaydi. Mavsumoldi o‘yinlarining o‘zi kifoya bo‘lishi mumkin.
Arda Güler: iste’dod bor, Mourinho tizimida esa bo‘sh joymi?
Arda Güler Jahon chempionatida maydonga tushdi, lekin Türkiya guruh bosqichidayoq safdan chiqqani uchun u Valdebebasga tezroq qaytishi kutilmoqda. Bu esa unga raqobatchilariga nisbatan bir necha qo‘shimcha kun beradi.
Mamlakatida u – mutlaq yulduz. Madridda esa hali yo‘lini topayotgandek. Endi esa murabbiy almashdi, talablar ham o‘zgardi. Savol ko‘p.
Mourinho uchun 21 yoshli o‘yinchi qayerda foydaliroq? Ikki tayanchli yarim himoya juftligida jismonan bardosh bera oladimi? Yoki qanotda ishlash uchun yetarlicha tezlik va “motor” bormi? “10” raqam ostidagi rolga kelsak, bu yerda Jude Bellingham deyarli “qulf” qo‘yib bo‘lgandek. Bernardo Silva transferi esa vaziyatni yanada murakkablashtiradi – u tipik “Mourinhocha” futbolchi, tajribali, taktik jihatdan pishiq.
Shunga qaramay, SPORT nashri xabariga ko‘ra, Mourinho Türkiyaning turnirdan chiqib ketganidan keyin Gülerga qo‘ng‘iroq qilib, unga bo‘lgan ishonchini bildirgan. Bu telefon qo‘ng‘irog‘i – katta ishonch va’dasi emas, lekin aniq signal: Arda yozda o‘zini ko‘rsatish imkoniyatiga ega bo‘ladi. Qolganini esa faqat o‘zi hal qiladi.
Endrick: “avlod iste’dodi”mi yoki navbatdagi bosim qurbonimi?
Endrick atrofidagi bahslar tinmaydi. Kimdir uni “avlod iste’dodi” deydi, boshqalar esa hazil-huzul bilan yondashadi. Fikrlar har hafta o‘zgaradi. Bitta narsa aniq: u befarq qoldirmaydi.
Braziliya terma jamoasining Jahon chempionati ro‘yxatiga kirishi – Lyon safida yarim mavsumda qayd etgan statistikasining natijasi: 24 uchrashuvda 16 gollik ishtirok. Shunga qaramay, Carlo Ancelotti uni Madridda deyarli ishlatmadi. Bu esa Braziliyada ham kulgi, ham norozilik uyg‘otdi.
Endrick atigi 19 yoshda. Shunga qaramay, ayrim xabarlarga ko‘ra, klub uni bu mavsum yana ijaraga berishni rejalashtirmayapti. Demak, savol boshqa: u Real Madrid tizimiga qanday moslashadi?
Bu yerda kalit – Mourinhoning fikri. Portugaliyalik murabbiy uni o‘z loyihasining markaziga qo‘yayaptimi yoki uni hali tayyor emas, deb biladimi? Javobni mavsumoldi o‘yinlar beradi. Endrick uchun bu yoz – murabbiy bilan munosabatni noldan boshlash, Ancelotti davridagi ishonchsizlikni unutdirish imkoniyati.
Valdebebasda Mourinhoning ilk haftalari boshlanib bo‘ldi. Endi savol bitta: shu oltita futbolchidan qaysilari yangi davrning asosiy qahramoniga aylanadi, qaysilari esa Madriddagi kelajagini boshqa manzilda izlashga majbur bo‘ladi?
