Mourinho davri boshlanmoqda: Real Madrid o‘zgarishi

O‘tgan mavsumni yirik sovg‘alarsiz yakunlagan, “Clásico”da mag‘lub bo‘lib, “Barcelona”dan sakkiz ochko ortda qolgan “Real Madrid” endi tanib bo‘lmas darajada o‘zgarmoqda. Birinchi va eng katta o‘zgarish – zaxira o‘rindig‘ida. Álvaro Arbeloa ketdi, uning o‘rnini José Mourinho egalladi. Bu shunchaki murabbiy almashinuvi emas. Bu – butun klubning yo‘nalishi o‘zgarishi.

Yozgi transfer oynasi ham buni tasdiqladi. Marc Cucurella, Bernardo Silva, Ibrahima Konaté, Denzel Dumfries, Carlos Espí va rekord narxga kelgan Yan Diomande. O‘tgan mavsumdagi tarkibdan deyarli hech narsa qolmagandek taassurot uyg‘otadi.

Endi bu jamoa boshqa futbol o‘ynaydi. Va boshqa talablar bilan yashaydi.

4-2-3-1: Mourinho imzosi va Bellingham markazda

Arbeloa davrida “Real Madrid” an’anaviy 4-3-3 sxemasiga yopishib olgan, lekin barqarorlik topa olmagan edi. Mourinho esa allaqachon o‘z yo‘lini tanladi: 4-2-3-1. Ikki tayanch yarim himoyachi, ularning ustida esa erkin Jude Bellingham.

Bu o‘zgarish tasodifiy emas. Klub Diomande uchun 125 million yevrodan ortiq mablag‘ sarfladi. Bunday miqdor qanotdagi oddiy rotatsiya o‘yinchisi uchun emas, butun hujum falsafasini o‘zgartiradigan futbolchi uchun to‘lanadi. Demak, Madrid endi boshqa ritmda o‘ynaydi: tezlik, vertikal futbol, old chiziqda keskinlik.

Mourinho oldidagi birinchi katta sinov esa allaqachon ko‘rinib turibdi: 22-avgust, “Espanyol” maydoni. LaLiga 2026-27 mavsumi uchun Madridning yangi yuzi ilk bor rasmiy o‘yinda ko‘rinadi.

Hujum: o‘ng qanotdagi jumboq – Diomande yoki “soxta” vinger?

Hujum chizig‘idagi uch pozitsiya deyarli muhokamasiz. Kylian Mbappé – markazda, Bellingham – orqasida “o‘nlik” rolida, Vinícius Júnior – chapda, yangi uzoq muddatli shartnoma bilan yanada erkin nafas olmoqda. Bu uchlik Mourinho asosiy rejasining tayanch nuqtalari.

Savol bitta: o‘ng qanot kimga tegishli bo‘ladi?

Mourinho ikkita yo‘lni ko‘rib chiqmoqda. Birinchi yo‘l – sof vinger sifatida Diomande’ni o‘ngga qo‘yish. Bu holda hujum chizig‘i tezlik va keskinlikka to‘ladi. Mbappé markazda, Vinícius chapda, Diomande o‘ngda – raqib himoyachilari uchun tinimsiz bosim va orqaga chekinishga majbur qiladigan uchlik.

Ikkinchi yo‘l esa balansga tayanadi. O‘ng qanotga qo‘shimcha yarim himoyachi xarakteriga ega futbolchi chiqariladi: Bernardo Silva yoki Arda Güler. Bu holda to‘p nazorati oshadi, pressing va kombinatsion o‘yin yanada murakkablashadi. Eng qimmat transfer – Diomande – esa zaxirada qoladi. 19 yoshli futbolchining yangi klubga qanchalik tez moslashishi uning rolini aniqlab beradi.

Silva yoki Güler bilan “Real” o‘yinni nazorat qiladi, tempni boshqaradi. Diomande bilan esa raqibni tezkor hujumlar bilan yirtib tashlashga urinadi.

Yana bir variant – Federico Valverde’ni o‘ng qanotga siljitish. U bu rolda allaqachon o‘ynagan, pressing va yugurish hajmi bilan qanotni yopib bera oladi. Ammo hozircha yangi sardor o‘zining tabiiy pozitsiyasi – markaziy yarim himoyada boshlashi kutilmoqda.

Agar Diomande asosiy tarkibda bo‘lsa, bu Denzel Dumfries uchun ham qulay ssenariy. Kot-d’Ivuar vakilining hujumkor instinktlari ortida ko‘proq himoyaviy yordam talab etiladi, Dumfries esa aynan shu ishni bajarishga mos – yuqoriga chiqib, qaytib kelishga odatlangan, jismonan kuchli, chiziq bo‘ylab ishlaydigan himoyachi.

Yarim himoya: Tchouaméni yonida kim – Silva yoki Valverde?

Mourinho sxemasining yuragi – ikki tayanchli yarim himoya. Bu yerda Aurélién Tchouaméni markaziy figura bo‘lib turibdi. Manchester City yulduzi Rodri transferi amalga oshmay qolgach, fransiyalik futbolchi “Real Madrid”ning yagona toza pozitsion tayanch yarim himoyachisiga aylandi. Demak, u deyarli har o‘yinda maydonda bo‘ladi.

Asosiy savol: uning yonida kim o‘ynaydi?

Murabbiyda bir nechta variant bor: Valverde, Silva, Güler va akademiya tarbiyalanuvchisi Thiago Pitarch. Ularning ichida balans nuqtai nazaridan eng mantiqli tanlov – Valverde. U nafaqat katta masofani bosib o‘tadi, balki pressingda, ikkinchi to‘plarni yutishda, o‘tish fazasida ham jamoaga tayanch bo‘la oladi. Tchouaméni – pozitsion barqarorlik, Valverde – dinamika va bosim. Shunday duet “Real”ga mustahkam markaz beradi.

Lekin hamma o‘yinlar ham ehtiyotkorlikni talab qilmaydi. Ba’zi uchrashuvlarda Madrid to‘pni mutlaq nazorat qilishni istaydi. Ana shunda Bernardo Silva sahnaga chiqadi. Uning orqadan to‘p olib chiqish mahorati, o‘tkir paslari, qaror qabul qilishdagi aniqligi Tchouaméni yonida yanada hujumkor ko‘rinish yaratadi. Bu variantda “Real” raqibni maydonning chuqur qatlamlarida bo‘g‘ishga urinadi.

Uchinchi yo‘l – Arda Güler. Aslida u Bellingham’ning zaxira varianti sifatida “o‘nlik” pozitsiyasiga mo‘ljallangan. Ammo o‘tgan mavsum Xabi Alonso qo‘l ostida u allaqachon chuqurroq markaziy yarim himoyada sinab ko‘rilgan. Agar Mourinho yanada keskin, hujumkor futbol tanlasa, Güler ham asosiy tarkibga kirib kelishi mumkin.

Thiago Pitarch esa kelajagi porloq nomzod sifatida ko‘rilmoqda. Arbeloa davrida u ko‘rsatgan harakatchanlik va chidamlilik Mourinho e’tiboridan chetda qolmadi. Mavsum davomida u ham rotatsiyada o‘z daqiqalarini olishi ehtimoldan xoli emas.

Himoya: Cucurella qanotda, markazda raqobat portlaydi

Orqa chiziq ham sezilarli darajada yangilanadi. Chap qanot endi Marc Cucurella’ga tegishli bo‘lib qolmoqda. U asosiy tanlov, Álvaro Carreras esa uning zaxira varianti sifatida ko‘rilmoqda. Doimiy jarohatlar bilan kurashayotgan Ferland Mendy esa endi ikkinchi, balki uchinchi planga tushib qoladi.

Markazda esa savollar ko‘p. Hozircha Dean Huijsen va Antonio Rüdiger asosiy juftlik sifatida ko‘rinmoqda. Lekin klub Ibrahima Konaté transferiga va Éder Militão’ning to‘liq qaytishiga katta umid bog‘lagan. Ularning qo‘shilishi raqobatni keskinlashtiradi, darajani ko‘taradi. Raúl Asencio esa tabiiy ravishda zaxira pog‘onalariga pastlaydi.

O‘ng qanotda Denzel Dumfries yangi energiya olib kiradi. Agar uning oldida Diomande o‘ynasa, bu chiziq raqiblar uchun haqiqiy sinovga aylanadi: yuqori tezlik, doimiy ortga qaytish, chiziq bo‘ylab yugurishlar, jarima maydoniga keskin uzatmalar. Agar oldida Silva yoki Güler bo‘lsa, Dumfries’ning himoyaviy mas’uliyati ortadi, lekin kombinatsion o‘yin yanada boyiydi.

“Real Madrid” endi o‘tgan mavsumgi beqaror, sovrinsiz jamoa emas. Bu – Mourinho qo‘lida qayta qurilayotgan, katta xarajatlar va yanada katta talablar ostidagi loyiha.

Savol bitta: bu yangi tizim va yangi yulduzlar aralashmasi “Barcelona”ni quvib o‘tishga va Madridni yana eng yirik sovrinlarga qaytarishga yetadimi? Javob esa “Espanyol”ga qarshi ochilish uchrashuvidan boshlab yozila boshlaydi.