Mohamed Salah: Keyingi Manzil Saudiya yoki AQSh?
Mohamed Salah: Anfild afsonasining navbatdagi bekati qaer bo‘ladi?
Misr terma jamoasi bilan jahon chempionatidan erta xayrlashganidan so‘ng, Mohamed Salah hayotidagi eng katta burilish yoqasida turibdi. U endi erkin agent. Liverpool bilan shartnomani bir yil avval bekor qilish bo‘yicha kelishuvga erishildi va Anfilddagi oltin davr rasman yakunlandi.
Endi esa savol bitta: keyingi sahifa qayerda yoziladi?
Ikki yo‘l: Saudiya yoki AQSh
Ma’lumotlarga ko‘ra, Salah variantlarini keskin qisqartirdi. Endi uning stolida atigi ikki jiddiy yo‘nalish qolgan: Saudi Pro League yoki MLS. Yevropadan qiziqish bor, lekin ularning imkoniyatlari tobora so‘nib bormoqda.
Saudiya tomoni yillar davomida aynan shu lahzaga tayyorlandi. Ligada Salahni global brend, butun chempionat yuzini o‘zgartiradigan ramziy figura sifatida ko‘rishadi. Ichki kelishuv darajasidagi dastlabki poydevor allaqachon qo‘yilgani aytilmoqda, ammo asosiy jumboq hanuz ochiq: qaysi klub?
MLS ham chetda turgani yo‘q. AQShdagi loyiha Salahni uzoq vaqtdan beri o‘ziga tortib keladi. Yangi bozor, yangi auditoriya, boshqa turmush tarzi. Karera yakuniga yaqinlashayotgan yulduz uchun bu ham jiddiy sahna.
Geografiya ham qaror qiladi
Bu safar gap faqat pulda emas. Manbaalarga ko‘ra, geografiya Salah qarorida katta rol o‘ynamoqda. U Misrga yaqin bo‘lishni istaydi. Shuning uchun Saudiya g‘arbida joylashgan klublar ustunlikka ega.
Jidda shahri bu borada ideal nuqta sifatida ko‘rilmoqda. Al-Ittihad va Al-Ahli – Salah uchun eng jozibador variantlar qatorida. Qohiraga atigi ikki soatlik parvoz. Oila, do‘stlar, Vatan – hammasi qo‘l uzatsa yetadigan masofada.
Yana bir qiziq nom – Neom Sports Club. Tabukda joylashgan bu klub Misrga yanada yaqin. Bu esa mavsum davomida uyga qatnab turish uchun yanada qulay yo‘lak ochadi. Ambitsiyali loyiha, yangi shahar, yangi brend – Saudiya ichida eng dadil variantlardan biri.
MLS: Florida jaziramasimi yoki Kaliforniya orzusimi?
Atlantika ortida ham sahna tayyor. Salah nomi MLS atrofida bir necha oydan beri aylanmoqda.
Inter Miami, David Beckham boshchiligidagi loyiha, Misrlik yulduzni Florida sohillariga olib kelishni xohlaydi. Biroq yaqinda Casemiro transferi amalga oshgani bu bitimni murakkablashtirib qo‘ydi. Moliyaviy balans, ro‘yxat cheklovlari – hammasi bir vaqtning o‘zida to‘g‘ri kelishi kerak, hozircha esa bu juda og‘ir vazifa bo‘lib turibdi.
Shu fonida San Diego FC sahnaga chiqdi. Ularning taklifi alohida e’tiborga loyiq. Klub egasi – Misrda tug‘ilgan milliarder Sir Mohamed Mansour. Bu detali Salah tomonida iliq qabul qilingani aytilmoqda. Kaliforniyada yashash imkoniyati, iqlim, futbol va biznesning kesishgan nuqtasi – bularning barchasi Salah lageri uchun jiddiy argument.
MLS Salahga nafaqat yangi sportiy chaqiriq, balki brendini boshqa qit’ada yanada kengaytirish maydonini ham beradi. Ayniqsa, karerasining yakuniy bosqichida.
Yevropa sahnasi yopilmoqda
Yevropaning bir qator klublari Salahning bo‘sh agent sifatidagi holatidan foydalanishga urinib ko‘rdi. So‘rovlar, dastlabki aloqalar, ehtimoliy shartlar. Biroq manbalar bu yo‘nalish endi real variant sifatida deyarli qolmaganini ta’kidlashmoqda.
Salah Yevropada hamma narsani isbotlab bo‘ldi. Premier League rekordlari, Chempionlar Ligasi, oltin butsa poygalari, Anfildni hayajonga solgan yillar. Endi esa u boshqa sahnaga chiqishga tayyor ko‘rinadi.
Kutilayotgan ssenariy aniq: keyingi manzil yoki Saudiya Arabistoni, yoki AQSh bo‘ladi. Ikki xil qit’a, ikki xil ritm, ikki xil hayot tarzi. Lekin har ikkisi ham o‘ziga xos darajada jozibali.
Qaror oldidan sukunat
Hozircha Salah shoshilmayapti. Misrning Argentina qo‘lida musobaqadan chiqib ketishi ortidan u va uning vakillari muzokaralarni jadallashtirdi, lekin yakuniy nuqta hali qo‘yilgani yo‘q.
Bu yozgi bozorning eng yirik erkin transferlaridan biri bo‘lishi deyarli aniq. Uni qo‘lga kiritgan liga nafaqat maydonda, balki global sahnada ham katta yutuqqa erishadi.
Savol ochiq qolmoqda: Mohamed Salah navbatdagi golini Jidda issig‘ida uradimi yoki Kaliforniya quyoshi ostida?
