Michail Antonio Watford bilan shartnoma imzoladi

Watford yozgi transfer oynasini baland notada yakunlamoqda. Klub sobiq West Ham United hujumchisi Michail Antonio bilan erkin agent sifatida bir yillik shartnoma imzolaganini e’lon qildi.

36 yoshli forvard uchun bu nafaqat yangi klub, balki og‘ir sinovlardan keyingi qaytish hikoyasi ham.

Avtohalokat, sinib ketgan oyoq va uzoq yo‘l

Antonio oxirgi bor West Ham tarkibida 2024-yil 3-dekabr kuni Leicester Cityga qarshi o‘yinda maydonga tushgan, o‘sha uchrashuvda “Hammers” 1:3 hisobida mag‘lub bo‘lgandi. Oradan to‘rt kun o‘tib, avtohalokat. Singan oyoq. O‘n yillik London davridan keyingi eng og‘ir zarba.

U 2025-yil aprelida Qatarning Al-Sailiya klubi safida atigi to‘rt o‘yin o‘tkazdi, xolos. Keyin esa tanaffus, tiklanish, yana mashg‘ulotlar. Watford bosh murabbiyi Alessio Dionisi jamoasida u bir oy davomida sinov va forma tiklash jarayonidan o‘tdi va nihoyat shartnoma qo‘lga kiritdi.

Jamaika terma jamoasi hujumchisi Watford bilan bir yillik bitim imzoladi. Klub ma’lum qilishicha, kelishuv xalqaro ruxsatnoma tasdiqlanishiga bog‘liq. Agar barcha hujjatlar o‘z vaqtida rasmiylashsa, Antonio shanba kuni Championship doirasidagi Stoke Cityga qarshi o‘yinda zayavkaga kiritilishi mumkin.

“Katta klub”ga katta tajriba

“Watford katta klub va umid qilamanki, kelib jamoaga muvaffaqiyat olib kelishim, qo‘limdan kelganicha yordam berishim mumkin”, – dedi Antonio klub rasmiy saytiga.

Bu so‘zlar shunchaki odatiy ta’rif emas. U iyun oyida West Ham safidan rasman ketdi, klubda o‘tkazgan o‘n yillik davr yakunida erkin agentga aylandi. Shunga qaramay, London jamoasi unga eshikni yopib qo‘ymadi: Antonio reabilitatsiya jarayonida West Ham bazasiga qaytdi, Premier League 2 musobaqasida u-21 jamoasi uchun ikki o‘yinda maydonga tushdi.

Keyin esa yana izlanishlar. O‘tgan yil dekabrida u Leicester City bilan birga mashg‘ulot o‘tkazdi, Brentford bilan kelishuv esa imzo arafasida barbod bo‘ldi: shartnoma imzolanishidan bir kun oldin Antonio boldir mushagini yirtib oldi va bitim bekor qilindi.

Endi esa navbat Vicarage Roadga keldi.

EFL bo‘ylab sayohat va West Hamdagi cho‘qqi

Antonio nomi ko‘pchilikka West Ham orqali tanish bo‘ldi, ammo uning yo‘li ancha oldin, EFL klublarida boshlangan. U Reading, Sheffield Wednesday va Nottingham Forest safida Angliya ligalarida pishib, 2015-yil sentabrida West Hamga o‘tdi va u yerda klubning zamonaviy tarixidagi muhim figuralardan biriga aylandi.

Watford uchun esa bu transfer yozgi “qayta qurish”ning navbatdagi bo‘lagi. Antonio klubning yozgi 12-transferi bo‘ldi. U Vicarage Roadda 18-raqamli libosda o‘ynaydi – raqam ham, ism ham Championship darajasida e’tiborsiz qolmaydi.

Dionisi rejasi va jadval o‘rtasidagi kurash

Alessio Dionisi qo‘l ostida Watford mavsumni notekis, lekin umidli boshladi: olti turda ikki g‘alaba, ikki durang va ikki mag‘lubiyat. Jadvalda 12-o‘rin. O‘rtacha start, lekin yuqoriga sakrash uchun imkon bor.

Shu yerda Antonio sahnaga chiqadi. U nafaqat gol urish qobiliyati, balki tajribasi, kiyinish xonasidagi ovozi bilan ham jamoaga kerak. Championship marafonida bunday futbolchilar ayniqsa qadrli: sovuqqonlik, katta o‘yinlarga odat, bosim ostida to‘g‘ri qaror qabul qilish.

Watford uchun savol endi bitta: Antonio qaytishi bilan bu jamoa barqaror kuchga aylanadimi yoki bu transfer faqatgina katta ism sifatida tarixda qoladimi? Javob esa Vicarage Roaddagi yaqin dam olish kunlarida yuzaga chiqa boshlaydi.