Martinelli atrofidagi sukut Artetaga bosim o'tkazmoqda
Arsenal yangi mavsumni xuddi darslikdagidek boshladi. Emirates kechasida Bukayo Saka, Kai Havertz va Martin Odegaard gollari hisobiga Frank Lampard boshqarayotgan Coventry City ustidan 3:0 hisobida ishonchli g‘alaba, tribunalar xursand, chempionlik himoyasi esa rasmiy tarzda yo‘lga tushdi.
Ammo bu kechaning eng katta hikoyasi maydonda emas, qaydnoma varag‘ida yo‘q edi.
G‘alaba fonida bitta yo‘qotish
Gabriel Martinelli na asosiy tarkibda, na zaxirada. Umuman tarkibdan tashqarida.
Arsenal rahbariyati yozgi transfer oynasi yopilguncha braziliyalik vingerni sotmoqchi bo‘layotgani sir emas. 25 yoshli futbolchining shartnomasi atigi bir yilga mo‘ljallangan, klub esa uni yo‘qotib, hech narsa olmaslikdan ko‘ra, hozir pul ishlashni ma’qul ko‘ryapti.
U allaqachon o‘tgan yakshanba kuni bo‘lib o‘tgan Community Shield bahsida ham Manchester Cityga qarshi o‘yinda zayavkaga kiritilmagandi. Endi esa yana tashqarida. Ikki katta o‘yin, ikki marta qaydnomada yo‘q.
Galatasaray o‘tgan hafta Martinelli uchun 38 million funtlik taklif bilan chiqqani ma’lum, ammo futbolchining o‘zi Turkiya chempionatiga o‘tishni istamasligini bildirgan. Shundan keyin vaziyat yanada chigallashdi: klub sotmoqchi, futbolchi bu variantni xohlamaydi, natijada esa muzdek sukut.
Wright: “Bu meni noqulay ahvolga solyapti”
Arsenal afsonasi Ian Wright esa bu jarayonni tomosha qilib o‘tirishga chidamadi. U Coventryga qarshi o‘yindan keyin Sky Sports efirida ochiq gapirdi.
Uning so‘zlariga ko‘ra, Martinelli hozir o‘z kelajagi borasida mutlaqo “zulmatda” qolgan, klub esa vaziyatni noto‘g‘ri boshqaryapti.
“Martinelli va u hozir qanday munosabat ko‘rayotgani meni juda noqulay ahvolga solyapti”, – dedi Wright. U Martinellining doim 100 foizini berishini, eng zo‘r futbolchi bo‘lmasligi mumkinligini, ammo Arsenal uchun katta lahzalarda sahnaga chiqib, juda muhim gollar urganini eslatdi.
Shundan keyin u ohangini keskinlashtirdi: bu yakuniy bosqichda unga bo‘lgan munosabat, klub uni chiqarib yubormoqchi bo‘lsa ham, boshqacha bo‘lishi kerakligini, bu jarayon futbolchining o‘zi uchun ham hurmatli va tushunarli yo‘l bilan kechishi zarurligini ta’kidladi.
Wrightning gaplariga ko‘ra, Martinelli na zayavkada, na Arteta bilan ochiq suhbatda. U nima bo‘layotganini bilmaydi. Bir yil qolgan shartnoma, lekin aniq reja yo‘q.
Raqobat bo‘lishi mumkin, lekin bu – boshqa narsa
Wright masalaga boshqa tomondan ham qaradi. U yuqori darajadagi raqobatni futbolchining qabul qilishi mumkinligini aytdi.
Agar, deydi u, klub darhol Vinicius Junior kabi darajadagi yulduzni olib kelsa, Martinelli o‘ziga: “Ha, ular Vini va Tzolisni olib keldi, men ehtimol uchinchi tanlovman”, deb ayta olardi. Bu mantiqiy. Yulduz kelgan joyda kimdir ortga chekinadi.
Ammo hozirgi holat boshqacha. Wright Tzolis va boshqa qanotdagi Madueke bilan solishtirar ekan, Martinelli hali ham bu ikki futbolchi bilan raqobat qila olishiga ishonishi tabiiyligini aytdi. U o‘zini butunlay o‘yindan tashqarida emas, kurash ichida ko‘rishi kerak edi.
“U butunlay chetga surilib, hech qaerda ko‘rinmayotgani meni uning o‘zi uchun ham xafa qiladi”, – deya davom etdi u. Wrightning fikricha, Martinelli bu jamoa va bu kiyinish xonasi uchun yetarlicha ish qilgan, hozir esa kamida ko‘proq hurmatga loyiq.
Arteta uchun nozik chiziq
Mikel Arteta uchun bu odatiy transfer qarori emas. U chempionlikni himoya qilayotgan, ichki raqobatni oshirishga majbur bo‘lgan murabbiy. Qarorlar keskin bo‘lishi tabiiy. Lekin kiyinish xonasidagi kayfiyat, ayniqsa, muxlislar sevadigan, mehnatkash futbolchilar bilan munosabat – bu ham strategiyaning bir qismi.
Arsenal hozir maydonda o‘z kuchini yana bir bor namoyish qilmoqda. Lekin savol boshqa joyda: klub Martinelliga bo‘lgan bu munosabati bilan o‘zini qanday ko‘rsatmoqda?
Bu yozda javob topilmasa, keyingi safar Emiratesdagi qarsaklar orasida shubha ham aralashib ketmaydimi?
