Marinakis va Crystal Palace: Suddagi tuhmat da’vosi
Angliyadagi navbatdagi keskin to‘qnashuv bu safar maydonda emas, sud binosida bo‘lib o‘tadi. Nottingham Forest egasi Evangelos Marinakis Crystal Palace klubiga nisbatan tuhmat bo‘yicha da’vo qo‘zg‘atdi. Sabab – o‘tgan mavsum Selhurst Park tribunalarida ochilgan, unda Marinakis qo‘lida qurol bilan Morgan Gibbs-White boshiga nishon olgan holda tasvirlangan banner.
Bu bayroq o‘tgan yil avgustida, Gibbs-White’ning Tottenham’ga kutilgan transferi amalga oshmay, u City Ground’da shartnomasini uzaytirganidan ko‘p o‘tmay paydo bo‘lgandi. Bannerda yunon milliarderining biznes faoliyatiga oid qo‘pol va asossiz da’volar ham aks etgani aytilmoqda.
Marinakis buni shunchaki “ultraslar shou”si deb qabul qilish niyatida emas. O‘tgan hafta u High Court’da rasmiy da’vo arizasini topshirdi.
FA jarimasi – yakun emas, boshlanish
Noyabr oyida o‘tkazilgan FA tekshiruvi ortidan Crystal Palace aybdor deb topilgan va 50 ming funt sterling jarimaga tortilgandi. Ammo Sky Sports News ma’lumotiga ko‘ra, Marinakis bu jazoni yetarli deb hisoblamaydi. Uning fikricha, bu voqea uning obro‘siga “global darajada” zarar yetkazgan va u janubiy London klubini qonun ruxsat bergan eng yuqori darajada javobgarlikka tortishga qat’iy bel bog‘lagan.
Da’vo markazida bitta savol turibdi: Crystal Palace bannerning ochilishiga to‘sqinlik qilish va uni tezda olib tashlash uchun yetarli chorani ko‘rdimi? Marinakis tomonining pozitsiyasi aniq – klub buni qilmagan, demak, javobgarlikdan qochib qutula olmaydi.
FA qoidalariga ko‘ra, klublar o‘z muxlislarining xatti-harakatlari uchun mas’ul. Tribunadagi faoliyat “nojo‘ya, haqoratli, zo‘ravonlikka undovchi yoki provokatsion” bo‘lmasligi shart. Selhurst Parkdagi banner aynan shu chegaralarning qaysi birini buzgan-buzmagani endi futbol maydonidan tashqarida, huquqiy maydonda tahlil qilinadi.
Tuhmat bo‘yicha uch yo‘l va bitta banner
Ingliz huquqida tuhmat bo‘yicha da’vo ko‘tarishning uch asosiy yo‘li bor: yolg‘on bayonotlarni tarqatish, shaxs obro‘siga putur yetkazuvchi tasvirni yaratish yoki shunday tasvirni namoyish etishga yo‘l qo‘yish. Marinakis aynan shu uchinchi yo‘nalish bo‘yicha harakat qilayotgani ko‘rinib turibdi – gap bannerning mazmuni bilan birga, uning omma oldida bemalol osilib turishiga ruxsat berilganida.
U endi sud orqali bitta masalani aniq bilmoqchi: klub banner uchun qanchalik darajada huquqiy javobgar bo‘lishi mumkin?
Crystal Palace bu borada hozircha sukut saqlamoqda – Sky Sports News klubdan izoh so‘ragan, ammo javob olinmagan. Nottingham Forest esa davom etayotgan huquqiy jarayon sababli izoh berishdan bosh tortgan.
Endi navbat sudga. Bu ish tribunadagi bir dona banner chegarasidan ancha uzoqqa borib, Angliya futbolida klublarning muxlislar harakati uchun javobgarligi qanchalik keng talqin qilinishini qayta chizib berishi mumkin.
