Manchester United JJ Gabriel uchun kurashni qizitmoqda
Manchester United yozgi oynani faqat tayyor yulduzlar bilan to‘ldirish bilan cheklanmayapti. Klub ichkarida ham, tashqarida ham hujum chizig‘ini qayta qurayotgan bir paytda, eng katta janglardan biri atigi 15 yoshli JJ Gabriel atrofida kechmoqda.
29 gol urgan 15 yoshli va London soyasidagi xavf
Old Trafford akademiyasida JJ Gabriel nomi allaqachon alohida tilga olinadi. 15 yosh, U18 tarkibida 32 o‘yinda 29 gol. Bu raqamlar Manchester United ichida ham, Angliya bo‘ylab ham skautlarni hushyor torttirib qo‘ydi.
Shu bois ham klub rahbariyati hushyor. London tomondan bosim kuchaymoqda. TEAMtalk ma’lumotiga ko‘ra, Gabrielga bo‘lgan eng jiddiy da’vogarlardan biri — Chelsea. Ular nafaqat Angliya, balki Yevropadagi bir qator grandlar orasida ham eng faol “ovchi” sifatida ko‘rsatilmoqda.
Manchester United esa javobsiz qolmayapti. Klub yosh hujumchini ushlab qolish uchun yangi shartnoma bo‘yicha “kelishuv sari itarib boryapti” va ichkarida kayfiyat ijobiy — bitim yakunlanishiga ishonch katta.
Asosiy burilish esa oktabrda. JJ Gabriel stipendiya shartnomasiga imzo qo‘yish huquqiga ega bo‘ladigan oy. Aynan o‘sha paytda uning kelajagi borasidagi shov-shuv eng yuqori nuqtaga chiqishi kutilmoqda. Manchester United esa bunga tayyor bo‘lishni xohlaydi: klub ichkarisida bu yigit “dunyo futbolidagi eng ko‘p so‘raladigan yosh futbolchilardan biri” sifatida qaralmoqda va uni himoya qilish — ustuvor vazifa.
Rasmiy bayonotlarda xotirjamlik seziladi. Ishonch, barqarorlik, reja borligi aytiladi. Ammo yopiq eshiklar ortida klub Gabrielning Old Trafforddagi keskin o‘sishi uzilmasligi uchun maksimal darajada harakat qilmoqda. Carrick qo‘l ostidagi bu loyiha faqat bugun uchun emas, ertaga ham mo‘ljallangan.
Tresoldi – 50 million yevrolik savol
Yosh iste’dod bilan bog‘liq ichki front qiziyotgan bir paytda, Manchester United tashqi bozorda ham hujum chizig‘ini kuchaytirish yo‘lini izlayapti. Caught Offside xabariga ko‘ra, klub Club Brugge hujumchisi Nicolo Tresoldi uchun qiziqishni sezilarli darajada oshirgan.
Tresoldi nomi hozir ko‘plab skautlar daftarida. U “Manchester United, Chelsea, Tottenham va Barcelona radarida” ekani aytilmoqda. Narx esa — 45–50 million yevro atrofida, ya’ni taxminan 43 million funt.
Barcelona hozircha peshqadam sifatida ko‘rsatilmoqda. Robert Lewandowski bilan xayrlashgan kataloniyaliklar hujum markazida bo‘shliqni tezda to‘ldirishga urinmoqda va Tresoldi transferini “tezlashtirayotgan” bo‘lishi aytiladi. Biroq moliyaviy imkoniyat masalasi ularning yo‘lida asosiy to‘siq bo‘lib turibdi. To‘lov shartlari va umumiy byudjet savollari tufayli La Liga giganti bu poygada qoqilib qolishi hech gap emas.
Shu fon’da Angliya klublari uchun eshik ochiq qolmoqda. Manba ta’kidlaganidek, bozor bu yozda “haddan tashqari shishirilgan narxlar” bilan to‘lgan, Tresoldi esa nisbatan “mantiqiy” summa evaziga olinishi mumkin bo‘lgan hujumchi sifatida qiziqish uyg‘otmoqda. 45–50 million yevro — bugungi sharoitda yuqori, lekin ko‘pchilik so‘ralayotgan summalarga qaraganda ancha real ko‘rinadi.
Carrick rejasi: bugungi gol, ertangi meros
Michael Carrick yozda allaqachon yarim himoyani qayta shakllantirdi. Andrey Santos va Youri Tielemans kelishi bilan markazga yangi nafas kirdi. Endi navbat — chap qanot himoyachisi, yana bitta yarim himoyachi, vinger va, eng muhimi, hujumchi masalasiga kelgan.
Shu nuqtada strategiya yaqqol ko‘rinadi. Bir tomonda — JJ Gabriel kabi ichki iste’dodlar, ular bilan bog‘liq nozik muzokaralar va uzoq muddatli reja. Ikkinchi tomonda — Tresoldi singari tayyor hujumchilar, hozir natija berishi kutilayotgan transferlar.
Manchester United uchun savol aniq: Old Trafford kelajagini qanday qurishadi — akademiya yulduzlarining portlashi orqali yoki bozorning yuqori polkalaridan qimmat hujumchilarni olib? Yoki Carrick ikkala yo‘lni birlashtirib, klubga uzoq yillarga yetadigan hujum falsafasini yaratadimi?
