Madridning yozgi orzusi: Olise transferi va devorlar
Madrid yoz rejasini allaqachon tanlagan. Maqsad aniq: Michael Olise. Yevropaning eng portlovchi qanotlaridan biri, 24 yosh, Bundesligada porlayotgan fransuz. Hujum chizig‘i allaqachon yulduzlarga to‘la bo‘lsa-da, “Real Madrid” ichkarisida bitta fikr tobora kuchayib boryapti – bu futbolchi jamoani yana bir pog‘ona ko‘tarishi mumkin.
Ammo bu gal Madrid odatdagi “galaktiko” shovqinidan yiroq harakat qilyapti. Shoshilish yo‘q, bosim yo‘q, ochiqchasiga aytilgan pozitsiya bor: klub hech qanday “urush”ga kirmaydi. “Mundo Deportivo” xabariga ko‘ra, “Real” allaqachon “Bayern” bilan ochiq muloqot o‘rnatgan va bir narsani va’da qilgan – agar Olise bo‘yicha rasmiy qadam tashlansa, bu haqda birinchi bo‘lib Myunxenga xabar beriladi.
Madrid soyada, kalit esa futbolchining o‘zida
Hozircha esa bu faqat kulis ortidagi hikoya. “Real” stolga rasmiy taklif qo‘yishi uchun bitta narsa o‘zgarishi kerak: tashabbus futbolchining o‘zidan chiqishi lozim. Vaziyatning butun og‘irligi aynan shu nuqtada.
Olise aniq, qat’iy tarzda “Bayern” rahbariyatiga “Santiago Bernabeu”ga ketmoqchi ekanini aytmaguncha, Madrid soyada qoladi. Hech qanday yashirin uchrashuvlar, ortdan “zarba berish” yo‘q. Futbolchining amaldagi shartnomasi va ikki yevropalik gigant o‘rtasidagi muvozanat hurmat qilinmoqda.
Shu bilan birga, “Real Madrid” eshikni butunlay yopib ham qo‘ymagan. Juda kichik bo‘lsa-da, imkoniyat tirqishi ochiq turibdi. Agar Olise va “Bayern” o‘rtasidagi munosabatda sovuqlik paydo bo‘lsa, yoki futbolchining o‘zi Madridga o‘tish istagini ochiq e’lon qilsa, “Real” kutib o‘tirmaydi. Ular zarba berishga tayyor.
200 millionlik to‘siq
Bu transferning eng katta to‘sig‘i esa pul. Juda katta pul. Sobiq “Crystal Palace” yulduziga “Bayern” tomonidan qo‘yilgan narx osmon bilan bellashmoqda. Xabarlarga ko‘ra, myunxenliklar uni shunchaki sotmoqchi emas – hatto 200 million yevroga ham.
Bu raqam “Bernabeu”dagi kabinetlarda sovuqqonlikni kuchaytirdi. Ichkarida tobora kuchayib borayotgan kayfiyat shunday: bu yozda bunday kelishuv deyarli imkonsiz. “Bayern”ning muzdek qat’iyati va futbolchining Myunxendagi ko‘rinib turgan xotirjamligi yo‘lni juda toraytirgan.
Fransiyadagi ayrim manbalar Olise bu g‘oyaga yopiqligini emas, aksincha, Madrid variantini ma’lum darajada o‘ylab ko‘rishga tayyorligini ta’kidlayapti. Ammo Ispaniyada hukmron qarash boshqacha: hozircha vaziyat qotib qolgan, hech narsa siljimagandek.
Myunxen tinch, Madrid sabr bilan
Germaniyada kayfiyat ancha xotirjam. Bu yerda Olise transferni majburan surishga urinmaydi, degan fikr ustun. Shu bois “Bayern” rahbariyatida vahima yo‘q. Ular “Real Madrid” qanday ishlashini yaxshi biladi va ishonch bilan turibdi: ispanlar ortdan zarba bermaydi.
Ikki klub o‘rtasidagi munosabat hozir “mukammal” darajada tasvirlanmoqda. “Bernabeu”da buni juda yaxshi qadrlashadi va bitta transfer uchun bu aloqani xavf ostiga qo‘yish niyati yo‘q. Olise – asosiy maqsad, lekin undan ham kattaroq qadriyat bor: hurmat.
Madridliklar orqadan aylanib o‘tadigan, bosim o‘tkazadigan, jamoa ichini chalg‘itadigan uslublardan butunlay voz kechgan. Shu sabab ham klub sabrni tanlagan. Ehtimol, bu yoz “Real Madrid” uchun Olise bo‘yicha jim o‘tib ketar. Ammo agar bir kuni Myunxendagi kayfiyat o‘zgarsa yoki futbolchining ko‘ngli “Santiago Bernabeu”ga tortib qolsa, hikoya butunlay boshqa ohangda davom etadi.
