Liverpoolning yarim himoyasida o'zgarishlar
“Liverpool” markazida shamol yo‘nalishi o‘zgaryapti. Klub ketma-ket ikkinchi markaziy yarim himoyachisini qo‘yib yuboryapti, lekin o‘rniga yangisini emas, akademiyadan chiqqan o‘smirga ishonch bildirmoqda.
Yarim himoya “qayta tiklanmaydigan” yo‘qotishlarmi?
“Anfield” atrofidagi asosiy savol shu: tayanch zonada kim o‘ynaydi? Hozircha yagona aniq himoyaviy tipdagi variant – yoshi katta yapon futbolchisi Wataru Endo xolos. Ammo murabbiylar shtabi uning Ryan Gravenberch, Dominik Szoboszlai yoki Alexis Mac Allisterdan oldin asosiy tarkibda muntazam boshlashini kutmayapti.
Curtis Jonesning “Inter Milan”ga umumiy qiymati 30 million funt bo‘lgan paket evaziga sotilgani fonida ko‘pchilik “Liverpool”dan klassik tayanch yarim himoyachi olib kelishini kutgandi. Bozor, holat, ehtiyoj – hammasi shunga ishora qilayotgandek edi.
Lekin klub ichkarisidagi qaror boshqacha bo‘lib chiqdi.
Insayder Graeme Bailey ma’lumotiga ko‘ra, “Liverpool” bu yozda markazga yangi futbolchi qo‘shmaydi. O‘rniga klub rahbariyati Trey Nyoni atrofida riskka borishni tanladi. Endi u ichki ierarxiyada to‘rtinchi raqamga ko‘tarildi.
Dominik Szoboszlai, Ryan Gravenberch va Alexis Mac Allister – ikki asosiy o‘rin uchun kurashadigan uchlik. Trey Nyoni – ularning ortidan kelayotgan to‘rtinchi variant. Wataru Endo esa beshinchi raqam sifatida zaxira chuqurligini ta’minlaydi.
“The Athletic” nashrining “Liverpool” bo‘yicha yetakchi jurnalisti James Pearce ham aynan shuni tasdiqladi. Uning yozishicha, yakshanba kungi dramatik 2:2 hisobidagi “Newcastle”ga qarshi o‘yindan keyin jamoa atrofida yarim himoyani kuchaytirish talabi kuchaygan bo‘lsa-da, klub rahbarlari e’tiborni butunlay boshqa chiziqqa qaratgan.
Ularning ichki pozitsiyasi aniq: yozgi reja – qanot hujumini kuchaytirish. Yarim himoyaga yangi odam bo‘lmaydi, Curtis Jones o‘rnini esa aynan Trey Nyoni egallashi kerak. Klub uni bu mavsumda ancha katta rolga tayyor deb hisoblaydi. Hozircha pozitsiya qat’iy: faqat hujum chizig‘i yangilanadi.
Stefan Bajcetic – yana bir chiqish eshigi
Shu fonida yana bir qaror ko‘pchilikni hayron qoldirishi mumkin. “Liverpool” markazni kuchaytirmas ekan, nega yana bir himoyaviy yarim himoyachidan voz kechmoqda?
Gap Stefan Bajcetic haqida ketmoqda. Endo singari u ham tabiatan tayanch zonadagi futbolchi. Biroq Angliyadagi davri jarohatlar bilan yemirildi. 21 yoshli ispaniyalik hali to‘liq ochilishga ulgurmay, ketish yoqasiga kelib qoldi.
Uning shartnomasi so‘nggi yiliga kirgan. Ishonchli jurnalist Matteo Moretto xabariga ko‘ra, Bajcetic sobiq klubi “Celta Vigo”ga to‘liq transfer asosida qaytadi. Klubdan klubga kelishuv allaqachon bor, “Liverpool” esa bu bitimdan katta pul emas, ramziy miqdordagi tovon oladi.
Asosiy foyda boshqa joyda. Merseysaydlilar kelishuvga qayta sotish bandini kiritgan. Agar Bajcetic Ispaniyada o‘zini tiklab, yuqori darajaga qaytsa, keyingi transferidan tushadigan foiz “Liverpool” uchun ancha jiddiy daromad bo‘lishi mumkin.
Fabrizio Romano ma’lumotiga ko‘ra, hozircha faqat bir bo‘lak qolgan: “Celta” va futbolchi o‘rtasida shaxsiy shartlar yakuniy bosqichga kirgan, tomonlar kelishuvga juda yaqin.
Shunday qilib, “Liverpool” markazni qisqartiryapti, lekin bozordan emas, o‘z akademiyasidan yechim qidirmoqda. Bu jasoratmi yoki xavfli o‘yin? Javobni yangi mavsumning o‘zi beradi.
