Liverpool o'ng qanot himoyachisini qidiryapti: Hector Fort kim?
Yozgi bozor oxiriga yaqinlashar ekan, Merseyside’da bir savol tobora balandroq yangrayapti: “Keyngi himoyachi kim bo‘ladi?”
Liverpool allaqachon orqa chizig‘ini yangilashga kirishdi. Rennesdan kelgan Jeremy Jacquet markaziy himoyaga chuqurlik qo‘shdi, Barcelonadan ijaraga olingan Ronald Araujo esa ham markazda, ham o‘ng qanotda yechim sifatida tushirilmoqda. Lekin bu faqat birinchi qatlam, vaqtinchalik yamoq xolos.
O‘ng qanotdagi bosh og‘riq
Klubning haqiqiy og‘riqli nuqtasi – o‘ng qanot himoyasi. Conor Bradley va Jeremie Frimpong jarohatlari bilan mavsum oldidan allaqachon xavotir uyg‘otgan, Araujo esa faqat qisqa muddatli variant. Uzoq yillik hal etuvchi yechim hanuz topilgani yo‘q.
Shu fon’da transfer bozorida turli nomlar aylanmoqda. Ulardan biri – Barcelona tarbiyalanuvchisi Hector Fort. Kataloniya klubi uni yozgi oyning 1-sentabrda yopilishidan oldin qo‘yib yuborishga tayyor ekani haqida xabarlar kuchaygan, bu esa Liverpoolni hushyor turishga majbur qilmoqda.
La Masia bolasi
Hector Fort – o‘ng qanot himoyachisi. U 2006-yil 2-avgust kuni Barselonada tug‘ilgan, futboldagi ilk qadamlari ham shu shaharda qo‘yilgan. Karerasini Anguera jamoasida boshlagan Fort atigi yetti yoshida Barcelonaning mashhur La Masia akademiyasiga qadam qo‘yadi.
Shundan beri u klub tizimini bosqichma-bosqich bosib o‘tdi. 2013-yildan buyon Barcelonaga tegishli bo‘lgan himoyachi akademiyadagi har bir pog‘onani ortda qoldirib, oxir-oqibat asosiy jamoa eshiklarini taqillatdi.
Tezkor ko‘tarilish va og‘ir sinov
2023-yilda Fort uchun burilish nuqtasi keldi. Avvaliga u B jamoada o‘zini ko‘rsatish imkoniyatiga ega bo‘ldi, oradan ko‘p o‘tmay esa asosiy tarkibda debyut qildi. Uning katta sahnadagi ilk o‘yini – Royal Antwerpga qarshi Champions League bahsi.
Shundan so‘ng u barcha musobaqalar bo‘yicha Barcelona safida 30 ta uchrashuvda maydonga tushishga ulgirdi. Bu yosh himoyachi uchun yomon ko‘rsatkich emas, ayniqsa raqobat darajasi yuqori bo‘lgan klubda.
2025/26-yilgi mavsum oldidan esa Fort muntazam o‘yin amaliyoti ortidan Elchega ijaraga jo‘natildi. U yerda 17 ta o‘yinda qatnashdi, lekin bu davr jarohatlar bilan chizilgan, ritmni ushlashga to‘sqinlik qilgan davr bo‘ldi. Shunga qaramay, mavsum yakunida u yana Camp Nouga qaytdi.
Barcelona uchun aktiv, Liverpool uchun imkoniyat
Fort hali ham istiqbolli futbolchi sifatida ko‘riladi, ammo Kataloniyada raqobat shafqatsiz. Shuning uchun yozda Barcelona uni sotish fikriga ochiq turibdi. Shartnomasida uch yil qolgan futbolchi klub uchun jiddiy aktiv, bozor uchun esa qiziqarli nishon.
Bu vaziyatdan foydalanishga urinayotganlar safida Liverpool ham bor. O‘ng qanotdagi muammolar, jarohatlar va Araujo ijarasining qisqa muddatli tabiati fonida klub uzoq muddatga mo‘ljallangan, yosh va o‘sish potensialiga ega himoyachini izlayapti.
Fort shunday profilga to‘g‘ri keladi: La Masia maktabi, yirik sahnani ko‘rgan, Champions League tajribasiga ega, hali 20 yoshda. Savol bitta: Liverpool bu imkoniyatni real transferga aylantira oladimi yoki navbatdagi La Masia iste’dodi boshqa manzilni tanlaydimi?
