Liverpool hujumidagi keskin burilish: Barcola va Gakpo

“Liverpool” bir necha oyki transfer bozori markazida. Yozgi oyning rasmiy ochilishidan ancha oldin ham “Anfield” atrofida gap ko‘p edi: tarkib yangilanadi, eski yulduzlar ketadi, yangi davr boshlanadi, degan kayfiyat hukm surardi.

Ammo oylar o‘tdi, oyning yopilishiga atigi bir oycha qoldi, klub esa o‘rtada qotib qolgandek. Reja bor, boshlangan ish deyarli yo‘q.

Bir tomonda – yangilanishga chanqoq murabbiy shtabi. Ikkinchi tomonda – kelajagi hal bo‘lmagan asosiy futbolchilar. Natijada “Liverpool” hozircha aniq qarorlar emas, savollar jamoasiga o‘xshayapti.

Salah ketgan, o‘ng qanot bo‘sh – ammo ko‘zlar baribir chapda

Hujum chizig‘i bu yozning eng og‘riqli nuqtasi.

Hugo Ekitike kamida yanvargacha safdan chiqqan. Eng og‘iri – Mohamed Salah endi “Trabzonspor” futbolchisi. “Anfield”da yillar davomida o‘ng qanotning hukmdori bo‘lgan misrlik ketdi, uning o‘rnida esa katta bo‘shliq qoldi.

Mantiqan qaraganda, klubning birinchi vazifasi tabiiy o‘ng qanot hujumchi topish bo‘lishi kerak edi. Ammo bozorga qarasangiz, “Liverpool” bilan bog‘langan nomlarning aksariyati chap qanot vakillari.

Zamonaviy futbolda ko‘p pozitsiyada o‘ynash – deyarli majburiy sifat. Shunday bo‘lsa-da, Salahning o‘rnini darhol to‘ldira oladigan, o‘ngda o‘zini uyidagidek his qiladigan futbolchi zarur. Bu esa hali topilgani yo‘q.

Shu fon’da Bradley Barcola nomining paydo bo‘lishi va uning atrofidagi shov-shuvlar Gakpo uchun xavotirli signalga aylandi. “Anfield Sector”ning X’dagi xabariga ko‘ra, agar “Liverpool” Barcola bilan shartnoma imzolasa, u chap qanot uchun olinadi, Salahning bevosita o‘rnini bosish uchun emas.

Eng keskin jumla esa – Barcola kelgudek bo‘lsa, Cody Gakpo reytingda uning ortiga tushib qolishi. Ya’ni, hozirgi asosiy chap qanotchi birdaniga zaxira futbolchisiga aylanadi.

PSG bilan muzokaralar esa oson kechmayapti. Parij klubi rahbariyati 150 million yevrodan yuqori bahoni ushlab turibdi va hozircha yon berish niyatini ko‘rsatgani yo‘q. Shartlar og‘ir, lekin “Liverpool” uchun bu transfer ramziy ahamiyatga ham ega bo‘lishi mumkin.

Gakpo: bir mavsum yulduz, keyingisida – muammo

Gakpo hikoyasi “Liverpool”ning hozirgi holatini juda aniq aks ettiradi.

2024–25 yilgi mavsumda u klubning eng yorqin hujumchilaridan biriga aylandi. Luis Diaz bilan chap qanot uchun kurashdi, ayrim uchrashuvlarda uni ortda qoldirdi, o‘yinlarga keskinlik va gollar olib kirdi. O‘sha payt Gakpo “Anfield” kelajagining muhim bo‘lagi sifatida ko‘rilardi.

Keyingi mavsum boshida esa u chap qanotdagi yagona tabiiy variant bo‘lib qoldi. Bu – ishonch, imkoniyat, liderlik uchun mukammal sharoit edi. Lekin kutilgan sakrash o‘rniga, Gakpo pasayib ketdi.

Uning o‘yini sustlashdi, qaror qabul qilishdagi aniqlik yo‘qoldi, o‘tkirlik kamaydi. Bir paytlar raqib himoyachilarini qiynagan futbolchi endi ko‘pincha sekin, ishonchsiz, xatolarga moyil ko‘rindi. Mavsumning katta qismida u jamoani tortuvchi emas, uni ushlab qolayotgan bo‘g‘inga o‘xshab qoldi.

Shu darajaga yetdiki, tribunalar Rio Ngumoha nomini tobora balandroq talaffuz qila boshladi. Yosh iqtidorni asosiy tarkibda ko‘rishni talab qilgan ovozlar ko‘paydi. Oxir-oqibat Arne Slot bu bosimni inkor eta olmadi va Ngumoha’ga start tarkibida imkon bera boshladi.

Shundan keyin chap qanotga yangi nomlar bilan bog‘liq mish-mishlar ketma-ket paydo bo‘ldi. O‘sha ro‘yxatda eng jiddiy, eng jozibali variant sifatida aynan Barcola ajralib turibdi.

Barcola – nafaqat raqobat, balki darajadagi sakrash

Bradley Barcola faqat “yana bir chap qanotchi” emas. U – hozirgi Gakpo bilan solishtirganda, darajaviy sakrash bo‘lishi mumkin bo‘lgan nom.

O‘tgan mavsumda u barcha musobaqalar bo‘yicha 20 ta gol va golli uzatmaga bevosita hissa qo‘shdi. Bu – raqamlar tilida aniq ustunlik. Lekin faqat statistika emas. Barcola uchlik chizig‘ining barcha pozitsiyalarida o‘ynadi: chapda ham, o‘ngda ham, markazda ham. Bu moslashuvchanlik uni Gakpo’dan ancha foydaliroq variantga aylantiradi.

Gakpo asosan chapda o‘zini qulay his qiladi va o‘sha zonadan chetga chiqqanda samaradorligi keskin tushadi. Barcola esa murabbiy uchun taktik konstruktorda har xil joyga qo‘yiladigan, o‘yinni o‘zgartirib yuborishi mumkin bo‘lgan detalga o‘xshaydi.

Albatta, bu transfer atrofida hamon ko‘plab “agar”lar bor. PSG bahoni tushiradimi? “Liverpool” bu darajadagi sarmoyaga tayyormi? Muzokaralar qanchalik cho‘ziladi?

Ammo bitta narsa aniq: agar klub Gakpo’ni Barcola’ga almashtirish imkoniyatiga ega bo‘lsa, bu faqat chiziqni yangilash emas, balki hujum falsafasini qayta qurish sari tashlangan qat’iy qadam bo‘ladi.

“Anfield”dagi bu yoz aynan shunday qarorga jur’at topadimi yoki limbodagi holat yana bir mavsumga cho‘ziladimi? Savol hozircha ochiq turibdi.