Lionel Scaloni va Argentina terma jamoasining yangi tajribalari
Lionel Scaloni rotatsiya tugagan joyini aniq biladi. Jordan ustidan 3:1 hisobidagi g‘alaba, guruhda birinchi o‘rin allaqachon kafolatlangan paytda, u butun tarkibni aralashtirib yubordi: yulduzlar dam oldi, zaxiradagilar esa maydonga tushdi.
Jordan bilan o‘yindagi tajriba
Kapitan Lionel Messi o‘tirgan, hujum chizig‘iga esa Julian Alvarez olib kirilgan edi. Yon chiziqlarda ham butunlay yangi ko‘rinish: Rodrigo De Paul va Thiago Almada o‘rniga Giovani Lo Celso hamda Giuliano Simeone qanotlarni egalladi.
Markazda Enzo Fernandez va Alexis Mac Allisterga tanaffus berildi, ularning o‘rnini Nico Paz va Leandro Paredes to‘ldirdi. Himoyada esa yana bir tajriba: yarim himoyachi Exequiel Palacios o‘ng qanot himoyasida sinovdan o‘tkazildi, markazda esa Nicolas Otamendi va Marcos Senesi juftligi safda bo‘ldi.
Natija yomon emas – 3:1 va guruh yetakchiligi saqlab qolindi. Lekin bu Scaloni uchun asosan laboratoriya, asosiy sinovlar esa oldinda.
Endi esa “klassik” Argentinaga navbat
Endi murabbiyning o‘zi ham deyarli yashirmayapti: bu uchrashuvga kelib, u yana o‘zining sinovdan o‘tgan yulduzlar tarkibiga qaytadi. Jamoa jahon chempioni maqomida maydonga chiqayotgan bo‘lsa-da, raqibdan qat’i nazar, Scaloni xavfga bormaydigan payt keldi.
Darvozada odatdagidek Emiliano Martinez. U turnir davomida deyarli almashtirilmayapti va bu safar ham qo‘lqopni boshqa hech kimga bermaydi.
O‘ng qanot himoyasiga Nahuel Molina qaytishi kutilmoqda. Chap tomonda Medina o‘z joyini qaytarib oladi. Markazda esa Premier League yulduzlari – Cristian Romero va Lisandro Martinez juftligi yana birga saf tortishi rejalashtirilgan.
Romero atrofida savollar ko‘p edi: u Avstriya bilan o‘yinda tizzasidan jarohat olib, o‘yin o‘rtalarida almashtirilgan, Jordan bilan uchrashuvga esa umuman kiritilmagan edi. Lekin endi u mashg‘ulotlarga qaytgani tasvirlarda ko‘rinib turibdi va bu o‘yinda qaytishi kutilmoqda. Himoya chizig‘i uchun bu – katta yengillik.
Yarim himoya: “dvigatel” yana ishga tushadi
Markazga qaytadigan duet aniq: Mac Allister va Fernandez yana birga “dvigatel bo‘limi”ni boshqaradi. Aynan ular pressing, to‘pni nazorat qilish va hujumni boshlash o‘rtasidagi nozik muvozanatni ushlab turadigan juftlik.
Qanotlarda esa Scaloni yana o‘zining ishonchli variantiga tayanadi: De Paul va Almada. Ular murabbiy uchun nafaqat taktik, balki ruhiy tayanch ham. Shunga qaramay, murabbiy zaxirada kuchli variantlarga ham ega – Nico Gonzalez va Simeone istalgan payt ritmni o‘zgartirish uchun maydonga tashlanishi mumkin. Agar o‘yin tig‘izlashsa, aynan shu ikki ism muhim qurolga aylanishi ehtimoldan xoli emas.
Eng katta savol: Messi yonida kim bo‘ladi?
Hujum chizig‘ida esa hech qanday muhokama yo‘q: Messi maydonda bo‘ladi. Savol boshqa – uning yonida kim o‘ynaydi?
Turnir davomida Scaloni ko‘proq Lautaro Martinezga suyanmoqda. Jordan darvozasiga gol urib, o‘ziga bo‘lgan ishonchni yana oshirib oldi va hozircha Alvarezdan bir qadam oldinda turibdi. Shuning uchun bu uchrashuvda ham asosiy hujumchi sifatida aynan Lautaro start tarkibidan o‘rin olishi kutilmoqda.
Alvarez esa raqib charchagan paytda, bo‘sh zonalar paydo bo‘lgan lahzalarda o‘yinga kirib kelib, ritmni butunlay o‘zgartirib yuborishi mumkin bo‘lgan o‘yinchi sifatida qolmoqda.
Scaloni uchun bu o‘yин – nafaqat navbatdagi bosqichga qadam, balki jahon chempionlarining “asl yuzi”ni yana bir bor eslatib qo‘yish imkoniyati. Savol bitta: to‘liq qurollangan bu Argentina yana raqibni bosib tashlay oladimi?
