LeBron Jamesning kelajagi: qaror hali yo‘q, savollar ko‘paymoqda

NBA atrofidagi butun shovqin bir haftadan beri aynan shu kunga — payshanbaga qadalgan edi. Hammaning daftarchasida sana belgilangan, sarlavhalar tayyor, ijtimoiy tarmoqlar hushyor: LeBron James nihoyat kelajagini e’lon qiladigandek ko‘rinar edi. New Yorkdagi Fanatics Fest, bir nechta intervyular, “Mind the Game” podkasti… sahna tayyor, aktyor — sport tarixidagi eng yirik yulduzlardan biri. Faqat bosh roldagi odam yakuniy sahnani ijro etmadi.

Podkastda mehmon hamkor sifatida o‘tirgan Tyrese Haliburton ham mavzuga aylana bo‘yotgan savolni yashirmadi. U to‘g‘ridan-to‘g‘ri so‘radi. Zalda sukut. LeBron esa jilmaydi.

“Biz bu haqda orqada gaplashib bo‘ldik”, — deya hazil qildi u Haliburtonga qarab. Va shu bilan mavzuni yopdi.

Kutilgan “Men bu klubga ketaman” jumlasi yangramadi. Lekin u mutlaqo hech narsa aytmadi, deyish ham noto‘g‘ri bo‘ladi. James qaror hali e’lon qilinmagan bo‘lsa-da, uning atrofidagi manzara ancha tiniqlashdi.

“Sizlarni uzoq ushlab turmayman”: qaror yaqin

LeBron James 30-iyun kuni rasmiy ravishda Los Angeles Lakers bilan yo‘llarini ajratdi. Sakkiz yil, bir chempionlik, klub tarixiga kiradigan sahnalar — barchasi ortda qoldi. Bu orada liga bo‘ylab erkin agentlik bozorida shiddatli yoz boshlandi: yangi shartnomalar, almashtirishlar, qayta qurilayotgan jamoalar.

Shunday fon ostida hamma bitta savolni o‘ylaydi: LeBron qayerga ketadi va qachon aytadi?

Uning o‘zi payshanba kuni shuni ma’lum qildiki, bu epopeya cho‘zilib ketmaydi.

“Men sizlarni juda uzoq ushlab turmayman”, — dedi u. Bir jumla, lekin juda og‘ir. James qarorni faqat parketdagi imkoniyatlar bilan emas, hayotiy omillar bilan ham o‘lchayotganini ochiq aytdi: yangi jamoasining basketbol salohiyati, shaharning o‘zi, oilaviy qulayliklar — hammasi bir tarozida.

Yo‘nalish bo‘yicha hech qanday ishora yo‘q

Haliburton podkast davomida o‘zining kichik “transfer rejasi”ni ham ishga tushirdi. U LeBronni Indiana Pacers safida ko‘rishni istashini yashirmadi. Rekrutatsiya SMSdan boshlangan, javob esa atigi ikki kulgu emojisi bo‘lgan. Shunisi ham yetarlicha aniq signalki, James hozircha hech kimga eshikni ochgani yo‘q.

Sahna ortida bo‘layotgan gap-so‘zlar ko‘p, lekin LeBronning o‘zi yo‘nalish bermadi. Aksincha, tomoshabinlar bilan o‘ynadi, ulardan taklif so‘radi.

“Warriorsni eshitdim… Philly… Miami… Kimdir ‘Yankeesga kel’ dedi”, — deya hazillashdi u.

Jamoa nomlari zal bo‘ylab uchib yurdi, lekin birortasi alohida ajralib chiqmadi. Bitta narsa esa aniq: u qayerga bormasin, o‘z ta’siriga ishonadi.

“Qayerga bormayin, o‘zimning izimni qoldiraman. Men tabiiy yetakchiman”, — dedi James. “Qaysi jamoaga borsam, avvaliga o‘sha jamoaga moslashishga harakat qilaman. Lekin shu bilan birga, ularga 23 yil ichida olgan barcha bilim va vositalarimni beraman”.

24-mavsum sari: yakuniy bob hali yozilgani yo‘q

James 41 yoshda. U 24-mavsumiga tayyorgarlik ko‘ryapti. Ligada hech kim bunday davomiylikni ko‘rmagan: 23 mavsum allaqachon rekord. Endi u buni 25 taga yetkazishi ham mumkin.

Payshanba kuni u buni so‘nggi yil deb e’lon qilmadi. Aksincha, “yakuniy bob”ning nechta sahifadan iborat bo‘lishi hali aniq emasligini ko‘rsatdi.

“Bu katta qaror. Faqat o‘zim uchun emas, oilam uchun ham. Kariyeramning so‘nggi qismi qayerda o‘tishini tanlashim kerak. Bu so‘nggi yil bo‘lishi ham mumkin, yoki so‘nggi ikki yil”, — dedi u.

Bu so‘zlar bir narsani anglatadi: LeBron hali o‘zini tugagan deb hisoblamaydi. U endi “har kuni rekord yangilayotgan afsona” emas, balki “oxirgi yillarini to‘g‘ri sahnada yakunlamoqchi bo‘lgan afsona”.

Oila — eng og‘ir mezon

James qaror jarayonida oilaning markaziy o‘rin tutayotganini yashirmaydi. U o‘zining 22 yoshli o‘g‘li Bronny haqida gapirdi — yaqinda Lakersdagi sobiq jamoadoshi bo‘lgan yigit. Katta o‘g‘li endi ligaga qadam qo‘ydi, kichik o‘g‘li Bryce Arizona universitetida o‘ynayapti, qizi Zhuri esa 11 yoshda va hali uyda.

LeBron unga kelasi mavsum Lakers uchun o‘ynamasligini aytib bo‘lgan. Bu esa bir narsani anglatadi: u ko‘proq safarda bo‘ladi, uyda kamroq ko‘rinadi. Yangi jamoa tanlovi shu manzaraga ham bevosita ta’sir qiladi.

“Odammilar: ‘Tezroq qaror qil, LeBron’, deyishyapti. Bu faqat jamoa haqida emas”, — deydi u. “Hozir juda ko‘p omillarni inobatga olyapman: o‘yinchi sifatida menga eng mos joy, inson sifatida mos joy, mening baxtim, oilamning baxti. Sizlarni uzoq kutdirmayman, lekin oila masalasi men uchun ulkan omil”.

Bu so‘zlar uning transferini oddiy “qaysi klub kuchliroq?” savoli darajasidan ancha yuqoriga ko‘taradi. Gap geografiya, maktablar, uchish masofalari, farzandlarining hayoti va turmush tarzi haqida ketmoqda.

Lakers bilan sakkiz yillik sahna yakuni: iliq, ammo qat’iy xayrlashuv

30-iyundan beri LeBronning Lakersdan ketishi rasmiy xabar sifatida turibdi, ammo u bu haqda jamoatchilik oldida kengroq gapirmagandi. Payshanba kuni u nihoyat Los Angelesdagi davriga nuqta qo‘ydi.

“Oldingi jamoamga salom aytaman, Los Angeles Lakers bilan sakkiz ajoyib yil o‘tkazdim”, — dedi u. “Dunyoning eng tarixiy klublaridan biri. Jeanie Buss, butun Buss oilasiga salom. Rob Pelinka. U yerdagi barcha murabbiylar. Barcha jamoadoshlarim. Ularning hammasini sog‘inaman, albatta. Bu aql bovar qilmas safar edi va endi yo‘limning so‘nggi bosqichlarida meni nimalar kutayotganiga qarayapman”.

So‘zlar ehtiyotkor, lekin samimiy. Hech qanday ko‘ngil yarasi oshkor bo‘lmadi, hech qanday ayblov yo‘q. Shunchaki, bir davr tugadi. U Lakersdagi chempionlikni, Cleveland Cavaliers va Miami Heat bilan qo‘lga kiritgan unvonlarni, hamda 2008-yilgi Olimpiadadagi “Redeem Team” tarkibini o‘zining eng sevimli jamoalari sifatida tilga oldi. Lekin bu ro‘yxatdan ham kelajak manzili bo‘yicha hech qanday kalit so‘z topib bo‘lmaydi.

Mish-mishlar doimiy, LeBron esa sukutni ushlab turibdi

Payshanba kuni James o‘zi haqida tarqalayotgan mish-mishlarni to‘xtatmagan bo‘lsa-da, ularga aniq yo‘nalish ham bermadi. Liga atrofida esa mashina to‘xtamaydi: erkin agentlik, savdolar, agentlar, ichki manbalar — hammasi ishlayapti.

U esa hozircha bitta pozitsiyani saqlab turibdi: qaror hali ichida, e’lon esa hali tashqarida.

NBA yozining eng katta savoli ochiq qolmoqda: LeBron James o‘zining so‘nggi yillarini qaysi shaharda, qaysi libosda, qaysi zalda yakunlaydi?