La Masia navbati: Xavi Espart va Hansi Flick o‘rtasidagi kelishuv
FC Barcelona yangi transfer qilmagandek ko‘rinadi. Ammo Hansi Flick allaqachon yangi yarim himoyachiga ega. Faqat bu safar u shartnoma stolida emas, La Masia yo‘laklarida paydo bo‘ldi.
2025/2026 yilgi mavsumda kataloniyaliklar La Liga chempionligini saqlab qolar ekan, Flick yana bir bor 2007-yil avlodiga ishonch bildirdi. Lamine Yamal, Pau Cubarsí va Marc Bernaldan keyin navbat Xavi Espartga keldi. U ham millionlab bolalarning orzusini ro‘yobga chiqardi – Barcelona uchun debyut qildi.
Bu ilk o‘yin ko‘k-anor rang libosda emas, o‘sha davrda ishlatilayotgan to‘q sariq safar formasida bo‘ldi. Champions League 1/8 finalida Newcastle United maydonida 1:1 hisobidagi uchrashuv oxirida u maydonga tashlandi. Qisqa daqiqalar, lekin katta eshik. Espart uchun shu eshik endi to‘liq ochilayotganga o‘xshaydi.
Lahm soyasi va yangi rol
O‘tgan mavsumda Espart Flick qo‘l ostida olti marta maydonga tushishga ulgurdi. Ammo uning atrofida doim bir savol aylanardi: u aslida qayerning futbolchisi? Himoyachimi yoki yarim himoyachi?
La Masia tarixi bu savolga aniq javob beradi. Espart akademiyada aynan yarim himoyada o‘sgan. Shunga qaramay, Flick unda boshqa qiyofani ko‘rdi. U uni o‘zining “Philip Lahm”i sifatida tasavvur qildi – chiziq bo‘ylab ham, markazda ham birdek o‘ynay oladigan futbolchi.
Yozgi tayyorgarlik davri bu rejani oshkor qildi. Espart butuncha yarim himoyada sinovdan o‘tdi. O‘ng qanot himoyasida esa endi Eric Garcia asosiy nomzodga aylangandek, Jules Koundé uchun jiddiy raqobat paydo bo‘ldi.
Bazelda portlash, Gamperda signal
Kataloniya muxlislari yozgi o‘yinlarni bejiz tomosha qilmadi. Ular Espartning yangi qiyofasini ko‘rishdi. Baselga qarshi safardagi 2:5 hisobidagi g‘alabada u markazda ishonch bilan harakat qildi, pressingda ham, to‘p bilan ham dadil bo‘ldi. O‘sha kecha ijtimoiy tarmoqlarda uning nomi ko‘p tilga olindi.
Gamper kubogida Al Ahlyga qarshi 2:1 hisobidagi g‘alabada esa u deyarli gol muallifiga aylanayotgan edi. Zarbasini chiziq oldida to‘sib qolishdi. Ammo o‘sha epizodning o‘zi Flick uchun yetarli signal bo‘ldi: bu yigit faqat zaxira varianti emas.
Elchega qarshi kutilayotgan sinov
Endi esa navbat rasmiy imtihonga. Barcelona yangi 2026/2027 yilgi mavsumni yakshanba kechasi, soat 21:30 da safarda Elchega qarshi boshlaydi. Klub boshqa ko‘pchilik raqiblardan kechroq start olmoqda – bunga jahon chempionatida ishtirok etgan futbolchilar soni sabab bo‘ldi.
Yarim himoya esa hozircha to‘liq emas. Pedri hali safga qaytishga ulgurmagan, yangi kelgan Rodri ham tayyor emas. Shu fon’da Espart uchun eshik yanada keng ochildi. U 2007-yil avlodidagi do‘stlari – Lamine Yamal va Marc Bernal bilan birga boshlang‘ich tarkibda maydonga tushishi mumkin.
Pau Cubarsí atrofida esa savollar ko‘p. U Gamperda bir daqiqa ham o‘ynamadi. Bu ehtiyot chorasi bo‘ldimi yoki u hali yuz foiz tayyor emasmi – buni faqat Flick biladi. Shunga qaramay, to‘rtta iste’dodning birgalikda birinchi daqiqalardan maydonga tushish ehtimoli kun sayin oshib boryapti.
La Masia uchun yangi sahna
Agar Flick yakshanba kuni jasorat ko‘rsatib, Lamine, Bernal, Espart va Cubarsíni birgalikda ishga solsa, bu nafaqat navbatdagi start tarkibi bo‘ladi. Bu La Masia uchun yangi sahna, yangi bayonot bo‘ladi.
Barcelona tarixida akademiya bolalari ko‘p marotaba sahnani egallagan. Ammo bitta avloddan to‘rtta futbolchi bir vaqtda, bunday bosim ostida, chempionlikni himoya qilish yo‘lida maydonga tushishi – bu allaqachon boshqa daraja.
Savol endi shundaki: Flick bu ishonchni qanchalik erta va qanchalik keskin beradi? Elchega qarshi kecha, ehtimol, javobning birinchi bo‘lagini beradi.
