Julian Alvarez atrofidagi sovuq urush: Laporta va Cerezo o‘rtasidagi raqobat
Kataloniya va Madrid o‘rtasidagi eski raqobat bu safar maydonda emas, muzokara xonasida qiziyapti. Markazda esa bitta ism turibdi: Julian Alvarez.
Barcelona prezidenti Joan Laporta yaqinda argentinalik hujumchini qo‘lga kiritish uchun klub taklifini stolga qo‘yganini ochiq e’lon qildi va darhol chegarani chizdi. U taklif abadiy kutib turmasligini aniq aytdi.
Laporta ohangidan shundoq seziladi: Barcelona bu yozda hech kimning kayfiga qarab ish tutmoqchi emas. U shunday degan edi, mazmunan: biz ritmni o‘zimiz belgilaymiz, taklif bor, lekin u cheksiz muddatga emas. Murabbiy shtabi so‘ragan futbolchini olish niyatimizni bildirdik, o‘yinchini juda yoqtiramiz, uni ajoyib futbolchi deb hisoblaymiz.
Bu nafaqat Alvarezga, balki Atletico de Madrid rahbariyatiga ham yuborilgan aniq signal edi: qaror qiling, vaqt ishlayapti.
Laporta keyinroq taklif borasida tushunmovchilik bo‘lganini, uni izohlaganini, lekin bundan ortiq bosim o‘tkazmaganini ta’kidladi. Ularning tomoni shunday pozitsiyada: raqib klubda alternativ variant paydo bo‘lgan palladan boshlab, taklif amalda turibdi, lekin jarayon hozircha oldinga siljigani yo‘q.
Shu paytda sahnaga Enrique Cerezo chiqdi.
Cerezo javobi: “U qayerda o‘ynashini hammangiz bilasiz”
Atletico de Madrid prezidenti mikrofon qarshisida biroz tabassum bilan, lekin mazmundan kelib chiqib qaraganda, juda qat’iy javob berdi. U Laportani “yaxshi do‘st, zo‘r prezident” sifatida ta’rifladi, lekin asosiy xabarni bir og‘iz gap bilan aniq yetkazdi: Julian Alvarez kelasi mavsum qayerda o‘ynashini hamma biladi.
Cerezo shu bilan birga klubning futbolchi ustidan to‘liq huquqi borligini eslatib qo‘ydi: argentinalik hujumchi bilan shartnoma 2030-yil iyungacha amal qiladi. Ya’ni, Madrid klubi stol ustida kuchliroq karta ushlab turibdi.
Savol yanada keskinlashdi: Alvarez atrofidagi mish-mishlarga sabab bo‘lgan harakatlari uchun klub uni kechirishga tayyormi?
Cerezo bu borada ham yumshoq, lekin ma’noli ohangni tanladi. Hayotda hammimiz xato qilamiz, hammasini kechirish mumkin, dedi u. So‘ng esa eng muhim nuqtani qayta urg‘uladi: Alvarez — Atletico de Madrid futbolchisi.
Bu gaplar shunchaki diplomatik ibora emas, pozitsiya bayonoti. Madrid klubi hozircha eshikni yopib qo‘ygandek ko‘rinadi.
Transfer bozorida yangi front ochildimi?
Laporta tomonidan yuborilgan muddatli taklif, Cerezo tomonidan berilgan qat’iy javob — bu ikki klub o‘rtasida yashirin bosim o‘yinini boshlab berdi. Barcelona Alvarezga bo‘lgan qiziqishini yashirmayapti, Atletico esa shartnoma muddatini qalqon sifatida ishlatyapti.
Hozircha hech narsa siljimagandek tuyuladi. Ammo bitta savol ochiq qolmoqda: vaqt o‘tishi bilan bosim kim tomonida kuchayadi — hujumchini qo‘lga kirmoqchi bo‘lgan Barcelona tomonidami yoki uni saqlab qolishga urinayotgan Atletico tomonidami?
