Janubiy Koreyada Jahon chempionati fiaskosi: Prezident tekshiruv talab qildi
Janubiy Koreya futbolidagi navbatdagi chayqov bu safar maydonda emas, eng yuqori siyosiy minbarda boshlandi. Mamlakat prezidenti Lee Jae Myung terma jamoaning Jahon chempionatidagi sust o‘yini va undan keyin murabbiy Hong Myung-bo iste’fosidan so‘ng rasmiy tekshiruv o‘tkazishni talab qildi.
Uch o‘yin, uch ochko, uyga erta qaytish. Janubiy Koreya A guruhidan chiqa olmadi: Chexiya ustidan g‘alaba, Meksika va Janubiy Afrika Respublikasi bilan mag‘lubiyatlar – va shundan so‘ng barcha savollar bir odam atrofida to‘plandi.
Prezidentning g‘azabi
Lee Jae Myung jamoaning chiqishiga baho berar ekan, o‘zini tiyib o‘tirmadi. U natijadan “butunlay hayratda” qolganini aytdi va eng avvalo Hong Myung-bo nega bosh murabbiy etib tayinlangani bo‘yicha savol qo‘ydi. Gap faqat sport natijasida emas – u soliq to‘lovchilarning puli haqida ham gapirdi.
Prezidentning ta’kidlashicha, Jahon chempionatiga tayyorgarlik va ishtirok uchun katta miqdorda davlat mablag‘lari sarflangan, shu bois yuz bergan “voqea”ni chuqur tahlil qilish shart. U Madaniyat, sport va turizm vazirligidan terma jamoa atrofidagi barcha jarayonlarni sinchiklab o‘rganishni so‘radi: qanday qarorlar qabul qilingan, nimada xato qilingan, kelajakda bunday holat takrorlanmasligi uchun nimalar o‘zgartirilishi kerak.
Lee Jae Myung sport boshqaruv tizimini tubdan isloh qilish va’dasini ham berdi. Uning so‘zlariga ko‘ra, bunday natija endi qayta takrorlanmasligi uchun davlat sport ma’muriyatini yangilash bo‘yicha chora-tadbirlar “tezkor ravishda” amalga oshiriladi.
Hong Myung-bo uchun navbatdagi og‘ir yakun
Bosim ostida qolgan odam esa bitta – Hong Myung-bo. Sobiq himoyachi, mamlakat futbolidagi afsonaviy nom, yana bir bor Jahon chempionatidan keyin iste’foga chiqayotganini e’lon qildi.
U qarorini yakshanba kuni ma’lum qildi, bu – Janubiy Koreya guruh bosqichida uchinchi o‘rin olgan jamoalar orasida ham sakkiztalik kvotaga kira olmagani e’lon qilinganidan atigi bir kun o‘tib sodir bo‘ldi.
“Bu vazifani qabul qilish men uchun oson qaror bo‘lmagan, lekin bir marta zim-mamga olganimdan keyin oxirgi lahzagacha faqat mas’uliyat haqida o‘yladim”, – dedi 57 yoshli Hong. U yana bir bor terma jamoani eng og‘ir paytda qabul qilib, yana Jahon chempionatidan so‘ng ketishga majbur bo‘layotganini yashirmadi.
Bu – uning ilk alamli xayrlashuvi emas. Hong Myung-bo 2013–2014-yillarda ham Janubiy Koreya terma jamoasini boshqargan, o‘shanda ham jamoa 2014-yilgi Jahon chempionatida guruh bosqichida (0–2–1) mag‘lub bo‘lib, u iste’foga chiqqandi.
Afsonaning og‘ir merosi
Hongning o‘zi futbolchi sifatida mutlaqo boshqa tarix yozgan. U to‘rtta Jahon chempionatida (1990, 1994, 1998, 2002) o‘ynagan, 136 ta xalqaro o‘yinda 10 ta gol urgan – himoyachi uchun bu ko‘rsatkich bejiz emas. 2002-yilda u butun mamlakatni hayajonga solgan “oltin avlod” ramzlaridan biriga aylangandi.
Shu sababli ham bugungi tanqidlar yanada keskinroq eshitiladi. Afsonaning murabbiy sifatidagi ikkinchi davri yana bir marta katta savollar bilan yakunlandi: tanlovlar, taktika, tayyorgarlik, ruhiy bosim – hammasi endi lupa ostida bo‘ladi.
Prezidentning bevosita aralashuvi esa bu safargi tahlil oddiy sport bahsi bilan cheklanib qolmasligini ko‘rsatib turibdi. Endi gap faqat Hong Myung-bo haqida emas, balki butun tizim haqida ketmoqda.
Janubiy Koreya futboli uchun savol aniq: bu Jahon chempionati shunchaki muvaffaqiyatsiz kampaniyami yoki butun avlod va boshqaruv modelini qayta ko‘rib chiqishga majbur qiladigan ogohlantiruvmi?
