Ian Machado Garry: Buyuklikka Chanqoq Irland Yulduzi
UFC 330 arafasida Ian Machado Garry o‘zini bozor qoidalariga emas, tarix mezonlariga ko‘ra buyuklar qatoriga qo‘shmoqchi. U uchun bu yo‘l oson yo‘l emas, “ikki vaznli chempion” sarlavhasini quvish ham emas. U uzoq, mashaqqatli hukmronlikni tanlamoqda.
Filadelfiyadagi Xfinity Mobile Arena oktagoni shanba kuni kechqurun bunga sahna bo‘ladi. Katta sahna. Katta xavf. Katta imkoniyat.
Bu safar irlandiyalik yulduzning qarshisida hozirgi zamonning eng dahshatli jangchilaridan biri – Islam Makhachev turibdi. 28-1 MMA, 17-1 UFC. Ikki bo‘limda kamar ko‘targan, yengil vazn chempionligi mudofaalari bo‘yicha rekordni yangilagan, UFC tarixidagi eng uzun g‘alabalar seriyasini ham yangilash yoqasida turgan chempion.
Bunday fon qarshisida har qanday da’vo kuchini yo‘qotishi mumkin. Lekin Machado Garry shunday paytda balandroq gapirmaydi – aniq gapiradi.
“Eng yaxshisini yengmasang, buyuk emassan”
UFC’ga bergan intervyusida Machado Garry o‘z yo‘l xaritasini ochiq chizib berdi. Uningcha, buyuklik haqidagi bahslar bir kechalik sensatsiya bilan emas, to‘liq davr bilan hal bo‘ladi.
“Bu, odamlar hozir eng yaxshi deb hisoblayotgan yigitni yengishdan boshlanadi, – deydi u. – Keyin esa har safar, har gal, kelasi o‘n yil davomida haqli raqibni mag‘lub etish bilan davom etadi. Men 28 yoshdaman. Agar xohlasam, bu sportda o‘n yillik hukmronlikni qo‘limga olishim mumkin. Men tarixdagi eng zo‘rlar qatorida eslanishni xohlayman. Buni inkor qilib bo‘lmaydigan darajada.”
U Demetrious Johnson va Jon Jones kabi nomlarni tilga olar ekan, mezonini ham aniq qo‘yadi: uzluksiz, uzoq, bir davrni belgilab qo‘yadigan chempionlik hukmronligi. Uning nazarida ikki bo‘limda kamar olgan “double champ” maqomi bugun qadrsizlanib bormoqda – ko‘pchilik “qulay fursat”ni kutadi, xavfni minimallashtiradi.
Machado Garry esa o‘zini boshqacha tasavvur qiladi.
“1 dan 15 gacha – hammasini yengaman”
Irlandiyalik jangchi uchun buyuklik – riskni yashirish emas, aksincha, uni doimiy ravishda izlab topish. U o‘zini bo‘limdagi har bir eng kuchli nomga qarshi sinab ko‘rishni istaydi.
“Men top-15 dagi 1-raqamdan 15-raqamgacha bo‘lganlarning barchasini yengishni xohlayman, – deydi u. – Sayyoradagi har bir eng zo‘r yarim o‘rta vazn vakili ustidan g‘alabam bo‘lishini istayman, shunda men eng yaxshi ekanimni isbotlayman. Savol qolmasligi kerak. Men jang qilgan davrda bo‘limimdagi har bir raqibni yenggan bo‘laman. Men ularni yengaman, bu inkor qilib bo‘lmaydigan haqiqat bo‘ladi.”
Bu faqat baland shior emas. Machado Garry allaqachon o‘z rezyumesiga jiddiy ismlar qo‘shib ulgurgan: noodatiy uslub egasi Michael Page, xavfli da’vogar Carlos Prates va sobiq UFC yarim o‘rta vazn chempioni Belal Muhammad ustidan qozonilgan g‘alabalar unga buchaqni o‘tkirlashga yordam berdi.
Endi esa navbat eng katta sinovga keldi.
Makhachev davriga chizilgan chiziqmi?
Islam Makhachev bugun ko‘plar nazarida “eng zo‘rlar ichida eng zo‘r” maqomiga yaqinlashib bormoqda. Ikki bo‘limda kamar, rekord mudofaa, rekord g‘alabalar seriyasi – bularning barchasi uni allaqachon UFC tarixidagi alohida qatlamga olib chiqqan.
Shu fon qarshisida Machado Garry o‘z davrini boshlash uchun aynan shu raqamlar, aynan shu nomni nishonga olmoqda. U uchun bu jang faqat kamar uchun emas. Bu – mezon jang. Agar u Makhachevni to‘xtatsa, bo‘limdagi har bir nomga qarshi yuradigan uzoq yo‘lga mutlaqo boshqa maqomda chiqadi.
Filadelfiyada esa savol juda sodda, lekin juda og‘ir bo‘ladi: Makhachev o‘z davrini yanada mustahkamlaydimi yoki oktagonda yangi, uzoq hukmronlikka da’vogar ism tug‘iladimi?
