Hamza Abdelkarim: Barcelona'dagi kelajagi va rivojlanishi
"Barcelona" Hamza Abdelkarim bo‘yicha qarorini o‘zgartirmaydi. Katalonlar misrlik yosh hujumchi uchun yozilgan yo‘l xaritasiga sodiq qolishdi – birorta chizig‘ini o‘chirib ham, qayta chizib ham o‘tirmayapti.
Ispaniyaning "Sport" nashri xabariga ko‘ra, La Liga’ning dastlabki ikki turida bir daqiqa ham maydonga tushmagani fonida ham klub va murabbiylar shtabining Hamzaga ishonchi so‘nmagan, aksincha, mutlaq darajada saqlanib qolgan.
Yozgi tayyorgarlik bunga asos bo‘ldi. Atigi 18 yoshli forvard mavsumoldi o‘yinlarini jamoaning eng yaxshi to‘purari sifatida yakunladi. U nafaqat gollar urdi, balki o‘zining to‘liq salohiyatini ko‘rsatdi. Hansi Flick uni hanuz yuqori baholaydi va birinchi jamoa hujum chizig‘i uchun zaxiradan tushadigan jozibali variant sifatida ko‘radi.
Tanasi o‘zgardi, o‘yini ulg‘aydi
Hamza endi oddiy prospect emas, to‘laqonli markaziy hujumchi bo‘lib shakllanmoqda. U baribir kuchli gavdali, jarima maydoni ichida ishlaydigan "toza" forvard edi, ammo klub tuzib bergan shaxsiy jismoniy dastur hammasini boshqa bosqichga olib chiqdi. Natijalar ko‘rinib turibdi: yuqori qismi ham, pastki qismi ham ancha qudratli, to‘qnashuvlarda yutqazmaydigan futbolchiga aylanib boryapti.
Bu sakrashda Misr terma jamoasi bilan so‘nggi Jahon chempionatida olgan tajribasi ham katta rol o‘ynadi. U deyarli har bir o‘yinning yakuniy daqiqalarida maydonga tushdi, bu esa musobaqaviy yetilish jarayonini tezlashtirdi. Aynan shu daqiqalar Flick qo‘liga elita darajasiga tayyor, lekin hali bosib o‘tishi kerak bo‘lgan rivojlanish pog‘onalari qolgan hujumchini tutqazdi.
"Barcelona Atletic" – rejadagi majburiy bekat
"Sport" ma’lumotiga ko‘ra, klub rahbariyati Hamzani "Barcelona Atletic" safida ushlab qolishga qat’iy qaror qilgan. Mavsum boshida u bu jamoaga 29-raqam ostida ro‘yxatdan o‘tkazilgan – bu qaror ilk kundanoq aniq maqsad bilan qabul qilingan: birinchi jamoada o‘ynamagan paytlarida ham unga barqaror o‘yin amaliyotini kafolatlash.
"Barcelona" Flick qo‘l ostida uning daqiqalari mavsum davomida ma’lum paytlarda kamayishini juda yaxshi biladi. Shuning uchun 18 yoshli forvard uchun Juliano Belletti boshqarayotgan jamoa ideal oraliq platforma sifatida ko‘rilmoqda. U yerda u bosimdan uzilmagan, ritmdan chiqmagan holda o‘sishda davom etadi.
Bu ikki darajali yo‘l – Camp Nou yulduzlari bilan mashg‘ulotlar, "Barcelona Atletic" bilan muntazam o‘yinlar – klubning Hamza uchun chizgan aniq rejasi markazida turibdi. Qisqa yo‘l qidirmayapti "Barcelona", aksincha, to‘g‘ri yo‘lni oxirigacha bosib o‘tmoqchi.
Navbatdagi qadam – shartnoma
Yana bir muhim nuqta: "Sport" xabariga ko‘ra, klub allaqachon misrlik hujumchi bilan shartnomani uzaytirish ustida ishlayapti. Bu – ishonchning eng aniq ko‘rinishi. U hali La Liga’da bir daqiqa ham o‘ynamagan bo‘lishi mumkin, lekin ichkarida uni kelajakning asosiy hujumchilaridan biri sifatida ko‘rayotganlar bor.
Endi savol shunda: bu ehtiyotkor, lekin qat’iy reja Hamzani "Barcelona"ning navbatdagi katta nomiga aylantira oladimi? Yoki Kataloniya klubi qo‘lida juda nozik, yo‘qotishga haqqi bo‘lmagan iste’dodni ushlab turibdimi?
