Guenther Steiner: Formula 1ga qaytishga tayyorman, lekin shartlarim bor
Guenther Steiner Formula 1dan ketganini hali-hanuz hazm qilmagan muxlislar ko‘p. Uning o‘zi esa sportdan uzil-kesil voz kechganicha yo‘q. Sobiq Haas bosh jamoa rahbari ochiq aytdi: u qaytishga tayyor. Lekin faqat bitta shart bilan – bu safar bu shunchaki “ish” emas, haqiqiy loyiha bo‘lishi kerak.
“Lavozim men uchun hech narsa emas”
Yillar davomida Steiner Formula 1ning turli burchaklarida ishladi. Jaguar Racingda 2001–2003-yillarda Managing Director, keyin Red Bull Racingda 2005–2006-yillarda Technical Operations Director. Eng katta izini esa, albatta, Haas bilan qoldirdi – jamoani 2014-yildan boshlab noldan qurdi va 2023-yil oxirigacha boshqardi.
Endi u boshqa paddokda. 2026-yildan boshlab u Tech3 MotoGP jamoasining bosh direktori va hammuallifi sifatida yangi sahifani ochmoqda. Shunga qaramay, Formula 1 eshigi uning uchun hanuz berk emas.
U Up to Speed podkastida qatnashar ekan, qaytish sharti haqida juda aniq gapirdi. Uning so‘zlariga ko‘ra, u oddiy taklif uchun, “bo‘sh turgan kreslo”ni to‘ldirish uchun ortga qaytmaydi. Unga qurish, shakllantirish, yo‘nalish berish imkonini beradigan loyiha kerak.
U o‘z faoliyatining so‘nggi 10–20 yilini eslar ekan, aynan shunday “loyiha”larga bog‘langanini urg‘uladi. Oddiy ofis lavozimi, qat’iy chizmalar, cheklangan vakolat – bular Steiner uchun qiziq emas. U buni “zerikarli” deb atashdan tiyildi, lekin bir narsani ochiq aytdi: unda yetarli hayajon yo‘q.
U uchun asosiy mezon – chaqiriq darajasi va o‘zi shakllantira oladigan maydon. Uning fikricha, lavozim nomi mutlaqo ikkinchi darajali: u “job title” bilan yashamaydi, unga lavozim yozuvi emas, ishning o‘zi muhim.
Shu bois, agar u yana paddokka qaytsa, bu jamoaning tuzilmasini, madaniyatini, yo‘nalishini o‘zgartira oladigan, o‘z izini qoldira oladigan rol bo‘lishi kerak. Aks holda, u boshqa yo‘nalishlarda o‘zini band qilishga tayyorligini allaqachon ko‘rsatib bo‘ldi.
2026-yil finali: Yevropaga ko‘chish – xavfli o‘yin
Steiner so‘nggi haftalarda nafaqat kelajagi, balki Formula 1 taqvimi haqida ham fikr bildirdi. Red Flags podkastida u 2026-yilgi mavsum finalini Yevropaga ko‘chirish g‘oyasini keskin savol ostiga oldi.
Asosiy omil – ob-havo. Mavsumning yakuniy bosqichlari noyabr va ehtimol dekabrga to‘g‘ri keladi. Bunday vaqtda Yevropadagi ko‘plab trassalar uchun sharoitlar keskin murakkablashadi: sovuq, yomg‘ir, hatto qor xavfi. Steiner buni ochiqchasiga “xavf” deb ataydi – nafaqat xavfsizlik, balki tomoshaviylik va logistika nuqtai nazaridan ham.
U faqat ob-havo bilan cheklanib qolmadi. Masala pulda ham. Uning fikricha, Formula 1 kalendarni shunchaki “son uchun” to‘ldira olmaydi. Har bir yangi poyga nafaqat taqvimdagi raqam, balki iqtisodiy jihatdan ham ma’qul bo‘lishi kerak: promouter daromadi, jamoalar xarajatlari, logistika – hammasi hisobga olinadi.
Shuning uchun ham “bo‘sh joyga istalgan trassani qo‘yish” varianti real emas. Har bir yangi bosqich o‘zini oqlashi lozim. Aynan shu yerda tanlovlar keskin qisqaradi.
Steiner mavjud variantlar juda cheklanganini ta’kidladi. Uningcha, Malayziyaning kalendarga qaytishi ma’lum darajada sug‘urta rolini bajaradi: Formula 1 baribir 20 dan ortiq Gran Pri bilan qoladi. Ammo Stefano Domenicali kamida 22 bosqichli chempionat ko‘rishni istayotgani sir emas.
Savol shunda: yil oxirida 22-poyga uchun haqiqatan ham mos, ob-havo va moliyaviy tomondan barqaror trassani qayerdan topish mumkin? Aynan shu jumboqni hal qilish Domenicali va Formula 1 rahbariyati zimmasida. Steiner esa chetdan kuzatib turibdi – va agar to‘g‘ri loyiha paydo bo‘lsa, balki yana bu o‘yinning ichida bo‘lar?
