Frank Lampard va Jose Mourinho: Futbolchining Hayotidagi O‘rni

Frank Lampard uchun Jose Mourinho nomi hamon shunchaki o‘tmishdagi buyuk murabbiy emas. U uchun bu — hozir ham qo‘ng‘iroq qilsa, javob qaytaradigan, kerak bo‘lsa futbolchining xarakterini parcha-parcha qilib tahlil qilib beradigan inson.

Coventry City bosh murabbiyi yozgi transfer oynasida shunday qilganini ochiq aytdi. U Mourinho bilan Real Madrid futbolchisi bo‘lmagan, ammo portugaliyalik murabbiy ilgari ishlagan bir o‘yinchi haqida maslahatlashgan.

“Jose doim yonimda. Yaqinda yana unga yozdim, boshqa bir futbolchi haqida – Real Madrid futbolchisi emas, u avval ishlagan o‘yinchi haqida. U doim aloqada,” – dedi Lampard talkSPORT efirida. “Ba’zan javob berishi uchun bir-ikki kun kerak bo‘ladi. Band odamligini bilaman. Lekin bu safar ham o‘sha futbolchi haqida juda-baholi qudrat batafsil, chuqur tahlil qilib javob qaytardi.”

Bu bir martalik epizod emas. Bu — murabbiylik yo‘lida Lampard ustidan hanuz soyadek tushib turgan Mourinho maktabi.

“Men Jose’ni allaqachon sevib bo‘lgan edim”

Lampardning o‘zi ham tan oladi: uning futbolchi sifatidagi eng yorqin yillari aynan Mourinho davriga to‘g‘ri kelgan. Stamford Bridge’dagi o‘sha davrni eslatuvchi hujjatli filmni ko‘rgach, tuyg‘ular yanada kuchaygan.

“Jose haqida chiqqan hujjatli filmni ko‘rdim, albatta. Ayniqsa birinchi qismi — faqat Chelsea haqidagisi — ajoyib xotiralarni qaytardi. Men Jose’ni allaqachon sevgan edim, lekin bularni qayta ko‘rish zo‘r bo‘ldi,” – deydi u. “Ko‘p buyuk murabbiylar bilan ishladim, lekin u kelganida menga bergan ishonchi tufayli aynan u mening kareramga eng katta ta’sir qilgan.”

Lampard Mourinho’ni ko‘r-ko‘rona takrorlashga urinmaydi. U bunga na hohishi, na tabiatidan kelib chiqadigan imkon borligini aytadi.

“Ko‘p murabbiylar ma’lum ma’noda Jose’ni taqlid qilishga urinishgan deb o‘ylayman. Men esa buni qila olmayman ham, qilmoqchi ham emasman, chunki undagi xarakter menda yo‘q. Mening o‘zimnikilar bor,” – deydi u.

Derby’dan Chelsea va Everton’gacha – va nihoyat o‘zini topgan Lampard

Coventry’dagi 18 oylik davr Lampard uchun shunchaki navbatdagi ish joyi emas. U bu bosqichni o‘zini qayta qurish, murabbiy sifatida yetilish davri sifatida ko‘radi.

Derby County, Chelsea, Everton — har bir klubda bosim, e’tibor, tanqid darajasi boshqacha bo‘lgan. Endi esa u o‘zini ruhiy jihatdan qanday boshqarishni, cheksiz talab va real hayot o‘rtasida muvozanat topishni o‘rganganini aytadi.

“Men murabbiylikni o‘zimcha qilishga harakat qilyapman. Eng ko‘p o‘rgangan narsam — o‘zimning ichki muvozanatimni topish,” – deydi Lampard. “Har o‘yinni yuta olmaysiz. Sizni har xil yo‘llar bilan sinashadi. Har kuni mukammallikni qidirib yashay olmaysiz. Maydonda ham, undan tashqarida ham muvozanatni topish, haqiqatan ham muhim narsalarni ustuvor qilish kerak. Umid qilamanki, Coventry’dagi bu 18 oy men uchun kichik bo‘lsa-da, shaxsiy taraqqiyot bo‘ldi.”

U murabbiylik kasbining ruhiy bosimini yashirmaydi, lekin endi uni boshqarishni bilishini ta’kidlaydi.

“Bu ish asabni yeydigan, sizni charchatadigan kasb. Lekin ichida bo‘lganingizda, aynan shunday bo‘lishini qabul qilishingiz kerak. Muvozanatni topish hayotni yengillashtiradi — dam olishga vaqt ajratasiz, bosimni qabul qilasiz, lekin unga yonib ketmaysiz.”

Lampard o‘zini “tribute act” – ya’ni buyuk murabbiylarning nusxasi sifatida ko‘rishni istamaydi. U Mourinho’dan olgan darslarni, kommunikatsiya va inson boshqaruvi bo‘yicha tajribani o‘z uslubiga aralashtirgan, xolos. Asosiy e’tibor — ayni damdagi kiyinish xonasiga, Coventry futbolchilarining ehtiyojlariga qaratilgan.

Endi esa Arsenal: 25 yillik kutishdan keyingi haqiqat

Coventry uchun ertakdek mavsum ortda qoldi. 25 yil davomida yuqori ligadan tashqarida yurish, so‘ng esa qaytish. Endi esa haqiqat yuzma-yuz turibdi: birinchi turdayoq safarda Arsenal.

Lampard bu to‘qnashuvning og‘irligini yaxshi biladi. Shunga qaramay, u qo‘rqinchni emas, hayajonni tanlayapti.

“Hayajondaman. O‘ylaymanki, hammamiz hayajondamiz,” – deydi u. “Bizning kichik hikoyamiz bor: 25 yil ligadan tashqarida bo‘ldik, o‘tgan yil yigitlar bilan qanday mavsum o‘tkazganimiz, ularning bizni bu yerga olib chiqish uchun qilgan ishlari… So‘ng esa haqiqat yuz ko‘rsatadi. Birinchi o‘yinda Arsenal safarda ekanini ko‘rganingizda, bu haqiqat yanada keskinroq seziladi, chunki ular, haqli ravishda, chempion bo‘lishdi.”

Lampard uchun bu o‘yin — faqat sinov emas, mezon. Jamoa qaerda turganini, Premier League ritmiga qanchalik tayyorligini ko‘rsatib beradigan kecha.

“Lekin biz o‘zimizga qarashimiz kerak. Bu chaqiriqni yuzma-yuz qabul qilishimiz zarur. Yil davomida eng kuchli jamoalarga safarda qarshi o‘ynaysiz — bu liganing bir qismi,” – deya yakunlaydi u.

Mourinho telefonining narigi uchida bo‘lishi mumkin. Uning saboqlari Lampardning ongida allaqachon o‘rnashib bo‘lgan. Endi esa so‘z navbati Coventry futbolchilarida: ular bu sahnaga tayyormi yoki bu hikoya hali boshlanishidanoq yana bir burilish kutyaptimi?