Evertonda Idrissa Gana Gueye bilan xayrlashuv
Everton nihoyat uzoq yillik tayanch futbolchisi bilan xayrlashdi. Klub Idrissa Gana Gueye yangi shartnoma imzolamasligini va jamoani tark etganini rasman e’lon qildi. Shunday qilib, “Goodison Park”dagi yetti mavsumlik xizmatga nuqta qo‘yildi.
36 yoshli senegallik yarim himoyachining shartnomasi iyun oxirida yakunlandi. So‘nggi haftalarda klub rahbariyati bilan o‘tkazilgan muzokaralardan keyin aniq qaror qabul qilindi: Gana endi “yangi chaqiriq” izlaydi. Uning Saudi Pro League vakili Al Diriyah bilan shartnoma imzolashi kutilmoqda.
Everton safidagi ikki davr davomida Gueye 236 ta o‘yin o‘tkazdi.
Bu raqamning o‘ziyoq uning klubdagi o‘rnini ko‘rsatib turibdi. U ko‘pincha ko‘zga tashlanmaydigan, lekin jamoa muvozanatini ushlab turgan futbolchi bo‘lib keldi: raqib hujumlarini sindirish, maydon o‘rtasida kurashish, pressingni boshlash – bularning bari uning kundalik ishiga aylangan edi.
Bosh murabbiy David Moyes ham bu xayrlashuvni befarq qarshi olmadi. U klub bayonoti orqali shunday dedi: Everton Gana’ning ikki davr mobaynidagi fidoyiligi, professionalligi va maydondagi ta’siri uchun nihoyatda minnatdor. Murabbiy uning ayniqsa so‘nggi mavsumda, Goodison’dagi oxirgi kampaniyada kiyinish xonasidagi yetakchilik fazilatlarini alohida ta’kidladi. Moyesning so‘zlariga ko‘ra, Gana yillar davomida klubga g‘ayrioddiy darajada sodiq bo‘ldi va Everton eshiklari u uchun doimo ochiq bo‘lib qoladi.
Gueye’ning Liverpul klubidagi tarixi 2016 yil avgustida, u Aston Villa safidan kelganida boshlangan. U tez orada Premyer ligadagi eng mehnatkash tayanch yarim himoyachilardan biriga aylandi. Keyin uch yillik Paris Saint-Germain davri keldi, katta sahna, yirik sovrinlar, lekin 2022 yil avgustida u yana Evertonga qaytdi. O‘sha paytda ham klubga barqarorlik va tajriba kerak edi, u esa aynan shuni olib keldi.
Endi esa yo‘llar ajralmoqda. Goodison’dagi so‘nggi mavsum, tarixiy stadion bilan xayrlashuv, og‘ir omon qolish kurashida uning tajribasi va ovozi ayni muddao bo‘ldi. Shunday futbolchilar ko‘pincha sarlavhalarda emas, lekin ichkarida, jamoa ruhiyatini ushlab turadigan ustunlar qatorida tilga olinadi.
Everton yangi davrga qadam qo‘yar ekan, tayanch chizig‘ida bo‘shagan o‘rinni kim to‘ldiradi? Shu savol yaqin oylar ichida klub transfer siyosatini belgilab berishi aniq. Gana esa endi boshqa qit’ada, boshqa ligada, lekin o‘zi shakllantirgan meros bilan yo‘lga chiqmoqda.
