Devid Bekxem: Old Trafforddan Mayami galaktikosigacha
Devid Bekxem futbolchi sifatida allaqachon tarix yozib bo‘lgandi. Endi esa u boshqa sahnada – klub egasi sifatida – yana bir bor o‘yin qoidalarini o‘zgartiryapti.
“Manchester United”dagi meros
“Manchester United” tarbiyalanuvchisi bo‘lgan Bekxem klub tarixidagi eng yorqin davrlardan birining ajralmas qismi bo‘ldi. U “United” safida 394 ta o‘yinda maydonga tushib, 85 ta gol urdi va ko‘plab sovrinlarni qo‘lga kiritdi. Uning zarbalari, ayniqsa mashhur jarima zarbalari, “Old Trafford” tribunalarini necha yil hayratda qoldirdi.
2003-yil yozida u “Real Madrid”ga yo‘l oldi. “Galaktikos” davrida ham o‘z izini qoldirdi va 2007-yilda La Liga chempionligiga erishdi. Keyinroq “Los Angeles Galaxy”, “Paris Saint-Germain” va “AC Milan” safida ham o‘ynab, o‘z brendini global darajada mustahkamladi.
Angliya terma jamoasi uchun esa Bekxem alohida bob. U “uch sher” sardori sifatida 115 ta o‘yinda maydonga tushdi – bu raqam uning nafaqat sinfi, balki matonatini ham ko‘rsatib turibdi.
Maydondan boshqaruv xonasiga
Futbolchilikdagi obro‘ Bekxemga boshqaruv olamiga kirishda eshiklarni katta ochib berdi. “Salford City”ni Gari Nevill bilan birga boshqarib kelayotgan bo‘lsa-da, eng katta shov-shuvni albatta uning MLS klubi – “Inter Miami” keltirdi.
Klub atigi 2020-yilda debyut qilgan. Shunga qaramay, sovrinlar allaqachon vitrinani to‘ldira boshladi: 2023-yilda Leagues Cup, 2024-yilda Supporters’ Shield, 2025-yilda esa MLS Cup. Yangi franchayz uchun bu – favqulodda tezlik.
“Inter Miami” o‘tgan yozda ilk bor o‘tkazilgan FIFA Club World Cup turnirida ham ishtirok etdi. Bu, Bekxem loyihasining endi nafaqat Amerika, balki jahon sahnasiga ham chiqayotganidan darak.
Yulduzlar yomg‘iri Mayamida
Bekxemning eng katta ustunligi – uning ismi. U nafaqat maydonda, balki transfer bozorida ham yulduzlarni o‘ziga torta oladigan magnitga aylandi.
2023-yilda u futbol tarixidagi eng katta nomlardan birini ko‘ndirishga muvaffaq bo‘ldi: Lionel Messi “Paris Saint-Germain”ni tark etib, Mayamiga ko‘chib o‘tdi. Bu nafaqat MLS, balki butun futbol xaritasini silkitgan voqea bo‘ldi.
Messi bilan birga Luis Suarez, Jordi Alba, Sergio Busquets, Rodrigo De Paul kabi tajribali yulduzlar ham “Inter Miami” loyihasiga ishondi. Har biri Bekxemning “United” davridagi nufuzini, uning futbolni tushunishini va Mayamidagi ambitsiyalarini ko‘rib qaror qildi.
Yaqinda Casemiro ham Jahon chempionatidan so‘ng Messi va Bekxemga qo‘shilish bo‘yicha kelishuvga rozi bo‘lgani ma’lum qilindi. Demak, “Inter Miami” yarim himoyasi endi yanada og‘irlashadi.
Keyingi galaktiko: Kylian Mbappe?
Bekxem bu yerda to‘xtamoqchi emas. TalkSPORT ma’lumotiga ko‘ra, u allaqachon navbatdagi superyulduz haqida o‘ylayapti. Maqsad – yana bir galaktik ismni MLS sahnasiga olib chiqish.
Fransiyalik hujumchi Kylian Mbappe bilan Amerika variantiga doir savol paydo bo‘lganda, uning javobi hammasini aytib qo‘ydi: “Ko‘ramiz. David Beckham bu haqda menga ko‘p marta gapirgan. Amerika madaniyati boshqacha, ambitsiyalarga chegaralar yo‘q, bu menga yoqadi”.
Bu so‘zlar – rasmiy va’da emas. Lekin Bekxemning odatini bilganlar uchun juda tanish signaldir: u nimanidir ko‘ngliga tugsa, oxirigacha boradi. Messi bilan bo‘lgan ssenariy ham avval xuddi shunday yumshoq ishoralar bilan boshlangan edi.
Endi savol bitta: Bekxem Mayamida yana bir galaktikoni qo‘ndiradimi yoki MLS orzusi bu safar ham o‘ziga xos inqilobga aylanadimi?
