De Zerbi va Tottenhamning yozgi transfer strategiyasi
Tottenham yozgi bozorni allaqon larzaga keltirdi, lekin Roberto De Zerbi to‘xtash niyatida emas. U buni yashirmadi ham. Uning so‘zlariga ko‘ra, London klubi hali “yana bir bomba” ustida ishlayapti.
Bu shunchaki balandparvoz ibora emas. Bu yozda klub qilgan ishlar fonida bu gap ancha jiddiy eshitiladi.
Rekordlar ketma-ket yangilangan yoz
Spurs transfer oynasini yorqin boshladi. Avvaliga West Hamdan Mateus Fernandes uchun 85 million funt to‘lab, klub tarixidagi eng qimmat transferni amalga oshirdi. Oradan ko‘p o‘tmay, bu rekord yana sindirildi: Newcastle bilan Sandro Tonali bo‘yicha kelishuv – bonuslar bilan birga 100 million funtgacha yetishi mumkin bo‘lgan bitim.
Bu ikki kelishuvning o‘ziyoq Tottenhamning yangi davrga qadam qo‘yayotganini ko‘rsatadi. Ammo ish faqat ularda emas.
Brightondan Jan Paul van Hecke kelib qo‘shildi, tajribali himoyachilar Andy Robertson va Marcos Senesi esa erkin agent sifatida jamoaga qo‘shildi. Tarkib chuqurlashdi, raqobat keskinlashdi. Endi esa navbat navbatdagi zarbaga kelgandek.
Manchester Cityga tegishli bo‘lgan braziliyalik vinger Savinho ham klub bilan jiddiy bog‘lanmoqda. London klubi qanotlarga tezlik va beqarorlik qo‘shishni xohlayotgani yaqqol.
Shu fon’da De Zerbi ogohlantiradi: bozor hali tugamadi.
“Loyiha 60 foizda. Oldinda yana bir bomba”
De Zerbi The Athletic nashriga bergan fikrida transfer rejalarini yashirmadi.
“Transfer bozori, albatta, hali tugamadi, — dedi u. — Bozorda loyihamizning 60 foizini yakunladik. Endi esa bizda yana bir bomba bor”.
Savol tabiiy: bu “bomba” qanchalik yaqin? Javob ham o‘ziga xos ohangda keldi.
“Umid qilaman, lekin u hali yakunlanmagan, bu aniq”, — dedi De Zerbi.
Ijtimoiy tarmoqlarda “bomba” atamasi kutilmagan, shov-shuvli transferlar uchun ishlatiladi. Tottenham muxlislari endi aynan shunday yangilikni kutib turibdi. Klub yozgi oynada allaqachon kuchli zarba berdi, lekin murabbiy gap ohangidan kelib chiqib aytganda, asosiy syurpriz hali ochilmagandek.
“Futbolchi xohlasam, akulaga aylanaman”
De Zerbi o‘zining transfer bozoridagi xarakterini ham ochiq ta’riflab berdi. U muzokaralarda yumshoqlikni yoqtirmaydi.
“Transfer bozorida men bir futbolchini xohlasam, akulaga aylanaman, — deydi u. — Rad javobiga imkon qoldirmayman”.
Qattiq, aniq va talabchan ohang. Aynan shunday yondashuv Tottenhamning bu yozdagi faoliyatida ko‘rinmoqda: maqsadli, agressiv va murosasiz harakatlar.
De Zerbi uchun bu jarayon zo‘riqish emas, aksincha zavq manbai.
“Transfer bozorida ishlashni yaxshi ko‘raman. Bu bosim emas, ishlarimning, vazifamning eng yoqimli qismlaridan biri”, — deydi u.
Tottenham allaqachon katta pullarni ishga soldi, tarkibni qayta qurishni boshlab yubordi. Endi esa savol bitta: De Zerbi va uning “bomba”si bu yozni nafaqat klub, balki butun Premer-liga uchun esda qoladigan oynaga aylantira oladimi?
