Danny Welbeck: Chelsea’ga ko‘chishi va Xabi Alonso loyihasi

Danny Welbeck yaqin 24 soat ichida tibbiy ko‘rikdan o‘tishga ruxsat oldi. Bu, amalda, uning Brighton’dan Chelsea’ga ko‘chishi yakuniy bosqichga kirganini anglatadi. Bitim deyarli tayyor, Stamford Bridge yana bir bor tajribaga murojaat qilmoqda.

Xabi Alonso qo‘l ostidagi yosh va shiddatli tarkibga endi boshqa ohang kerak bo‘ldi: ko‘rganini ko‘rgan, bosimi baland pallalarda asabini yo‘qotmaydigan futbolchilar. Welbeck – aynan shunday profil.

Chelsea odatini buzmoqda

London klubi so‘nggi yillarda o‘ziga qat’iy chegaralar chizib olgandi: katta pul – faqat yoshlar uchun. 26 yoshdan oshgan futbolchiga transfer to‘lovi? To‘rt yil avval, Pierre-Emerick Aubameyang kelganidan beri birinchi marta. 30 yoshdan katta o‘yinchini maydonga tushirish ham ikki yildirki kuzatilmaydi.

Endi esa manzara o‘zgarib bormoqda. 35 yoshli Welbeck tibbiy ko‘rik arafasida turibdi.

Sky Sports News ma’lumotiga ko‘ra, Brighton bilan shartnomasi yana bir yilga mo‘ljallangan hujumchi borasida dastlabki muzokaralar allaqachon ijobiy yakunlangan. Klub ichida qaror qabul qilingan: Alonso tajribali futbolchilarni so‘radi, rahbariyat esa bu safar murabbiy talabini rad etmadi.

Statistika – yoshlar emas, veteran gapiryapti

Welbeckning tanlovi hissiy qaror emas. Raqamlar uning foydasiga ishlayapti. 35 yoshida ham u Premyer-ligada barqaror gollarga mas’ul bo‘lib qolmoqda: o‘tgan mavsum – 13 gol, undan oldingi mavsum – 10 gol.

Chelsea tarkibidagi to‘rt nafar “katta” hujumchining o‘rtacha yoshi 23 da. Ularning umumiy Premyer-liga tajribasi – 269 o‘yin, 74 gol. Welbeck esa yolg‘iz o‘zi 400 uchrashuv va 90 gol bilan turibdi. Yosh hujumchilarni tarbiyalash uchun zaxirada shunday figura bo‘lishi – Alonso ko‘zida mantiqiy sxema.

Bu transfer Chelsea yozgi strategiyasidagi aniq yo‘nalishni ham ochib beradi: jismonan kuchli, Premyer-ligani ichidan biladigan futbolchilar. Morgan Rogers transferi bunga eng yorqin misol – Aston Villa’dan 117 million funt evaziga, britaniyalik futbolchi uchun rekord summa. Yana bir qadam – Crystal Palace himoyachisi Maxence Lacroix bilan kelishuv yakuniga yaqin.

Bunday harakatlar Nicolas Jackson, Liam Delap va Marc Guiu kelajagini savol ostiga qo‘yadi. Stamford Bridge’dagi hujum chizig‘i qayta chizilmoqda.

Brighton izlari London bo‘ylab

Welbeckning ehtimoliy kelishi – Chelsea va Brighton o‘rtasidagi so‘nggi yillarda shakllangan to‘g‘ridan-to‘g‘ri yo‘lning navbatdagi bekati, xolos.

Joao Pedro hozirda London klubining asosiy hujumchisi. U ham Brighton’dan keldi. Moises Caicedo, Marc Cucurella, Robert Sanchez – barchasi bir xil yo‘nalish bo‘yicha ko‘chganlar. Faqat o‘yinchilar emas: so‘nggi to‘rt yil ichida sport direktorlari Paul Winstanley va Sam Jewell ham Brighton’dan Stamford Bridge’ga o‘tgan.

Chelsea nafaqat o‘yin uslubini, balki butun boshqaruv madaniyatini ham janubiy sohil klubidan “import” qilayotgandek.

BlueCo siyosatidagi keskin burilish

BlueCo davrida Chelsea strategiyasi oddiy edi: dunyoning eng iqtidorli yoshlarini to‘plab, ularni klub ichida yetishtirish. Ba’zi loyihalar ish berdi, lekin umumiy natija kutilgan darajaga chiqmagan.

Endi esa yuqorida o‘tirganlar xatoni tan olayotgandek. Alonso tayinlangani ham shundan dalolat. Klub nihoyatda talabgir, taktik jihatdan murakkab murabbiyni qo‘lga kiritdi va endi uning futbolchilar tanloviga ham quloq tutmoqda.

Yoz boshida Granit Xhaka nomi paydo bo‘lganda, bu burilishning ilk signali edi. Lacroix bilan muzokaralar ham o‘sha yangi yo‘lning davomi. Endi navbat Welbeckka kelgan.

Bu transfer ko‘pchilikni hayratga solishi mumkin, ammo ichida mantiq bor: u har haftada asosiy tarkibda bo‘ladigan yulduz emas, lekin murabbiyga tayyor, tajribali, bosimi baland pallalarda sinovdan o‘tgan variantni beradi.

Henderson, Xhaka va Alonso rejalari

Yana bir qiziq chiziq: Chelsea yozda Granit Xhaka bilan jiddiy qiziqdi, endi esa Jordan Henderson nomi tilga olinmoqda. Bu esa klubning o‘rtacha yoshni ko‘tarish istagi tasodif emasligini ko‘rsatadi.

Qiziq tomoni – Alonso ixtiyorida allaqachon Moises Caicedo va Enzo Fernandez bor, ular jamoaning eng tajribali o‘yinchilaridan sanaladi. Sog‘lom mantiq bilan qaralsa, “donishmand boshlar” aynan yarim himoyaga emas, boshqa chiziqlarga kerakdek tuyuladi. Lekin murabbiy boshqacha o‘ylayapti.

Alonso Bayer Leverkusen’da Florian Wirtz kabi yosh iste’dodlarni portlatib yuborgan murabbiy sifatida tanilgan. Shunga qaramay, u hozirgi Chelsea uchun faqat kelajak emas, “hozir” ham kerakligini juda yaxshi tushunadi. Shuning uchun Henderson, Xhaka, Welbeck kabi nomlar paydo bo‘lyapti.

Yozgi bozor: katta nomlar, katta qarorlar

Chelsea bu yozda allaqachon jiddiy ish qildi. Kirganlar ro‘yxati buni ochiq ko‘rsatadi:

• Morgan Rogers – Aston Villa’dan, 117 million funt
• Geovany Quenda – Sporting’dan, 43,5 million funt
• Marco Palestra – Atalanta’dan, 43 million funt
• Denner – Corinthians’dan, 8,7 million funt
• Dastan Satpaev – Kairat Almaty’dan, 2,1 million funt
• Emmanuel Emegha – Strasbourg’dan, to‘lov oshkor qilinmagan

Ketganlar ham kam emas:

• Marc Cucurella – Real Madrid’ga, 51,8 million funt
• Andrey Santos – Man Utd’ga, 50 million funt
• Tyrique George – Everton’ga, 24 million funt
• Jimmy-Jay Morgan – West Brom’ga, 4 million funt

Bu ro‘yxat bir narsani aniq aytadi: BlueCo tajribadan butunlay voz kechmagan, faqat endi uni boshqacha talqin qilmoqda. Ular hali ham yulduzli yoshlarni olib kelishmoqda, lekin Alonso kelishi bilan bu mozaikaga nihoyat tajribali bo‘laklar qo‘shila boshladi.

Endi savol bitta: Welbeck kabi veteranlar, ehtimol Henderson singari nomlar bilan birga, Chelsea’ni yana yuqori pog‘onaga olib chiqishga yetadimi yoki bu faqat yana bir keskin burilish bo‘lib qoladimi?