Chempionlik poygasi: Arsenal va Manchester City ustunligi
Atigi to‘rt tur o‘tdi. Mavsum endi-enda qiziyotgandek. Ammo turnir jadvaliga bir qarash kifoya: yuqorida yana ikki tanish nom – Arsenal va Manchester City. Oxirgi to‘rt mavsumning uchtasida birinchi ikkilikka aylanib ulgurgan juftlik bu safar ham boshqalardan bir pog‘ona balandroq ko‘rinmoqda.
Savol tug‘iladi: chempionlik uchun kurash shundoq ham erta ikki jamoaga qisqarib bo‘ldimi?
Arsenal: chempionning ohangi
Arsenal mavsumni chempion sifatida boshladi. Mikel Arteta boshchiligidagi jamoa o‘tgan yil 22 yillik tanaffusdan keyin nihoyat chempionlikka yetib borgan, ko‘pincha “attritsion”, ya’ni raqibni asta-sekin ezib boradigan uslubda o‘ynagani aytilgan edi.
Yozda Community Shield’da Manchester City ustidan 3:0 hisobidagi ishonchli g‘alaba – bu yangi mavsumga berilgan kuchli signal bo‘ldi. Bu shunchaki kubok uchun o‘yin emasdi, kuchlar nisbatini eslatib qo‘ygan bayonot edi.
Keyin esa ishni ligada ham davom ettirishdi: Coventry, Aston Villa, Chelsea va Sunderland ketma-ket mag‘lub bo‘ldi. Chempionlar Ligasi sahnasida esa Napoli taslim etildi. Natija – barcha turnirlarni qo‘shib hisoblaganda, ligadagi g‘alabalar seriyasi to‘qqiz o‘yinga cho‘zildi. Arsenal 90 daqiqalik o‘yinda oxirgi marta 19 aprel kuni aynan Cityga yutqazgan.
Raqamlar ham mudofaa qanchalik mustahkamligini ko‘rsatadi: liga startida atigi bitta gol o‘tkazib yuborilgan. Hujumda Brighton (13 gol) va Chelsea (10) ko‘proq urgan bo‘lsa-da, chempionlar o‘z o‘yinini natijaga juda sovuqqonlik bilan aylantiryapti.
Shu bilan birga, “to‘pchilar”ning o‘yini raqamlar bo‘yicha hamma narsani yanchib tashlayotgan darajada emas: zarbalar soni bo‘yicha atigi 10-o‘rin, raqib jarima maydonchasidagi tegishlar bo‘yicha esa oltinchi. Ammo hozircha bu yetarli – eng muhimi, ochkolar maksimal.
City: Guardiola’siz yangi bob, lekin eski talab
Manchester City uchun bu mavsum yangi davr. Pep Guardiola o‘n yil ichida olti chempionlik va Treble bilan tarix yozib, klubni tark etdi. Uning sobiq yordamchisi Enzo Maresca endi boshqaruv pultida.
Qiziq jihat: City mavsumni Community Shield’da Arsenalga yutqazib boshladi, ammo ligadagi javobi keskin bo‘ldi – to‘rt o‘yinda to‘rt g‘alaba. Bournemouth, Crystal Palace, Coventry va Chempionlar Ligasida Porto – barchasi navbatma-navbat yiqildi.
Eng ko‘p bahs-munozara uyg‘otgan o‘yin esa, albatta, yakshanba kungi Manchester derbisi bo‘ldi. Old Trafford’da United ustidan 1:0 hisobida qozonilgan g‘alaba Erling Haalandning yagona goli bilan keldi. Keyinroq Premier League hakamlik organi bu gol ofsayd tufayli bekor qilinishi kerakligini tan oldi. Ammo natija o‘zgarmaydi, City ochkolarni qo‘lga kiritdi.
Himoyada ular ham deyarli xato qilmayapti – atigi ikki gol o‘tkazib yuborilgan. Hujumda esa Arsenal singari sakkizta gol. Zarbalar bo‘yicha 11-o‘rin, raqib jarima maydonchasidagi tegishlar bo‘yicha beshinchi. Ya’ni bu jamoa ham raqibni “yanchib” emas, balki nazorat, ritm va aniqlik orqali bo‘g‘ayapti.
“Katta to‘rtlik”dagi yangilanish: umid ko‘p, ishontiradigan o‘yin kam
Bu orada boshqa grandlar yangi yoki deyarli yangi murabbiylar bilan yangi sahifani ochishga urinmoqda.
Chelsea va Liverpool yozda murabbiy almashtirdi: Stamford Bridge’da Xabi Alonso, Anfield’da esa Andoni Iraola ish boshladi. Manchester United va Tottenham esa 2026 yil boshida o‘zgarish qilgan, Michael Carrick va Roberto de Zerbi endi ilk to‘liq mavsumini o‘tkazmoqda.
O‘tgan mavsumni eslasak, manzara ancha tartibsiz edi: Chelsea – 10-o‘rin, chempion sifatida start olgan Liverpool – 5-o‘rin, Tottenham – 17-o‘rin, United esa Carrick qo‘l ostida yomon startdan keyin 3-o‘ringa ko‘tarilgandi. Shuning uchun bu yozda hammasi uchun umid katta edi.
Hozir-chi?
Chelsea beshinchi o‘rinda. To‘rt o‘yinda atigi bitta mag‘lubiyat, 10 ta gol urilgan, lekin 9 ta gol o‘tkazib yuborilgan – bu ligadagi to‘rtinchi eng yomon ko‘rsatkich. Eng qizig‘i, 2015–16 mavsumidan beri ilk bor “ko‘klar” Premyer Liga startidagi dastlabki to‘rt o‘yinning har birida kamida ikki tadan gol o‘tkazdi. Hujum ishlayapti, lekin himoya haligacha qurilish maydoni holatida.
Liverpool yettinchi. Mag‘lubiyatsiz, lekin to‘rtta o‘yinning uchtasi durang. Bu klub uchun bu darajada sust start kamdan-kam uchraydi: so‘nggi 63 mavsumda atigi uchinchi marta ular dastlabki ikki uy uchrashuvida ham g‘alaba qozona olmadi. Anfield odatda raqibni yutib yuboradigan joy edi, hozir esa tomoshabinlar sabr bilan kutmoqda.
United esa 13-o‘rinda. To‘rt ochko – bu ularning Premyer Liga tarixidagi eng yomon starti bilan teng (1992–93 va o‘tgan mavsum darajasida). Qiziq paradoks: ular ligada eng ko‘p zarba bergan jamoa – 84 ta. Eng kam zarbaga yo‘l qo‘yganlar qatorida ham – 41 ta bilan ikkinchi. Lekin natija – yetti gol urib, yettitasini o‘tkazib yuborish. Raqamlar yaxshi, hisoblardagi sonlar esa sovuq.
Tottenham? Ular ketma-ket ikki mavsumni 17-o‘rinda yakunlaganidan keyin chempionlik haqida o‘ylamagan bo‘lishi mumkin, ammo hech bo‘lmaganda barqaror startni kutishgan edi. Hozir esa yana 17-o‘rin. Eng achinarlisi – klub tarixida ilk bor liga startidagi dastlabki to‘rt o‘yinda birorta ham gol urilmadi. Bu nafaqat statistik fakt, balki ruhiy zarba.
Raqamlar nima deydi? Erta start – kafolat emas
Arsenal va City to‘rt o‘yindan keyin 12 ochko bilan yolg‘iz peshqadamlar. Ular uchinchi o‘rindagi Hull Citydan allaqachon to‘rt ochkoga uzilib ketgan. Hull ajoyib start qilgan bo‘lsa-da, o‘zini chempionlik poygasida deb tasavvur qilmayotgandir. Qolganlarning ortda qolishi esa yanada sezilarli – besh ochko.
Tarix esa sovuqqon: Angliya oliy ligasi tarixida 80 ta jamoa mavsumni ketma-ket to‘rtta g‘alaba bilan boshlagan. Ulardan atigi 24 tasi chempion bo‘lgan. Demak, bunday start – afzallik, lekin hukm emas.
Premyer Liga davrida esa statistika yanada torayadi: to‘rtinchi turgacha barcha o‘yinlarda g‘alaba qozongan 28 jamoaning faqat to‘qqiztasi mavsum oxirida kubokni ko‘targan. Eng so‘nggi misol – 2023–24 yildagi Manchester City.
Yana bir qiziq nuqta: ligada faqat olti mavsum bo‘lganki, unda kamida ikki jamoa dastlabki to‘rt uchrashuvini ketma-ket yutgan. Bu yil shunday kamyob manzara yana takrorlanmoqda.
Ikki ot yetakchimi yoki poyga endi boshlanmoqda?
Arsenal va City hozircha barqarorlik, intizom va natija borasida boshqalardan aniq ustun. Ularning o‘yini raqamlar bo‘yicha hamma narsani vayron qilmayapti, lekin turnir jadvali gapni o‘zi aytyapti: to‘liq ochkolar, kuchli himoya, muhim lahzalarda sovuqqonlik.
Orqada qolgan “katta”lar esa hali o‘zini topgani yo‘q. Kimdir ko‘p gol urib, ko‘p o‘tkazmoqda, kimdir imkoniyat yaratib, uni yakunlay olmayapti, kimdir esa hatto darvozani ishg‘ol qilishni ham unutgandek.
Mavsumning to‘rtinchi turida chempionlik poygasini yopib qo‘yish – xato bo‘lishi mumkin. Lekin bir savol baribir quloqni qitiqlaydi: agar bu ritm saqlanib qolsa, kim va qachon Arsenal va Cityni haqiqiy ma’noda ushhlay oladi?
