Barcelona sardorlik bo‘shlig‘i: Ter Stegen ketdi, kim navbatda?
Barcelona kiyinish xonasida yozgi transferlardan ham keskinroq o‘zgarish bo‘lyapti. Ter Stegenning kutilmagan tarzda Ajaxga ijaraga ketishi, Ronald Araujo esa Liverpool bilan bog‘lanib qolayotgani klubning sardorlik zanjirini butunlay buzib yubordi. Bir paytlar aniq ko‘ringan ierarxiya endi qayta chizilmoqda.
O‘tgan mavsum oxirigacha tartib ravshan edi: Ter Stegen, Araujo, Frenkie de Jong, Raphinha va Pedri – Flick uchun tabiiy tayanchlar. Endi esa bu ro‘yxat qog‘ozdan yirtilib tashlangandek. Nemis murabbiy jamoa ichidagi yetakchilarni boshidan tanlashga majbur.
Frenkie – “birinchi raqam”mi yoki muammo markazimi?
Mantiqan qaralganda, birinchi sardorlik kamari Frenkie de Jongga tegishi kerak. Tajriba, maydondagi vazifasi, jamoa ichidagi og‘irligi – hammasi bunga ishora qiladi. Lekin bitta katta “ammo” bor.
Niderlandiyalik yarim himoyachi jarohat bilan kurashmoqda. Uning tiklanish jarayoni atrofida klub ichida keskin bahslar ketayotgani aytilmoqda. Rahbariyat Frenkiening o‘zini Jahon chempionatiga tayyorlashni klub majburiyatlaridan ustun qo‘yayotganidan norozi bo‘lgani haqida xabarlar chiqqan. Bunday fon ostida unga sardorlik bog‘ichini ishonib topshirish – xavfli qaror.
Shu bois De Jong tabiiy nomzod bo‘lsa-da, hozircha aniq yechim emas.
Raphinha – maydondan tashqarida ham yetakchiga aylangan braziliyalik
Aynan shu nuqtada Raphinha sahnaga chiqadi. Mundo Deportivo ma’lumotiga ko‘ra, braziliyalik hujumchi nafaqat o‘yinlari, balki xarakteri bilan ham kiyinish xonasida eng ta’sirchan figuralardan biriga aylanib ulgurgan.
Uning maydondagi agressivligi, o‘ziga bo‘lgan ishonchi va jamoadoshlari bilan munosabati Raphinhani Flick ko‘zida real sardorlik nomzodiga aylantirgan. U ko‘p gapirmaydi, lekin gapirsa – tinglashadi. Ayniqsa, tajribali ustunlar birin-ketin ketayotgan paytda bunday obraz yanada qadrli.
De Jongning holati noaniq bo‘lib qolayotgan bir paytda, Raphinha muntazam ravishda sardorlik bog‘ichini taqib yuradigan futbolchiga aylanishi ehtimoli tobora kuchaymoqda.
Pedri, De Jong, Raphinha – uchlik tayanch, lekin yana ikkitasi kerak
Rejada shunday ko‘rinish paydo bo‘lmoqda: De Jong, Raphinha va Pedri – sardorlik guruhining uch asosiy ustuni. Pedri hanuz yosh, lekin Barcelona uchun ramziy figura, maydondagi qarorlar tezligi va o‘yinni his etishi bilan allaqachon “kattalar” qatoriga kirib bo‘lgan.
Shunga qaramay, klub an’anaviy besh kishilik sardorlar guruhini to‘ldirish uchun yana ikki nom izlamoqda. Bu yerda asosiy favoritlardan biri – Eric Garcia.
Eric Garcia va La Masia ruhi
Eric Garcia – hozircha asosiy yulduzlar qatoriga kirmagan bo‘lishi mumkin, lekin uning profili Barcelona falsafasiga juda mos. Sobiq Man City himoyachisi yuqori bosim ostidagi o‘yinlarga ko‘nikkan, eng muhimi – La Masia tarbiyalanuvchisi.
Bu ildizlar, bu tarbiya uni klub qadriyatlarini so‘zsiz tushunadigan futbolchiga aylantiradi. Sardor faqat eng kuchli o‘yinchi bo‘lishi shart emas; u klub nimani anglatishini biladigan, yoshlarga yo‘l ko‘rsata oladigan figuradir. Garcia shu jihatdan Flick qo‘lida qulay variant.
Gavi – yosh, lekin “Barcelona DNK”si bilan
Ikkinchi ehtimoliy nomzod – Gavi. Yoshi atigi 22 bo‘lsa-da, bir necha mavsumdan beri asosiy tarkibda, yirik sahnada. Uning o‘yini – Barcelona uchun odatiy bo‘lgan nafislik emas, balki boshqa bir narsa: shafqatsiz intensivlik, to‘xtamas jang, har bir epizodda maksimal ehtiros.
Gavi ko‘pincha klub identiteti haqida gap ketganda tilga olinadigan fazilatlarni o‘zida jamlagan: jasorat, maydonda yonib o‘ynash, raqibdan qo‘rqmaslik. Yosh bo‘lishiga qaramay, sardorlik guruhiga kiritilishi jamoaga kuchli signal bo‘lardi – yangi davr, yangi avlod mas’uliyatni o‘z zimmasiga olayotganidan darak.
Flick uchun vaqt siqilyapti
Klub rahbariyati va Hansi Flick uchun bu qarorlar cho‘zib bo‘lmaydigan masala. Rasmiy mavsum boshlanishidan oldin sardorlik guruhi aniq bo‘lishi kerak. Yoshlar bilan to‘la, qayta qurilayotgan jamoada murabbiy bilan futbolchilar o‘rtasidagi ko‘prik aynan shu yetakchilar bo‘ladi.
Ular nafaqat hakam yoniga chiquvchi rasmiy sardorlar, balki intizom, ichki tartib va kayfiyat uchun javobgar guruhga aylanadi. Har bir mashg‘ulotda, har bir safarda, har bir og‘ir lahzada.
Hozircha De Jong avvalgi tsikldan qolgan eng yirik figura bo‘lib turibdi. Lekin uning jarohati va kelajagi borasidagi savollar fonida haqiqiy yuk Raphinha va La Masia farzandlari – Pedri, Gavi, ehtimol Eric Garciaga tushadi.
Barcelona uchun savol endi shunday: yangi sardorlar guruhi bu bosimni ko‘tara oladimi yoki klub navbatdagi qayta qurilish davrida yana bir bor xarita chizishga majbur bo‘ladimi?
