Aston Martinning umidi: Honda motori Zandvoortda qanchalik kuchli bo‘ladi?
2026-yilgi yangi reglament davri Aston Martin Aramco Formula 1 jamoasini ayamay urdi. Mavsum startidan beri Silverstone bazasida bir savol aylanyapti: qayerdan tezlik topamiz?
Vengriyada javob izlandi. Jamoa nihoyat B-spec AMR26 shassisini ishga tushirdi, va u darhol kichik bo‘lsa-da natija berdi: Fernando Alonso Q2ga yo‘l oldi va mavsumdagi eng yuqori – 16-pog‘onani qo‘lga kiritdi. Qog‘ozda bu unchalik hayratlanarli ko‘rinmasligi mumkin, lekin bu mashina uchun bu – nafas olishga teng.
Ammo haqiqiy hikoya karoseriya ostida, dvigatel qopqog‘i ichida pishmoqda.
Honda quvvati: paddokni larzaga keltirgan raqamlar
Hungaroringda yaqinda o‘tkazilgan 200 km lik “filming day” paytida Honda o‘zining yangilangan quvvat qurilmasini ilk bor yo‘lga tushirdi. Rasman debyut – Zandvoortda. Shundan keyin mish-mishlar portladi.
Ijtimoiy tarmoqlar, italyan OAVlari, paddokdagi “insayder”lar – hamma o‘z raqamini aytmoqda. Gap bitta savol atrofida: bu kichik qadammi yoki mavsumni ag‘darib yuboradigan sakrashmi?
Bahs markazida ikkita asosiy ko‘rsatkich turibdi.
AutoRacer Italia xabariga ko‘ra, yangi Honda spetsifikatsiyasi taxminan 35 ot kuchi qo‘shishi kerak. Paddokdagi klassik hisob-kitob bo‘yicha bu atigi 0,5 soniya atrofida. Shu raqamni boshqa F1 agregatorlari ham qo‘llab-quvvatladi.
Ammo boshqa frontda raqamlar balandroq. Motorsport Italia materiallarida yangilangan dvigatel 40 ot kuchi atrofida qo‘shimcha quvvat berishi mumkinligi tilga olingan. O‘sha mashhur “Mercedes compression saga”si – 15 ot kuchi 0,25–0,30 soniya foyda bergan – misol sifatida olinmoqda. Shundan kelib chiqib, ayrim texnik tahlilchilar AMR26 uchun aqlni chalg‘itadigan 0,6–0,8 soniyalik yutuqni chizib qo‘ymoqda.
Ba’zi italyan ekspertlari, jumladan Franco Nugnes, hatto 50 ot kuchi ehtimolini ham tilga olgan. Ularning fikricha, agar bu ssenariy ish bersa, Aston Martin nihoyat Racing Bulls, Alpine va Audi bilan “midfild” jangiga qaytishi mumkin.
Qoidalar o‘yinini qanday yutish mumkin?
Bu kabi sakrashni mavsum o‘rtasida qanday qilib qonuniy yo‘l bilan qilish mumkin? Savol shu.
2026-yilgi dvigatel reglamenti ishlab chiqaruvchilarni deyarli qo‘l-oyog‘idan bog‘lab qo‘ygan. Biroq Honda yilni orqada boshlagani uchun o‘zining birinchi ADUO (Additional Development and Upgrade Opportunities) tokenidan foydalanmoqda. FIA tomonidan joriy etilgan bu “catch-up” tizimi ortda qolayotgan dvigatel yetkazib beruvchilarga apparatni sezilarli darajada qayta ishlashga ruxsat beradi.
Honda trek bo‘yicha bosh menejeri Shintaro Orihara ta’kidlaganidek, yoz fasli asosan “yonishni optimallashtirish va ishqalanish yo‘qotishlarini kamaytirish”ga bag‘ishlangan. Nazariy jihatdan aynan shu ikki yo‘nalish ularga qo‘shimcha ot kuchlarini ochib berishi kerak.
Ammo raqamlar haqiqatan ham shuncha vaqtga tengmi?
35 ot kuchi, 40 ot kuchi – vaqtga tarjima
Zamonaviy Formula 1 da oddiy chiziqli matematika kamdan-kam ishlaydi. Paddokda yillar davomida shakllangan texnik “qoida” bor: o‘rtacha trassada 10 ot kuchi odatda 0,15–0,20 soniya atrofida.
Shu mezon bilan qaraymiz.
35 ot kuchi ssenariysi. Standart paddok hisob-kitobiga ko‘ra, 35 ot kuchi 0,52–0,70 soniya oralig‘ida yutuq beradi. Demak, ko‘p tilga olinayotgan 0,5 soniya – ayniqsa yuqori “prijimnoy” va burilishlarga boy Zandvoort kabi trassada – mutlaqo real ko‘rinadi. Bu yerda sof quvvat biroz “bo‘g‘iladi”, shuning uchun dvigatelning har bir qo‘shimcha ot kuchi aerodinamik balans bilan birga ishlashi kerak.
40 ot kuchi ssenariysi. Raqamni 40 ga olib chiqadigan bo‘lsak, nazariy maksimal foyda – 0,8 soniya atrofida (o‘sha Mercedes davridagi 1 ot kuchi = 0,02 soniya koeffitsientidan kelib chiqib). Lekin havo qarshiligi tezlik oshgani sari keskin ko‘payadi. Mashina to‘g‘ri yo‘laklarda tezlashgani sari shu tezlikni ushlab turish uchun yanada ko‘proq quvvat talab etiladi. Shuning uchun to‘liq 0,8 soniya kutish – haddan tashqari optimistik.
Bu faqat mexanika emas. 2026-yilgi quvvat bloklari ichki yonuv dvigateli va MGU-K o‘rtasida murakkab 50/50 taqsimotga tayanadi. Yonishdan keladigan pik ot kuchi oshishi befoyda bo‘lishi mumkin, agar mashina to‘g‘ri yo‘lak oxirida elektr energiyasidan erta “qirqib” qo‘yayotgan bo‘lsa. MGU-K zaxirasi tugasa, dvigatel qanchalik kuchli bo‘lishidan qat’i nazar, maksimal tezlik chegaralanadi.
Shu nuqtada savol o‘zgaradi: Honda faqat quvvat qo‘shdimi yoki energiya taqsimotini ham qayta o‘yladimi? Rasmiy ma’lumotlar yo‘q, ammo real foyda aynan shu balansi qanchalik yaxshi sozlanganiga bog‘liq bo‘ladi.
Vibratsiyalar, ishonchlilik va Aston Martinning uyg‘onish umidi
Yil boshida Honda’ni qiynagan asosiy dardlardan biri – og‘ir vibratsiyalar va u bilan bog‘liq ishonchlilik muammolari edi. Agar ular shu “kasallik”ni bartaraf etgan bo‘lsa va shu bilan birga haqiqiy 35 ot kuchini ochgan bo‘lsa, 0,5 soniyalik sakrash – juda ishonchli maqsad.
Bu Alonso uchun birdan podium degani emas. Lekin bu – nihoyat yo‘lning oxirida chiroq ko‘rinishi mumkinligini anglatadi.
Vengriyadagi B-spec shassisi allaqachon kichik, lekin sezilarli aerodinamik foyda bergani ko‘rindi. Uni dvigatel tarafidan yarim soniyalik yutuq bilan qo‘shib hisoblasak, Aston Martin o‘zining 2026-yilgi dahshatli tushidan asta-sekin uyg‘onishni boshlashi mumkin.
Endi hammasini bitta savol belgilaydi: Zandvoortdagi soat qaysi raqamni ko‘rsatadi?
