Arteta: Kelajagim haqida xavotir olmang
Londonning shimoliy qismida, bir yil oldin 22 yillik tanaffusdan so‘ng kutilgan chempionlikni nishonlagan klubda yana bir mavsum boshlanmoqda. Tribunalar orasida esa bitta savol aylanardi: Mikel Arteta qoladimi?
Javobni murabbiy o‘zi aniq qilib qo‘ydi.
“Ular bu haqda xavotirlanishmaydi. Men bu yerda bo‘lishni xohlayman, juda baxtliman”, – dedi Arteta matbuot anjumanida, oldinda turgan Community Shield oldidan.
Shartnoma – kun tartibidagi asosiy mavzu emas
Artetaning amaldagi shartnomasi 2024 yilda imzolangan bo‘lib, u endi so‘nggi 12 oyiga kirgan. 2026–27 yilgi mavsum boshlanishiga qadar yangi kelishuv e’lon qilinmagani ayrim muxlislarni bezovta qilishi tabiiy edi.
Ammo klub ichkarisida vahima yo‘q. Arteta ham shoshilmayapti, bu mavzuni sun’iy ravishda markazga olib chiqishni istamaydi.
“Har doim boshqa birinchi navbatdagi ustuvor vazifalar bo‘ladi, biz ham shunday munosabatda bo‘lib kelyapmiz, – dedi u. – Hamma o‘zini qulay his qilayotgani uchun shartnoma muddati muammo bo‘lmaydi deb o‘ylayman. Mening istagim – shu yerda qolish, bu yerda juda baxtliman. Klubdan oladigan hissiyotim ham xuddi shunday. Shuning uchun hammasi tabiiy tarzda ketmoqda”.
Chempionlardan keyingi qurilish
O‘tgan mavsumda Premier League tojini qaytarib olgan Arsenal endi shu darajani saqlab qolish va undan ham yuqoriga sakrashga urinmoqda. Chempionlar Ligasida finalgacha yetib borib, Paris St-Germain qarshisida yutqazilgan o‘yin klub ichida tamoman boshqa darajadagi ishtiyoqni uyg‘otdi.
Arteta bu ambitsiyani yashirmaydi.
“Men alohida futbolchilar haqida gapirmayman. Lekin klubning ishtiyoqi haqida ayta olaman: u katta. Biz tarkibni yaxshilashni, uni keyingi bosqichga olib chiqishni xohlaymiz. Kuchaytirish mumkin bo‘lgan nuqtalarni aniqladik, hozir ana shu ustida ishlayapmiz”, – dedi u.
Transfer bozori bu so‘zlarning tasdig‘iga aylangan.
Vinicius Jr uchun qilinagan urinish natija bermadi, ammo Arsenal boshqa yo‘nalishdan zarba berdi: Newcastle’dan Bruno Guimaraes, Club Brugge safidan kelgan Gretsiya terma jamoasi vingeri Christos Tzolis va Bayer Leverkusen bilan bog‘langan Piero Hincapie transferi – endi to‘liq sotib olingan kelishuv. Uchalasiga birgalikda 143,5 million funt sarflandi.
Darvozaga ham yangilik: Leeds United bilan shartnomasi tugagan Illan Meslier erkin agent sifatida kelib qo‘shildi.
Bu keluvlar fonida ayriliqlar ham bo‘ldi. O‘tgan mavsum tarkibida bo‘lgan Leandro Trossard, Jakub Kiwior va Christian Norgaard bilan xayrlashildi. Arteta jamoasini yengillashtirib, raqobatni keskinlashtirmoqda.
Himoya chizig‘iga zarurat
Arsenalning yozgi rejalarini jarohatlar ham shakllantiryapti. William Saliba va Jurrien Timberning safdan chiqishi himoya chizig‘ini qayta o‘ylashga majbur qildi. Klub Aston Villa markaziy himoyachisi Ezri Konsa yoki Bayer Leverkusen futbolchisi Jarell Quansah bilan qiziqishda davom etmoqda.
Bu qiziqish shunchaki bozor shovqini emas, balki chempionlikni saqlab qolish uchun zarur ehtiyot chorasi sifatida ko‘rinmoqda. Arteta tizimida himoyachilar nafaqat to‘pni qaytaradi, balki hujumni boshlaydi, pressingni yo‘lga qo‘yadi, butun strukturaning yuragi bo‘lib xizmat qiladi.
Shuning uchun ham bu bo‘limdagi bitta jarohat butun sxemani larzaga keltirishi mumkin. Klub buni yaxshi tushunadi.
Wembley arafasidagi xotirjamlik
Yakshanba kuni (15:00 BST) Arsenal Community Shield bahsida Manchester City bilan to‘qnash keladi. Odatda bu o‘yin mavsum oldi sinovi sifatida ko‘riladi, lekin bu safar yana bir ramziy ma’no bor: chempionlikni qo‘lga kiritgan jamoa endi o‘zini doimiy da’vogar sifatida tasdiqlashi kerak.
Shu fon’da murabbiyning kelajagi haqida savollar tabiiy tuyuladi. Ammo Arteta xotirjam. U uchun hozirgi ustuvor vazifa – yangi kelganlarni tizimga singdirish, jarohatlar fonida balansni topish va o‘tgan mavsum yakunida qo‘lga kiritilgan ritmni yo‘qotmaslik.
Arsenal oxirgi yillarda nihoyat o‘ziga xos yo‘l topgandek. Endi savol bitta: bu yo‘lni kim boshqaradi – hozirgi chempion murabbiy Artetami yoki bozor vaqti o‘tib, boshqa bir davr boshlanadimi?
Murabbiy javobni allaqachon aytdi. Endi navbat klubda. Va, albatta, maydonda.
