Arsenal chap qanotini qayta qurmoqda: Antonio Nusa va Morgan Rogers
Mikel Arteta yozgi bozorni sekinlashtirish niyatida emas. Hujum chizig‘iga tezlik, ijodkorlik va chuqurlik qo‘shish — klubning asosiy vazifasi. Ayniqsa, endi chap qanot masalasi yanada keskinlashdi.
Leandro Trossardning kutilmagan tarzda Besiktasga yo‘l olishi bilan Arsenal tarkibida tabiiy chap vinger sifatida faqat Gabriel Martinelli qoldi. Bir mavsumda chempionlikni himoya qilish, ichki kuboklar va Yevropa frontida kurashish uchun bu juda qisqa variant.
Shu fon’da London klubi bozorga agressiv kirib keldi.
Antonio Nusa uchun kurash: Arsenal – Liverpool dueli
Arsenal hozir Antonio Nusa atrofida qizigan poygada. RB Leipzig qanot hujumchisi 2026 yilgi Jahon chempionati ortidan Yevropa bozoridagi eng talabgir yosh iste’dodlardan biriga aylandi.
Norvegiya terma jamoasi bilan chorak finalgacha yetib borgani, ayniqsa Kot-d’Ivuar darvozasiga kiritgan yakka-yakka reydi bilan e’tiborni o‘ziga tortdi. Portret oddiy: 21 yosh, portlovchi tezlanish, himoyachilarga qarshi qo‘rqmas dribling, birga-bir vaziyatlarda tashabbusni o‘z qo‘liga olishga tayyor xarakter.
Arsenalning rejasi aniq: yangi ma’lumotlarga ko‘ra, London klubi Nusa uchun ilk taklif sifatida 40 million yevro atrofidagi paketni tayyorlamoqda. Lekin bu yerda to‘siq katta. RB Leipzig ichki bahosini ancha yuqori qo‘ygan — 60 million yevroga yaqin summa tilga olinmoqda. Shunday sharoitda har bir million muzokarada bosim vositasiga aylanadi.
Liverpool ham chetda turgani yo‘q. Merseysaydlilar Nusa’ni Yan Diomande o‘rniga nisbatan arzonroq va istiqbolli variant sifatida ko‘rayotgani aytilmoqda, ayniqsa Leipzigdan boshqa bir maqsadni olib kelish urinishlari barbod bo‘lgach. Endi ikki grand bitta yosh vinger uchun to‘qnash kelmoqda. Kim tezroq va qat’iyroq qaror qiladi — o‘sha yutadi.
Arteta uchun chap qanot – “majburiy” zona
Trossard ketganidan so‘ng Arteta deyarli ochiq matnda: chap qanotga yangilik kerak, degan holatga tushdi. Martinelli – ishonchli, lekin yolg‘iz. Bir jarohat, bir forma pasayishi — va butun tizim izdan chiqishi mumkin.
Shu nuqtada Nusa qiziqarli yechim bo‘lib ko‘rinadi. U Martinelliga o‘xshash agressivlikni, lekin boshqa tipdagi portlovchanlikni taklif qiladi. Yoshligi hisobiga hali shakllanayotgan, murabbiy qo‘lida “tayyorlanadigan” o‘yinchi. Arteta aynan shunday profildagi futbolchilarni yoqtiradi: yuqori potentsial, taktika bo‘yicha qayta tarbiyalash mumkin, pressingda ishlashga tayyor.
Biroq klub ichida bir fikr aniq: agar Nusa keladigan bo‘lsa ham, bu Morgan Rogers poygasini to‘xtatmasligi kerak.
Morgan Rogers – hozirgi kun uchun tayyor qurol
Aston Villa hujumchisi bozorning boshqa qismida turibdi. U allaqachon Premier League ritmini his qilgan, yuqori temp, jismoniy kurash va murakkab taktik talablarga moslashgan. Rogers nafaqat chap qanotda, balki hujum ortida markazda ham ishlay oladi. Arteta tizimi uchun bu — katta ustunlik.
Arsenal rahbariyati uchun ideal ssenariy aniq ko‘rinadi. Rogers – darhol asosiy tarkibga kirib, birinchi kundan jamoa sifatini oshira oladigan o‘yinchi. Nusa esa Martinelli bilan sog‘lom raqobat yaratib, bosqichma-bosqich Yevropaning eng xavfli qanot hujumchilaridan biriga aylanishi mumkin bo‘lgan loyiha.
Bu ikki transfer bir-biriga zid emas, aksincha, bir-birini to‘ldiradi. Biri — bugun uchun. Ikkinchisi — ertaga uchun.
Chempionlikni himoya qilish uchun kerak bo‘lgan chuqurlik
Arsenal endi oddiy top-4 uchun emas, chempionlik mudofaasi uchun kurashmoqda. Bu butunlay boshqa bosim. Bir hafta ichida Premier League, keyingi kun Yevropa safarlari, ichki kuboklar — bularning barchasi rotatsiyasiz imkonsiz.
Arteta shuni yaxshi biladi: aynan qanotdagi chuqurlik ko‘p mavsumlarda chempionlik taqdirini hal qilgan. Ikki yuqori sifatli chap qanot variantiga ega bo‘lgan jamoa uzoq marafonda ustunlikka ega bo‘ladi.
Shu bois Arsenal yozgi transfer oynasida ikkita savolga javob topishi kerak: Antonio Nusa uchun kurashda qanchalik uzoqqa borishga tayyor va Morgan Rogers bo‘yicha qanchalik tez harakat qila oladi?
Kelasi mavsum javobni maydonning chap chizig‘i bo‘ylab beradi.
