Angliya cherkovi Jahon chempionati duosini himoya qildi
Angliya cherkovi ijtimoiy tarmoqlarda masxaraga aylangan Jahon chempionati duosini himoya qildi. Cherkov rahbariyati bu matn odatdagi dindorlar doirasidan tashqaridagi odamlarga yetib borish uchun ataylab yozilganini ta’kidladi.
Turnirning ilk kuni e’lon qilingan duo “Xudoning qo‘lini ko‘rish va nishonlash”ga chaqiradi, unda “yo‘lga kirmagan penaltilar, chalkash VAR qarorlari” ham tilga olingan. Matn ijtimoiy tarmoqlarda tez tarqaldi, ko‘pchilik uni “uyatli” deb atadi, boshqalar esa bu parodiya emasmi, deb savol berdi.
Shu hafta oxirida York shahrida bo‘lib o‘tadigan Bosh sinod yig‘ilishi arafasida a’zolar ushbu duo qanday yozilgani va kim tomonidan ma’qullangani bo‘yicha savollar yo‘lladi.
Oksford yeparxiyasidan ruhoniy Jeremy Moodey o‘z yozma savolida duoni “diniy savodsizlik” namunasiga o‘xshatdi va ayniqsa “Xudoning qo‘li” iborasini “omadsiz ishora” deb atadi. Bu ibora, tabiiyki, 1986-yilgi Jahon chempionatida Diego Maradona Angliya darvozasiga urgan mashhur, hanuzgacha bahsli bo‘lib kelayotgan golni eslatadi. O‘sha zarba Angliyani musobaqadan chiqarib yuborgan, Argentina esa oxirigacha yetib borib, chempion bo‘lgan edi.
Duo matnida “hamjihat va quvonchli Jahon chempionati” tilanadi va davomida shunday deyilgan: “Har bir egri chizilgan jarima zarbasida, mayin pasda yoki imkonsizdek tuyulgan seyvda Xudoning qo‘lini ko‘rish va nishonlash nasib etsin. Noto‘g‘ri tepishlar, yo‘ldan chiqqan penaltilar, chalkash VAR qarorlariga nisbatan ham rahm-shafqat va kengroq nigoh bera olaylik; har bir g‘olib jamoaga mag‘lub jamoa kerak – hatto siz yaxshiroq o‘ynagan bo‘lsangiz ham.”
Lichfield episkopi Michael Ipgrave, liturgik komissiya raisi sifatida bergan javobida, bunday matnlar “ilohiyot bo‘yicha malakali xodimlar tomonidan tayyorlanishi va ichki ko‘rib chiqish hamda tasdiqlash jarayonidan o‘tishini” aytdi. U ijtimoiy tarmoq X’da tanqidiy fikrlar bo‘lganini tan oldi, lekin duoning “Facebook’da, kengroq auditoriyaga chiqadigan maydonda, ancha ijobiy kutib olinganini” qo‘shimcha qildi.
Ipgrave cherkov kommunikatsiya jamoasi vazifasini shunday izohladi: ular cherkov missiyasini qo‘llab-quvvatlash uchun turli formatlarda materiallar ishlab chiqadi – targ‘ibot, shogirdlik, keng jamoatchilik bilan muloqot. Shu sababli, turli auditoriyalar va platformalar uchun uslub ham o‘zgaradi.
Uning aytishicha, aynan ijtimoiy tarmoqlar uchun yozilgan duo va matnlar odatdagi jamoat ibodatlarida ishlatiladigan rasmiy matnlardan ko‘rinishi va ohangi jihatidan sezilarli farq qilishi mumkin. Bunday paytda cherkov odatda o‘rganilmagan til va iboralarni ham sinab ko‘radi, biroz erkinroq, hatto yengil kayfiyatdagi ohangga o‘tadi.
Milliy miqyosdagi yirik voqealar – xususan, Jahon chempionati kabi turnirlar – cherkov uchun odatdagi auditoriyasidan tashqariga chiqish imkoniyati sifatida ko‘rilmoqda. Shuning uchun til ham, format ham ko‘proq kirishimli, norasmiy, hatto hazil aralash bo‘lishi mumkin.
Ipgrave yakunda shuni tan oldi: har qanday kontent hamma joyda bir xil qabul qilinmaydi. Jahon chempionati duosi bunga yorqin misol bo‘ldi – X’da tanqidlar, Facebook’da esa iliqroq munosabat. Savol esa ochiq qoladi: cherkov futbol maydoniga shu tarzda kirib kelishga davom etadimi yoki bu “Xudoning qo‘li” iborasi ular uchun ham ogohlantiruvchi signal bo‘lib qoladimi?
