Andoni Iraola: Liverpool Standart Vaziyatlarda Boshqacha Bo‘ladi
“Anfield”da yangi davr boshlanmoqda. Andoni Iraola nafaqat o‘z falsafasini, balki puxta sinovdan o‘tgan shtabini ham “Liverpool”ga olib keldi. Uning rejalarida bir narsa alohida turibdi: standart vaziyatlarda bu jamoa endi eski “Liverpool” bo‘lmaydi.
Bournemouthdan Anfieldgacha cho‘zilgan ishonch zanjiri
Iraola “Liverpool”ga kelishi bilan birga “Bournemouth”dagi eng yaqin hamkorlarini ham o‘zi bilan olib keldi. Ular — tasodifiy tanlov emas, yillar davomida shakllangan ishonch zanjiri.
Bolaligidan “Liverpool” muxlisi bo‘lgan Tommy Elphick va Shaun Cooper endi birinchi jamoa murabbiylari sifatida ishlaydi. Iraolaning eng yaqin safdoshi Pablo de la Torre esa assistent murabbiy sifatida kelgan. Darvozabonlar bilan ishlashni esa besh yil “Napoli”da faoliyat yuritgan Alejandro Rosalen zimmasiga olgan.
Pablo de la Torre bilan Iraola ilk murabbiylik ishidayoq — AEK Larnaca safida yonma-yon ishlagan. Keyin bu tandem “Rayo Vallecano”da davom etdi. Endi esa navbat “Anfield”ga kelgan.
Iraola uchun bu oddiy rotatsiya emas. U buni ochiq tan oladi: birinchi mavsumida o‘z yonida ishonchli odamlar bo‘lishi hal qiluvchi ahamiyatga ega.
“Men uchun ularning men bilan birga kelishi juda muhim edi. Pablo rasmiy lavozimiga ko‘ra jismoniy tayyorgarlik murabbiyi, lekin men murabbiylik qilgan deyarli barcha yillarda yonimda bo‘lgan. U men uchun shunchaki jismoniy tayyorgarlik murabbiyi emas, haqiqiy assistent. Bir-birimizni juda yaxshi bilamiz,” — deydi Iraola.
“Bournemouth”dagi omad va Ingliz futbolini tushunish
Iraola Angliyaga ilk kelganida hammasi silliq ketmagan. “Rayo Vallecano”dan uni ergashib kelishi kerak bo‘lgan assistenti Iñigo Pérez ish ruxsatnomasini ola olmagandi. Shunda sahnaga Tommy Elphick va Shaun Cooper chiqqan.
Iraola o‘sha davrni eslar ekan, “Bournemouth”dagi ichki tizim unga qanchalik tez moslashishga yordam berganini ta’kidlaydi.
“Bournemouth”ga kelganimda Tommy va Shaun bilan juda omadim kelgan. Iñigo bilan muammo bo‘ldi, u ish ruxsatnomasini ola olmadi. Keyin hammasi uning o‘zi uchun yaxshi yakunlandi — hozir u “Villarreal”ni boshqarayapti. Ehtimol, uni Chempionlar ligasida uchratarmiz,” — deydi u.
Shu bilan birga, u Elphick va Cooperning o‘sha paytdagi rolini alohida ajratib ko‘rsatadi:
“Tommy va Shaun bilan ishlay boshlagach, yana bir assistent olib kelish zarurati qolmadi. Ular juda tayyor edi, menga ingliz madaniyatini, futbolchilarning mentalitetini tushunishda katta yordam berdi. Ular o‘yinchilar nimaga o‘rganib qolganini, mashg‘ulotlarda nimalarni yoqtirishini, Ispaniyadan farqli bo‘lgan mayda detallarni ham tushuntirib berdi. Tommyning Aston Villa, Bournemouth, Brighton, Huddersfielddagi tajribasi ham bor. Ular futbolchilarga juda yaqin bo‘la oladi, o‘zlarini ularga yaqin his qilishadi. Men esa biroz kattaroqman, ayrim futbolchilar hatto o‘zim ham futbolchi bo‘lganimni bilmasligi mumkin.”
“Liverpool”ning og‘riqli nuqtasi: standart vaziyatlar
Yangi shtabning eng muhim vazifalaridan biri aniq: standart vaziyatlardagi zaiflikni yo‘qotish.
O‘tgan mavsumda “Liverpool” bu borada ligadagi eng yomon jamoalardan biriga aylandi. Faqat “Bournemouth” (26), “Crystal Palace” (25) va “Leeds” (24) standart vaziyatlardan ko‘proq gol o‘tkazib yuborgan. “Liverpool”ning o‘zi 23 ta golni aynan shu epizodlarda o‘tkazdi. Bu esa Arne Slotning klubdagi so‘nggi mavsumiga og‘ir dog‘ bo‘lib tushdi — u ilk yilidayoq chempionlikni qo‘lga kiritgan bo‘lsa-da, keyingi mavsumda aynan shunday zaifliklar unga qimmatga tushdi.
Iraola bu borada ham o‘z odamlariga tayanadi.
“Ular juda yaxshi murabbiylar. O‘yinni deyarli bir xil ko‘ramiz, lekin shtabda har birining o‘z roli bor. Standart vaziyatlarda ham yordam berishadi. Shu sababli ularni yonimda qoldirdim,” — deydi u.
Vazifalar aniq taqsimlangan:
“Tommy — himoyaviy standartlarda ishlaydi. Shaun — hujumkor, ijodiy variantlar ustida. Klubdagi standart vaziyatlar bo‘yicha analitik Lewis Mahoney bilan ham juda yaxshi ishlashyapti. U o‘tgan mavsumning ikkinchi yarmida juda yaxshi ish qildi. U allaqachon bu yerda, endi ular birga yangi narsalar ustida ishlashyapti.”
Nashvilledagi birinchi sinov va Anfielddagi katta savol
Iraola “Liverpool”ni ilk bor maydonga Shanba kuni, Nashville shahrida “Sunderland”ga qarshi o‘rtoqlik uchrashuvida olib chiqadi. Bu faqatgina premyera emas. Bu — yangi murabbiy shtabining birinchi ko‘rinishi, standart vaziyatlarda esa ilk signallar bo‘ladigan kecha.
“Anfield”da esa bitta savol allaqachon havoda muallaq: Iraola va uning “Bournemouth”dan kelgan ishonchli shtabi “Liverpool”ni nafaqat chiroyli o‘ynaydigan, balki standart vaziyatlarda ham sovuqqon va jazolaydigan jamoaga aylantira oladimi?
