Alissonning Bangladesh muxlislariga minnatdorchiligi
Futbolni sevadigan Bangladesh yana bir bor dunyo yulduzlarining e’tirofiga sazovor bo‘ldi. Bu safar sahnaga Braziliya darvozaboni Alisson Becker chiqdi va FIFA World Cup davomida o‘ziga ham, terma jamoasiga ham cheksiz mehr ko‘rsatib kelayotgan bangladeshlik muxlislarga yurakdan rahmat aytdi.
Yaqinda Argentina posboni Emiliano Martínez Bangladesh muxlislariga bo‘lgan hayratini ochiq bildirgan edi. Oradan ko‘p o‘tmay, Houston shahrida bo‘lib o‘tgan, Yaponiya ustidan dramatik g‘alabadan so‘ng Alisson ham xuddi shunday iliq munosabat bilan javob qaytardi.
U bangladeshlik jurnalistni ko‘rishi bilan yuzida tabassum paydo bo‘ldi. Savol berilishidan oldin darvozabonning o‘zi gap boshladi: “Nice, Bangladesh! Men sizning videolaringizni ko‘rdim. Rahmat, Bangladesh, bizni qo‘llab-quvvatlayotganingiz uchun”.
Alissonning o‘zi tan oldi: u ijtimoiy tarmoqlarda tarqalgan, Bangladesh bo‘ylab jahon chempionati paytidagi ajoyib muhitni aks ettirgan lavhalarni kuzatib borgan. Keng ko‘chalar, gavjum maydonlar, ulkan ekranlar, tun yarmida ham to‘xtamaydigan shovqin – bu manzara unga begona emas.
Yaponiya bilan o‘yin bunga yana bir yorqin misol bo‘ldi. Gabriel Martinelli kiritgan so‘nggi daqiqalardagi g‘alaba goli Bangladeshda tungi soat o‘rtalariga to‘g‘ri keldi. Lekin mamlakat bo‘ylab ko‘chalar jim qolmadi – xuddi o‘sha o‘yin Dhaka markazida o‘tkazilgandek, muxlislar bayramona nishonladi. Devorlarda hilpiragan Braziliya va Argentina bayroqlari, to‘xtamaydigan shiorlar, bir xil ritmda sakrayotgan olomon – bu manzara deyarli har bir Braziliya yoki Argentina o‘yinida takrorlanmoqda.
World Cup’ning Bangladeshdagi rasmiy translyatori bilan suhbat chog‘ida Alisson mamlakat muxlislariga alohida murojaat yo‘lladi.
“Ha, men videolarni ko‘rdim. Bangladesh xalqining barchasiga bizni qo‘llab-quvvatlagani uchun minnatdorchilik bildiraman. Biz braziliyaliklar sizni yaxshi ko‘ramiz. Rahmat. Xudo sizni asrasin”, – dedi u.
Bu iliq minnatdorchilik faqat Alisson bilan cheklanib qolmadi. Yaponiya darvozasiga hisobni tenglashtirgan va o‘yinning eng yaxshi futbolchisi sifatida e’tirof etilgan yarim himoyachi Casemiro ham uchrashuvdan so‘nggi intervyularida Bangladesh muxlislariga alohida rahmat aytib o‘tdi.
Braziliyaliklarning bu e’tibori Argentina posboni Emiliano Martínezning yaqindagi harakatidan keyin yanada katta ma’no kasb etdi. U Argentina – Jordan uchrashuvidan so‘ng Bangladesh haqida iliq so‘zlar aytib, u yerdagi muxlislarni qanchalik qadrlashini ta’kidlagan edi. Endi esa futbol olamining eng katta sahnasidagi yulduzlar Bangladeshning o‘ziga xos jahon chempionati madaniyatini tobora ko‘proq tan olib bormoqda.
Maydonda esa Braziliya o‘z ishini qildi. Yaponiya erta gol urib, bosimni oshirdi, lekin Braziliya chekinmadi. Casemiro hisobni tenglashtirdi, o‘yin keskinlashdi, vaqt esa siqilib borardi. Nihoyat, Martinelli so‘nggi daqiqalarda zarba berdi va Braziliya 2:1 hisobida g‘alabani tortib oldi. Shu tariqa, samba ustalari qiyin o‘yindan keyin ham 1/8 final yo‘llanmasini qo‘lga kiritdi.
Bangladeshda esa shu paytda tun allaqachon yarimni ortda qoldirgan, lekin ko‘chalar uyg‘oq edi. Ekran ortidagi bu sadoqatni endi faqat statistik raqamlar emas, balki Alisson, Casemiro va Martínez kabi yulduzlarning samimiy so‘zlari ham tasdiqlab turibdi.
Savol bitta: bu masofalar, vaqt farqlari va geografiyani inkor etgan muhabbat ertaga yana qaysi yulduzni Bangladesh tomon qarashga majbur qiladi?
