Alex Scott: Manchester United uchun 80 millionlik savol
“Manchester United” yozgi oynada markazni yangilashga majbur. Reja oddiy: kamida bitta sifatli yarim himoyachi olib kelish. Amal esa unchalik silliq ketmayapti.
Elliot Anderson qo‘ldan ketdi. Mateus Fernandes ham boshqa yo‘lni tanladi. Endi esa navbat “Bournemouth”ning porlayotgan yulduzi – Alex Scottga kelgan.
Scott – “Old Trafford” ro‘yxatining yuqori qismida
Samuel Luckhurst xabariga ko‘ra, “United” ichkarida allaqachon qaror qilgan: hozirgi bozor sharoitida ularning birinchi raqamli markaziy maqsadi – Alex Scott.
Yosh ingliz futbolchisi “Bournemouth”ga kelganidan beri “Premier League”dagi eng istiqbolli yarim himoyachilardan biriga aylandi. O‘yinni o‘qiydi, pressingdan qo‘rqmaydi, to‘p bilan ham, to‘psiz ham aqlli harakat qiladi. Shuning uchun ham unga qiziqayotgan klublar soni ortib bormoqda.
“Manchester United” yoz uchun keng ro‘yxat tuzgan, Scott esa aynan shu ro‘yxatning yuqori qatiga ko‘tarilib oldi.
80 millionlik to‘siq
Muammo esa narxda. “Bournemouth” Alex Scottni arzon berishni o‘ylamayapti. Klub uni 80 million funt atrofida baholamoqda.
Luckhurst ma’lumotiga ko‘ra, “United” hali rasmiy ravishda chekinmagan. “Old Trafford”dagi rahbariyat Scott uchun taklif berish variantini hanuz stol ustida ushlab turibdi. Qisqasi, poygadan chiqib ketishmadi.
“Bournemouth” esa vaqtni boy bermayapti: ular Scott bilan yangi shartnoma bo‘yicha muzokara olib bormoqda. Devor ortidan eshitilayotgan gap bitta – yangi kelishuvga ozodlik bandi kiritilishi deyarli aniq. Bu esa kelajakdagi transferni qoidaga soladi, lekin narxni ham yanada mustahkamlaydi.
“United” qachongacha chekinaveradi?
“Manchester United” yaqinda ikkita maqsaddan voz kechdi, chunki to‘lov summalari ularning fikricha haddan tashqari yuqori edi. Tottenham va “Manchester City” Fernandes va Anderson uchun bozorni ko‘targan summalarni to‘lashga tayyor bo‘ldi, “United” esa orqaga tisarildi.
Bu yondashuv mantiqsiz emas. Klub nihoyat aqlli skauting va maqsadli xaridlar bilan ishlashni xohlayapti, haddan tashqari to‘lovlardan qochishga urinmoqda. Lekin bir haqiqat bor: yuqori darajadagi maqsadlar ketma-ket qo‘ldan ketaversa, buning ham narxi bor.
Bir payt kelib, “United” “ha” deyishi, riskni bo‘yniga olishi kerak bo‘ladi. Savol bitta: shu bosqich Alex Scott bilan boshlanadimi?
Qaror vaqti
Markazga kuchaytirish shunchaki istak emas, zaruratga aylanib ulgurgan. Yozgi oynada “Old Trafford” eshiklaridan yangi yarim himoyachi kirib kelishi shart.
“Manchester United” endi ikkilanib o‘tirishi mumkin emas: Scott uchun 80 millionlik baho – haddan tashqari xavfmi yoki nihoyat bosiladigan tugmami? Shu qaror kelgusi mavsumdagi o‘yin ritmini ham, klubning transfer siyosati obro‘sini ham aniq belgilab beradi.
