Aleksandr Isak: rekord narx va Anfielddagi katta sinov

Aleksandr Isak: rekord narx, og‘ir mavsum va “Anfield”dagi katta sinov

St James’ Parkda u to‘xtamasdi. 109 o‘yin, 62 gol. Shundan 54 tasi – Premier League bahslarida. “Newcastle” safida 26 yoshli hujumchi klassik to‘qqizinchi raqam emas, deyarli to‘liq hujum mashinasiga aylangandi. Jarima maydonida ham, orqaroqda ham, qanotga og‘ib ham – hammasini qilar, himoyachilarni charchatib qo‘yardi.

Shu obro‘ uni “Liverpool”ga olib keldi. Angliyadagi amaldagi chempionlar hujum chizig‘ini boshqaradigan, yillarga yetadigan markaziy forvard izlayotgandi. Britaniya transfer rekordini yangilashdi, Isakdan esa yangi davrning ramziga aylanish talab qilindi.

Ammo 2025-26 yilgi mavsum bu ssenariy bo‘yicha ketmadi.

Mavsumni sindirgan yoz va sinib ketgan oyoq

Isak “Liverpool”ga to‘liq tayyorgarliksiz yetib keldi. Presezondagi uzilishlar, ritm yo‘qligi – hammasi ilk daqiqalardanoq ko‘zga tashlandi. Unga xos bo‘lgan yengillik, tezlik, o‘tkir pressing ko‘rinmay qoldi. Uyg‘unlik o‘rnini og‘irlik egalladi.

Dekabrda esa eng yomon ssenariy yuz berdi – oyoq sinishi. Hujumchi uchun bu nafaqat tana, balki ruhiyat zarbasi ham bo‘ldi. Mavsum yakuniga kelib statistikada atigi to‘rtta gol. Rekord transfer, ammo rekord emas, balki savollar soni oshdi.

Shunga qaramay, 2026 yilgi Jahon chempionati Isakni yana sahnaga qaytardi. Shvetsiya turnirda ishtirok etdi, hujumchi yana yirik sahnada ko‘rindi. Lekin bu ham klub uchun boshqa muammo: yana qisqa yoz, yana to‘liq presezon yo‘q. “Liverpool” esa endi unga vaqt berish holatida emas.

Yakshanba kuni “Liverpool” mavsumni aynan “Newcastle” maydonida boshlaydi. Isak eski uyi – St James’ Parkga qaytadi. U yerda u yulduz bo‘lgandi. Endi esa u yerda uni rekord narx, og‘ir mavsum va ulkan bosim bilan kelayotgan raqib hujumchi sifatida kutib olishadi.

Heskey: “20 gol+assistdan kam bo‘lmasligi kerak”

Emile Heskey, “Liverpool” sobiq hujumchisi, BetWright homiyligida GOAL bilan suhbatda Isak oldiga aniq reja qo‘ydi. U raqamlar bilan gapirdi, his-tuyg‘ular bilan emas.

Uning fikricha, Isak uchun boshlang‘ich reja aniq: gol va assistlar jamlanmasi kamida 20 bo‘lishi shart.

Heskey buni shunchaki istak sifatida emas, zarurat sifatida ko‘rsatdi. “Liverpool” endi Mo Salahning 30+ gollariga tayanolmaydi. Sadio Mane endi 25 atrofida urmaydi. Roberto Firmino ham 19 bilan yordam beradigan davr ortda. Endi markazda bitta asosiy nuqta bor – Isak.

Narx yorlig‘i, “9” raqami, tarixiy transfer – bularning bari uni markazga qo‘yadi. Heskey aynan shuni eslatdi: 20+ – bu shift emas, boshlanish nuqtasi. Qolganlari esa atrofidagi futbolchilarga bog‘liq, lekin chiziqni belgilab beradigan odam baribir Isak bo‘lishi kerak.

Fowler xavotiri: “U hech qachon to‘liq tayyor bo‘lib kelmadi”

Yozgi tayyorgarlik davrida Isak “Monaco”ga qarshi o‘rtoqlik uchrashuvida gol urdi. Bu kichik, ammo muhim signal. Hujumchi o‘zini yana gol hisi bilan bog‘lashga urinmoqda. Lekin “Anfield” afsonalaridan biri, muxlislar “God” deb ataydigan Robbie Fowler hali ham ishonch bilan qaray olmayapti.

U GOAL bilan suhbatda o‘z xavotirini yashirmadi. Uning asosiy nuqtasi oddiy: fitnes.

Fowler eslatdi – Isak “Liverpool”ga kelgan paytda ham to‘liq tayyor emasdi. Nega bunday bo‘lganini hech kim aniq bilmaydi, taxminlar ko‘p, lekin fakt o‘zgarmaydi: u optimal holatga yaqinlashguncha vaqt ketdi. Nihoyat ritmga kirayotgandek bo‘lganida esa o‘sha mash’um singan oyoq.

Mavsum oxirida qaytib keldi, bir nechta o‘yin o‘tkazdi, lekin tanasi hamon orqada edi. Bu tabiiy – yaqinda og‘ir jarohat olgan futbolchidan bir zumda eski portlashni kutib bo‘lmaydi.

Endi esa yangi muammo: Jahon chempionatidan keyin yana qisqa ta’til, yana qisqa presezon. Fowler aynan shundan cho‘chiyapti. U fikricha, Isak navbatdagi mavsumga ham to‘liq presezonsiz kirib boradi va bu “Liverpool” muxlislari kutayotgan darajadagi portlovchi formani kechiktirishi mumkin.

U baribir bitta gapni qo‘shib o‘tdi – xato bo‘lib chiqishni istaydi. Lekin hozircha ichidagi xavotir ustun.

Endi navbat Isakda

“Liverpool” uchun bu mavsum, ehtimol, Isak mavsumi bo‘ladi. Salah, Mane, Firmino davri tugagan, yangi hujum yulduzi sahnaga chiqishi kerak. Klub rekord transfer uchun pul to‘ladi, endi rekord emas, barqarorlik va ishonchli raqamlar kerak.

St James’ Parkda u bir paytlar qahramon edi. Endi u yerga raqib sifatida qaytadi, yelkasida esa butun “Anfield”ning umidi turibdi.

Savol bitta: u yana o‘sha to‘liq, ishonchli, raqiblarni qo‘rqitadigan to‘qqizinchi raqamga aylanadimi yoki rekord narx uning bo‘ynidagi eng og‘ir yuk bo‘lib qoladimi?